Na Mwandishi Wetu, JamhuriMedia, Zanzibar
Katika mchakato wa kuelekea Uchaguzi Mkuu wa Zanzibar, jina la Othman Masoud Othman, Mgombea Urais kupitia ACT Wazalendo, limezidi kushika kasi. Wananchi wengi wanamwona kama kiongozi mwenye maono ya kuibadilisha Zanzibar kuwa nchi ya wananchi wote, si mali ya wachache waliyozoea kutumia mamlaka kujinufaisha.
Othman Masoud anasema wazi kuwa Zanzibar lazima irudi kwa wananchi wake. Kwa miaka mingi mamlaka na rasilimali za taifa hili zimekuwa zikimilikiwa na wachache, huku wananchi wa kawaida wakiachwa nyuma.
Serikali yake inalenga kuondoa mfumo huu na kujenga Zanzibar ya mshikamano ambapo kila Mzanzibari atajiona sehemu ya taifa na sio mtazamaji tu.
Wananchi wengi wamekuwa wakiona matunda ya mapato ya taifa hayawafikii. Utalii, bandari, na uvuvi sekta zinazokusanya mabilioni—hazijawahi kuwagusa wananchi wa kawaida moja kwa moja. Kwa kurudisha Zanzibar mikononi mwa wananchi, Othman analenga kuhakikisha mapato ya taifa yanajenga shule, hospitali, na ajira, badala ya kunufaisha kundi dogo la watu.
Moja ya changamoto kubwa zinazowakumba Wazanzibari ni kuporwa kwa ardhi zao. Vijiji vingi, hasa Pemba na Unguja, vimekuwa vikilalamika ardhi yao kutolewa kwa wawekezaji bila wananchi kuhusishwa.
Othman Masoud ameahidi kulinda ardhi ya wananchi na kuhakikisha ni mali ya vizazi vya sasa na vijavyo.
Mfano halisi: Vijiji vilivyopoteza ardhi kwa kisingizio cha uwekezaji wa hoteli au miradi ya kilimo, lakini wananchi wenyewe waliobomolewa nyumba zao walibaki maskini.
Serikali ya Othman itahakikisha hakuna ardhi inayochukuliwa bila ridhaa na maslahi ya wananchi kuzingatiwa. Ardhi itapangwa vizuri kwa ajili ya makazi, kilimo, na uwekezaji wa kweli unaowanufaisha wananchi.
Othman anaamini kwamba elimu ndiyo chombo kikuu cha ukombozi wa wananchi. Mfumo uliopo umeshindwa kuwapa vijana wa Zanzibar stadi za maisha zinazowiana na mazingira yao. Serikali yake italeta mtaala mpya unaoendana na wakati, utakaowajengea vijana uwezo wa kufanya kazi katika sekta za bahari, utalii, teknolojia na viwanda vidogo.
“Kijana anayeishi Pemba leo mwenye kipaji cha uvuvi, lakini mtaala wa shule haumpi maarifa ya kisasa ya kusindika au kuuza samaki sokoni kwa bei kubwa.
Badala yake, anamaliza shule bila ujuzi wa moja kwa moja. Elimu ya Othman inalenga kuhakikisha kijana huyo anasomea uvuvi wa kisasa, biashara ndogo ndogo, na teknolojia za kilimo cha baharini ili aweze kujiajiri na kusaidia familia yake.”alisema.
Ufisadi ni mzizi wa matatizo ya Zanzibar. Kwa muda mrefu mikataba mibovu imesababisha mali ya umma kupotea, huduma za kijamii kudumaa na wananchi kubaki maskini.
Othman Masoud ameapa kuondoa kabisa mfumo wa kifisadi kwa kuchukua hatua kali dhidi ya wahusika na kufuta mikataba yote isiyo na faida.
