Kazi/Ajira

Na Mwamvua Mwinyi,JamhuriMedia,Kibaha

WANAWAKE mkoani Pwani wameaswa kuvunja ukimya na kuungana kupinga vitendo vya ukatili kwa watoto na kuwaasa kuwakemea watoto wao kujiepusha kwenda vibanda umiza ambavyo vingine huwa vikionyesha video zisizo na maadili.

Akizungumza katika hafla ya Generation Queen’s (Mwanamke Sahihi) kukabidhi baiskeli 15 zenye thamani ya milioni sita kwa watoto wenye ulemavu Kibaha ,Rachel Chuwa kutoka sekretariet ya mkoa wa Pwani ameeleza mwanamke nyumbani ndio Mwalimu wa watoto hivyo wajitahidi kuwafuatilia na kukemea watoto wanapojiingiza kwenye mambo maovu.

Amewataka jamii na wanawake wote kijumla ,kushiriki kupinga vitendo vya ukatili kwa kuvunja ukimya na mzunguko mzima wa ukatili kwa kutumia vyombo vya sheria bila kuficha matukio yanayotokana na ukatili hali inayosababisha kuongeza idadi ya matukio hayo kwenye jamii.

Rachel aliwapongeza Mwanamke Sahihi kwa kumkomboa mtoto mwenye ulemavu na Kuwa sehemu ya kumkomboa mwanamke.

Akitoa taarifa ya kikundi Cha Generation Queens ,Mwenyekiti wa Generation Queen’s ,Betty Msimbe ameeleza, wametoa baiskeli hizo 15 lakini lengo ni kutoa baiskeli 100 zenye thamani ya milioni 70 .

Alisema ,wamekusudia kumkomboa mtoto mwenye ulemavu kutokana na wengi wao kukosa mahitaji muhimu na wengine kuficha hali inayosababisha kukosa haki mbalimbali ikiwemo elimu.

“Tumepata maombi mengi kutoka kwa watoto hao ,sisi pekee hatuwezi !!,tuwaombe taasisi binafsi , jamii pamoja na wadau waguswe kusaidia kushirikiana na sisi kusaidia vifaa vya watoto wenye ulemavu”amesisitiza Msimbe.

Msimbe aliwaasa wazazi na walezi wanaoishi na watoto wenye ulemavu wasiwafiche watoto wao kwani wanawakosesha haki wanazostahili kupata Kama walivyo watoto wasio na ulemavu.

Mwenyekiti huyo, alimuomba Rais Dkt. Samia Suluhu Hassan kuangalia namna ya kuwapatia shule au maeneo ambayo watawekwa watoto wenye ulemavu ili waweze kuwafuatilia maana wapo ambao majumbani hawapati mahitaji sahihi.

Vilevile Msimbe, ameelezea kuhusu maendeleo ya kikundi hicho tangu kianzishwe mwaka 2019 ,na kusema kwasasa kina hisa milioni 23.5 na wameweza kukopeshana milioni 74.9 .

Mjumbe wa kikundi Cha Mwanamke Sahihi ,Nancy Godwin alitoa Rai kwa wanawake kujitokeza kujiunga na vikundi vya akinamama kwani vinasaidia kujikomboa kiuchumi na kupata mikopo kirahisi.

Na Mwandishi Wetu,Ruaha

HIFADHI ya Taifa ya Ruaha imesema kwa sasa kuna mradi mkubwa wa maji ambao unaendelea katika eneo la Malumbe Kijiji cha Tungamalenga kwa lengo la kuhakikisha maji hayo yanafika kwenye eneo la ndani ya hifadhi hiyo, ili kuondokana na adha ya kukosa maji safi na salama.

Imeelezwa kwamba ili kufanikisha mradi huo kiasi cha Sh.bilioni 1.6 kimepangwa kutumika kuanzia mwanzo wa ujenzi hadi kukamilika kwake na kwamba ulianza Septemba na unatarajia kukamilika Desemba mwaka huu na hivyo kutaondoa adha ya kukosekana kwa maji safi na salama iliyoko kwa muda mrefu.

Akizungumza na waandishi wa habari Kamishna Msaidizi wa Uhifadhi,Mkuu wa Hifadhi ya Taifa ya Ruaha Godwell Ole Meing’ataki amesema kuwa kwa sasa wanaendelea na ujenzi wa mradi mkubwa wa maji ambao unatekelekezwa kwa
ushirikiano wa Hifadhi ya Taifa ya Ruaha pamoja na wananchi wa Tungamalenga na Msembe na maji hayo yatakwenda ndani ya hifadhi hiyo.