Mfano halisi: Mkataba wa miradi ya ujenzi au uvuvi ambapo serikali hupoteza mabilioni huku wananchi hawapati ajira wala mapato. Serikali ya Othman itahakikisha kila senti inayotoka hazina inaleta matokeo kwa wananchi, iwe ni darasa jipya, hospitali bora, au barabara za vijijini.
Mapambano haya si tu kulinda fedha, bali kurudisha heshima ya serikali machoni pa wananchi.
Kwa muda mrefu wafanyakazi wa serikali wamekuwa wakihudumia taifa kwa mishahara duni, hali inayowafanya waishi kwa dhiki.
Othman ameahidi mshahara wa chini wa shilingi milioni moja kwa kila mfanyakazi wa serikali. Hatua hii inalenga kuondoa maisha ya umasikini kwa watumishi na kuongeza morali ya kazi.
Mfano halisi: Mwalimu anayeishi Pemba au Unguja anayelipwa chini ya laki tano, hali inayomfanya ashindwe kumudu kodi, ada za watoto na gharama za maisha.
Serikali ya Othman inalenga kumrudishia mwalimu huyu heshima yake kwa kumlipa mshahara wa hadhi, ili akihubiri elimu afanye hivyo kwa amani ya moyo na ari ya taifa.
Othman Masoud anaamini ulinzi Bora wa walimu wa Zanzibar utakua kichocheo cha maendeleo ya wanafunzi na kuzalisha watalamu wengi zaidi watakaokua na manufaa kwa taifa lao Zanzibar.
Kuhusu kilimo cha Karafuu ni alama ya utambulisho wa Zanzibar, lakini wakulima wake wameachwa wakihangaika na bei ndogo.
Othman Masoud ameahidi kulipa zao hili heshima yake kimataifa kwa kuhakikisha wakulima wanapata bei bora na soko lenye uhakika.
Mfano halisi: Mkulima wa Mkoani auWete anayepanda karafuu mwaka mzima lakini anauza kwa bei ya chini inayomfanya aishi maisha ya mateso. Serikali ya Othman italinda bei ya karafuu na kuimarisha masoko ya kimataifa, kuhakikisha jasho la mkulima linabadilika kuwa heshima na maisha bora.
Kama ujuavyo Kwa mujibu wa idadi ya sensa ya watu na Mkaazi 2022 zaidi ya nusu ya watu wa Zanzibar ni vijana, lakini wengi wao hawana ajira wala matumaini licha ya kuendelea kuahidiwa kila uchao. Kwa lengo la kutatua changamoto hii Othman ameahidi kuwekeza katika nguvu kazi ya vijana kwa kuanzisha mikopo midogo, mafunzo ya ufundi na teknolojia, na kuondoa ubaguzi wa ajira. Ajira zitakuwa kwa misingi ya uwezo na taaluma, siyo upendeleo au ukabila.
Mfano halisi: Kijana aliyemaliza chuo cha utalii lakini anakosa kazi kwa sababu hana “mtu wa kumjua.” Serikali ya Othman italeta mfumo wa ajira wa haki ambapo kijana huyo atapata nafasi ya kufanya kazi kwa uwezo wake. Vilevile, vijana watapatiwa mikopo na vifaa vya kuanzisha biashara ndogo kama ufugaji wa samaki, hoteli ndogo, au biashara za kidigitali.
Zanzibar iko kwenye njia panda ya kihistoria. Tarehe Oktoba 29 si siku ya kawaida—ni siku ya maamuzi ya mustakabali wa taifa. Ni siku ambapo wananchi wataamua kama wataendelea kubaki katika mfumo uliojaa ufisadi, umasikini na dhulma, au watachagua Zanzibar mpya ya mshikamano, heshima na maendeleo.
Kuura yako ni silaha ya kulinda ardhi yako, elimu ya watoto wako, ajira za vijana, na heshima ya taifa lako. Oktoba 29 ni siku ya kuandika historia mpya ya Zanzibar historia ya taifa linalorudi mikononi mwa wananchi wake.