“Maji haya yanaelekea katika Hifadhi ya Taifa ya Ruaha hasa eneo la Msembe lakini pia maji haya yatapelekwa kwenye tenki lililopo Kingamalenga kwa ajili ya jamii ya watu wa pale , ikumbwe kwamba Hifadhi ya Taifa ya Ruaha kwa miaka 58 tangu ianze kumekuwa na changamoto kubwa ya maji na maji yaliyokuwepo katika eneo hili hayana ubora na sio salama , mara
nyingi haya maji hayafai kwa ajili ya kupikia , kunywa kwani ni maji ambayo yana chumvi chumvi hata ukijaribu kuoga hautakati hata ukitumia sabuni maji haya hayafai.

“Na pia viwango vya madini mbalimbali kwenye maji haya yako juu na sio mazuri haishauri kwa binadamu kunywa wala kupikia.Hata ukitaka kupikia utakuta sufuria inabadilika kutokana na chumvi nyingi, sasa Hifadhi yetu
ya Taifa ya Ruaha kwa kushirikiana na kijiji cha Kingamalenga walibuni mradi huu na sasa utakwenda kuhakikisha uhakika wa maji safi na salama yanapatikana katika kijiji cha Msembe kwa ajili ya matumizi ya watumishi ,familia zao lakini na idadi kubwa ya wageni ambao wanatembelea hifadhi ya taifa ya Ruaha

“Huu mradi umetoka hapa mpaka Hifadhi ya Taifa ya Ruaha eneo la Msembe takribabani kilometa 36, mitaramo na mabomba yameshatandazwa katika kilometa hizo , kazi ambayo inafanyika hapa ni kujenga eneo la dakio la maji na baada ya hapo tutaunganisha mabomba na kupeleka maji eneo la Msembe.Pia tumejenga tenki kubwa kwa ajili ya kutunza haya maji halafu
tutakwenda kuyasambaza hadi hifadhini,”amesema.

Hivyo amesema kwa hiyo mradi huo ni wa kipekee ambao unaonesha manufaa ya ushirikiano kati ya wananchi wanaoishi jirani na hifadhi kwani bila ya mahusiano mema kati yao na wananchi wasingeruhusiwa kuchukua maji ambayo hata wao wananchi wanayahitaji.Pia wasingeruhusu mitaro na mabomba kupita kwenye mashamba yao, maeneo ya makazi kwa ajili ya kupela maji
kwenye Hifadhi ya Taifa Ruaha.

“Tunashukuru kwa ushirikiano ambao tumeupata na huu ni mradi mkubwa ambao unakwenda kunufaisha hifadhi lakini na wananchi nao kwa upata maji safi na salama,huu mradi ni mkubwa na umetumia takribani Sh.bilioni 1.6 ambazo ndio
zimetumika kwenye huu .Lakini kubwa zaidi katika kipindi cha kutekeleza mradi wananchi hawa wamekuwa waaminifu. Tunachohurahia maji yapo ya kutosha.

Kwa upande wake Ofisa Uhifadhi wa Taifa Ruaha Kitengo cha Uhusiano kwa Jamii Priscus Mrosso amesema hifadhi hiyo makao makuu yake yapo Msembe ambacho ni kitongoji cha Kijiji cha Kingamalenga kwa hiyo wameuchukua mradi huo katika Kijiji cha Malunde.“Ni sehemu ya ujirani mwema na ni mradi ambao unakwenda kutunufaisha sisi wote.

“Kwa awamu hii ambayo mradi unatekelezwa sasa hivi Tungamalenga watapata maji kidogo lakini kwenye awamu ya pili ya mradi ambayo hayajatolewa la maji lakini awamu ya pili watapata maji mengi , kwani tutaongezea nguvu
kwenye tanki lao kubwa la maji ambalo liko hapa kwenye kijiji.

Mahusiano kati ya hifadhi na kijiji cha Kingamalenga yako vizuri ndio maana waliliridhia hifadhi kupitisha mabomba katika maeneo yao ya mashamba, pia waliahidi mabomba hayo watayalinda kwani wanajua watanufaika na hayo
maji ambayo yanatakiwa kutoka Kijiji cha Malumbe mpaka hifadhini,”amesema.

Wakati huo huo Ofisa Mtendaji Kijiji cha Tungamalenga Linuss Mweluka amesema mahusiano kati yao,TANAPA na Hifadhi ya Taifa ya Ruaha hayajaanza leo ni muda mrefu na wamekuwa wakipata wa kujengewa majengo mbalimbali taasisi hasa Elimu na Afya .

“Lakini kwa mradi huu wa maji tunasema umefika kwa wakati kwasababu kijiji chetu kilikuwa na changamoto sana ya maji ya bomba , kwa mahusiano tuliyonayo na TANAPA hadi sasa tumeshaambiwa tunaletewa maji hayo na
tutawekewa kwenye tenki ambalo lipo hapa kwa ajili ya kutumia sehemu kubwa kwa taasisi mbili elimu na afya kwa awamu hii ya kwanza

Na Cresensia Kapinga,JamhuriMedia,Songea

MKUU wa Mkoa wa Ruvuma Kanali Rabani Thomas amewataka Makandarasi wazawa kuonyesha uzalendo wa ufanisi wa kazi pindi wanapopewa kazi za ujenzi wa miradi mbalimbali ikiwemo za barabara ili waendelee kuaminiwa kupewa kazi zingine.

Wito huo ameutoa wakati akiongoza zoezi la utiaji saini mikataba ya awamu ya pili ya ujenzi wa miundombinu ya barabara kati ya Wakala wa Barabara za Vijijini na Mijini(Tarura)na Makandarasi iliosainiwa katika ukumbi wa Manispaa ya Songea Mkoani humo.

Kanali Thomas amesema kuwa kumekuwepo kwa baadhi ya Makandarasi kuleta visingizio pindi wanapoharibu miradi au kuchelewesha kuimaliza jambo ambalo amesema limekuwa likirudisha nyuma jitihada za maendeleo kwa Wananchi.

Aidha katika hatua nyingine mkuu huyo amempongeza Meneja wa TARURA mkoani humo Wahabu Nyamzungu kuwa amekuwa akisimamia vema fedha zinazoletwa na Serikali kwaajili ya ujenzi wa miundombinu ya barabara na kupelekea baadhi ya Vijiji ambavyo vilikuwa havifikiki kwa usafiri wa gari kama barabara ya kutoka Njambe na Ndonga kuwa sasa inapitika.

Kwa upande wake Meneja wa TARURA Mkoani humo Wahabu Nyamzungu amesema kuwa fedha ambazo huletwa kwenye mwaka wa fedha tangu 2021 hadi 2023 zimekuwa zikitumika katika ujenzi wa miundombinu ya barabara,madaraja na Vivuko jambo ambalo limefanya maeneo mengi barabara za Wilaya tano na Halmashauri nane ziweze kupitika.

Nyamzungu amesema kuwa mikataba iliosainiwa ni ya awamu ya pili na kuwa ya awamu ya kwanza Makandarasi wapo kwenye sehemu zao za miradi waliopewa (Site)na kuwa miradi hiyo inaendelea vizuri.

Kwa upande wake mmoja wa Makandarasi ambaye amesaini mkataba huo Valence Urio ambaye ni mkurugenzi wa kampuni ya Ovans Construction Limited yenye makao yake Mjini Mbinga ameishukuru Serikali inayoongozwa na Rais Samia Suluhu Hassan kwa kumuamini kumpa kazi ya kutekeleza miradi mbalimbali ya miundombinu ikiwemo ya barabara na kuwa ataifanya kwa wakati.

Na Julius Konala,JamhuriMedia,Namtumbo

WANANCHI na wanafunzi wa kijiji cha Mtonya kilichopo katika Kata ya Likuyu Seka wilayani Namtumbo mkoani Ruvuma, wamenufaika na mafunzo ya elimu ya usalama barabarani kupitia ufadhili wa kampuni ya Mantra Tanzania kwa kushirikiana na Jeshi la Polisi kwa lengo la kupunguza ajali na vifo kwa watumiaji wa barabara hizo wilayani humo.

Mafunzo hayo ya siku moja yalifunguliwa hivi karibuni na kaimu kamanda wa polisi(OCD)wa wilaya ya Namtumbo ASP John Ntunde katika viwanja vya shule ya msingi Mtonya na kuhudhuriwa na Diwani wa kata ya Likuyu Seka,mtendaji kata na kijiji,walimu,wanafunzi,askari polisi pamoja na wadau wa usalama barabarani toka kampuni ya Mantra Tanzania.

Akifungua mafunzo hayo kwa wananchi na wanafunzi wa shule ya msingi Mtonya,ASP Ntunde ambaye pia ni mkuu wa kikosi cha usalama wilayani humo amewataka watumiaji wa vyombo vya moto na watembea kwa miguu kuzingatia sheria na taratibu za usalama barabarani ikiwemo kuepuka ulevi na kukimbia mwendo kasi.

Aidha amekemea tabia inayofanywa na baadhi ya waendesha bodaboda wilayani humo ya kubeba abiria juu ya mzigo,kubeba abiria wengi( mishikaki)kuweka mziki mkubwa kwenye pikipiki zao hali inayosababisha pindi wanapopigiwa honi washindwe kusikia pamoja na kuendesha vyombo vya moto bila ya kuwa na Bima.

Naye kaimu mkuu wa kikosi cha usalama barabarani(DTO)wa wilaya ya Namtumbo Kaunda Kaunda akitoa tathmini ya utendaji kazi wa kikosi hicho alisema kuwa kwa kipindi cha kuanzia Januari hadi Septemba 2021/2022 ajali za vifo zilikuwa 2 na Februari hadi Machi 2022 ajali za vifo zilikuwa 3 sawa na ongezeko la asilimia 33.33 na kwamba katika kpindi hicho jeshi hilo limeweza kupunguza ajali kutoka 13 hadi kufikia 7.

Hata hivyo Kaunda aliyataja mafanikio yaliyopatikana tangu elimu hiyo ya usalama barabarani ianze kutolewa kwa wananchi,wanafunzi na watumiaji wa vyombo vya moto kuwa ni kupungua kwa ajali kwa watembea kwa miguu na waendesha vyombo vya moto huku akizitaja changamoto wanazokumbana nazo kuwa ni uhaba wa vyombo vya moto kwa watoa elimu ya usalama barabarani wilayani humo.

Meneja uhusiano wa kampuni ya Mantra Tanzania Khadija Pallangyo alisema kuwa lengo la kuendesha mafunzo hayo kwa watumiaji wa vyombo vya moto na watembea kwa miguu ni kutaka kukabiliana na changamoto ya ongezeko la magari baada ya mgodi kuanza kazi.

Pallangyo alisema kuwa tangu kampuni hiyo ianze kutoa elimu ya usalama barabarani wanafunzi 14,000 wamefikiwa na elimu hiyo ambapo amedai kwamba katika kipindi cha mwaka 2022 kampuni hiyo inatarajia kutoa elimu hiyo kwa shule 28 zilizopo katika barabara kuu itokayo Songea kuelekea Tunduru pamoja na zilizopo katikati ya wilaya hiyo.

Awali askari wa kikosi cha usalama barabarani wilayani humo Nurdin Juma na Rashid Bilinji walitoa mada mbalimbali kwa washiriki wa mafunzo hayo ikiwemo namna ya kuvuka barabara kwa watembea kwa miguu na watumiaji wa vyombo vya moto.

Mwandishi wetu,JamhuriMedia,Arusha

Taasisi ya Wanahabari wa Kusaidia Jamii za Pembezoni (MAIPAC) inatarajiwa kuwa na mashirikiano na taasisi zisizo za kiserikali za nchini CANADA ili kuwajengea uwezo wanahabari na kusaidia jamii ya Pembezoni.

Mkurugenzi wa shirika la MAIPAC, Mussa Juma ametoa taarifa jana katika hafla ya kumuaga mshauri elekezi wa MAIPAC kutoka nchini Canada, Lori Legault ambaye alikuwa nchini kulijengea uwezo shirika la MAIPAC.

Juma amesema licha ya mshauri huyo kutoa mafunzo kwa MAIPAC jinsi ya kuandaa miradi na kutafuta wafadhili walifikia makubaliano ya kuwa na mahusiano na mashirika ya Canada ambayo yanajihusisha na kusaidia jamii za pembezoni na wanahabari.

Amesema mtaalam huyo ambaye ameletwa nchini maalum kusaidia MAIPAC na taasisi ya CESO kwa ushirikiano na ubalozi wa Canada ujio wake umekuwa na mafanikio makubwa.

Awali Legault amesema anashukuru kuja nchini Tanzania na kufanyakazi na MAIPAC kwani pia amejifunza utekelezwaji miradi ya MAIPAC .

Amesema amejionea kazi za mradi wa uhifadhi mazingira,vyanzo vya maji na Misitu kwa maarifa asilia ambao unafadhiliwa na shirika la Maendeleo la umoja wa Mataifa(UNDP) na kusimamiwa na Jumuiko la Maliasili Tanzania (TNRF).

“Nimefurahi kuwa Tanzania na MAIPAC watu wa Tanzania ni wakarimu sana na tutaendelea kushirikiana”amesema

Afisa Miradi wa MAIPAC Debora Makando amesema wamejifunza mengi kutoka kwa mfadhili huyo.Makando amesema kutokana na mafunzo waliyopata wataboresha utendaji wa kazi wa MAIPAC.

Afisa Tawala wa MAIPAC Andrea Ngobole amesema wanahabari na jamii za pembezoni zitanufaika na mahusiano ya MAIPAC na Taasisi za Canada na CESO.

“Tunataraji kuwa na miradi ya kubadilishana uzoefu kusaidia jamii za pembezo na athari za mabadiliko ya tabia nchi,” amese

Na Mwandishi Wetu,JamhuriMedia,Kagera

Waziri wa Madini, Dkt. Doto Biteko ameiagiza Kampuni ya Tembo Nickel inayomiliki mradi wa uchimbaji Madini ya Nikeli kulipa fidia wananchi watakaopisha eneo la mradi ambao uthaminishaji wa maeneo yao umekamilika.

Dkt.Biteko ametoa agizo hilo alipotembelea mradi wa Kabanga Nikeli katika ziara iliyolenga kukagua hatua iliyofikiwa katika uendelezaji wa mradi husika katika eneo la Kabanga wilaya ya Ngara Mkoani Kagera.

Aidha, Dkt.Biteko amesema kuwa, zaidi ya Shilingi bilioni 30 tayari zimetengwa kwa ajili ya kulipa fidia kwa Wananchi watakaopisha mradi huo. Pia, amesisitiza taratibu za ulipaji fidia zianze ili Wananchi wasisubiri kwa muda mrefu na kupunguza tabia ya Wananchi wasio na nia njema kutegesha mazao kama migomba kwa ajili ya kufidiwa.

“Kama Serikali tunashauri na kuwaomba Wananchi tuachane na hizi tabia za ujanja ujanja ambapo watu wengi wanakuja hapa Tembo Nickel kupanda migomba kwa nia yake ni kutegesha ili alipwe fidia”, amesema Biteko.

Vile vile, ametoa wito kwa Wananchi wa Ngara na Mkoa wa Kagera kutoa ushirikiano katika hatua zote muhimu ili kufanikisha ulipaji wa fidia katika maeneo hayo na uendelezaji wa mradi.

Akizungumzia watu wanaochukua ardhi kwa ajili ya kulipwa fidia ya mali katika mradi huo amesema, tayari maeneo yote ya mradi yalishachukuliwa picha za Satelite kuonesha hali ilivyokuwepo kabla na baada ya zoezi la uthaminishaji kuanza.

Naye, Meneja Mkazi wa Kampuni ya Tembo Nickel Benedict Busunzu amesema kwa sasa baada ya kupata leseni ya uchimbaji mkubwa wa madini ya Nikeli, Kampuni iko katika hatua za awali za kuhamisha Wananchi kutoka katika eneo la mradi ili kuanza ujenzi wa miundombinu ya mgodi.

Ameongeza kuwa, baada ya kupokea maelekezo ya Waziri wa Madini kuhusu maeneo yaliyofanyiwa uthaminishaji, wananchi hao watapewa kipaumbele cha kulipwa fidia zao.

“Tunawaomba wananchi wa Ngara, wananchi wa Kagera kuonyesha ushirikiano maana mradi huu umesubiriwa kwa muda mrefu, vitu vidogo vidogo vinavyojitokeza tungependa tuvitatue kwa pamoja ili mradi usichelewe,” ameongeza.

Ametoa mfano kwa wananchi wenye nyumba, mashamba pamoja na shule kuwa kwa mujibu wa Sheria yatatolewa fidia ili maeneo yote yafikiwe haraka na hatimaye mradi uanze.

Kutokana na shughuli zinazofanyika kwa sasa katika eneo la mradi, Wananchi zaidi ya 200 wamepata ajira. Aidha, tayari mradi huo umelipa kodi kwa Serikali zaidi ya Shilingi bilioni 2.4 katika hatua za awali kabla ya kuanza uchimbaji rasmi.

Katika ziara hiyo Dkt. Biteko ameambatana na Katibu Mkuu wa Wizara ya Madini, Adolf Ndunguru, Kamishna wa Madini, Dkt. Abdulrahman Mwanga, Mtendaji Mkuu wa Taasisi ya Jiolojia na Utafiti wa Madini Tanzania (GST), Dkt. Musa Budeba, Kaimu Meneja wa Mazingira Tume ya Madini, Lucas Mlekwa na Kaimu Afisa Madini Mkazi, Samwel Shoo.