MCHANGANYIKO

Na Mwandishi Wetu, JamhuriMedia,Dar

Jeshi la Polisi nchini limewatia mbaroni watuhumiwa 167 ‘Panya road’ ,katika operesheni maalumu inayoendelea katika Jiji la Dar es Salaam ambao wanatuhumiwa kushiriki katika vitendo mbalimbali vya uhalifu.

Akizungumza leo Septemba 24,2022 ,Kamishna wa Operesheni na Mafunzo kutoka Jeshi la Polisi Awadhi Haji amesema kuwa watuhumiwa wamekuwa wakijihusisha na vitendo hivyo kwa kutumia silaha za jadi kama mapanga, nondo na visu.

“Hivi vitendo vinafanywa na kundi la wahalifu wenye umri wa miaka 14 hadi 30 na kuwa kwenye makundi ya watu 10 hadi 30 hupora na kuvunja nyumba nyakati za usiku hivyo katika operesheni yetu tumefanikiwa kuwakamata watuhumiwa hao 167,”amesema.

Amesema kuwa, katika operesheni hiyo wamefanikiwa kukamata mali zilizoibiwa katika maeneo mbalimbali ya Dar es Salaam ambazo ni televisheni 23, redio, kompyuta za mezani mbili pamoja na spika mbili za sabwoofer.

Amesema watuhumiwa waliokamatwa wamekutwa na mapanga 19 , vifaa vya kuvunjia , mikasi minne, nondo saba na jeki mbili

Katika operesheni hiyo pia Polisi wamekamata magari matatu aina ya Toyota Carina namba T 314 BVY,Toyota Noah namba T 218 BYS,Toyota Noah namba T 260 BEP.

Pikipiki tano ambazo ni aina ya Boxer MC 913 DEH, Boxer MC 405 CVM, MC 856 DFY, MC 206 DDK na pikipiki moja isiyokuwa na namba walizokuwa wakizitumia wahalifu kubeba zana za kufanyia uhalifu pamoja na kusafirisha mali za wizi baada ya uporaji.

Kamanda amesema kuwa, hivi sasa hali ya Jiji la Dar es Salaam ni shwari na wananchi wanaendelea na shughuli zao kama kawaida bila hofu yoyot

Hatimaye mkutano mkuu wa Chama Cha NCCR-Mageuzi umemfukuza uanachama mwenyekiti wa chama hicho Taifa, James Mbatia na pamoja na kumvua uongozi Makamu Mwenyekiti wa Chama hicho Angelina Rutairwa.

Mkutano huo unafanyika leo Jumamosi Septemba 24, 2022 jijini Dodoma na umehudhuriwa na wajumbe 224 kati ya 368 waliopo kwa mujibu wa Katiba ya chama chao.

Kaimu Mwenyekiti wa chama hicho, Haji Ambari Hassan kutaja amesema kuwa Mbatia anatuhuma saba zinazomkabili ambapo mbili zinamkabili Angelina.

Ambari amesema kuwa miongoni mwa tuhuma ambazo Mbatia anatuhumiwa nazo ni kuuza mali za chama,ikiwemo mashamba na nyumba katika maeneo mbalimbali.

Ambari amewaambia wajumbe hao kuwa viongozi hao walipelekewa hati ya mashtaka yao na walitakiwa kujibu ndani ya siku 14 kama katiba yao inavyotaka.

Aidha, mkutano huo ulitaka viongozi wote waliohusika na ubadhilifu wa mali akiwemo Mbatia kuchukuliwa hatua za kisheria.

Hata hivyo, amesema kuwa hakujibu mshtaka hayo na wala hakufika katika mkutano huo licha ya kualikwa ili aweze kujitetea mbele ya wajumbe badala yake walikimbilia mahakamani kuzuia kwa mara nyingine mkutano huo.

Mwenyekiti wa Baraza la Wadhamini ya chama hicho Joseph Selasini amesema halmashauri kuu ya chama hicho imewatimua uanachama wanachama 10 kwa utovu wa nidhamu uliokidhiri akiwemo Edward Simbeye.

Kamati ya Sera ya Fedha (MPC) imefanya kikao chake cha Septemba 222 Septemba 23,2022, ili kutathmini utekelezaji wa sera ya fedha na mwenendo wa uchumi kwa kipindi cha mwezi Julai na Agosti 2022. Kamati imeridhishwa na utekelezaji wa sera ya fedha, uliotoa wigo wa kukuza shughuli za kiuchumi, licha ya kuwepo kwa changamoto zinazosababisha kupanda kwa mfumuko wa bei, kutokana na ongezeko la bei za bidhaa katika soko la dunia.

Kamati imeridhishwa pia na kasi ya ukuaji wa uchumi inayokwenda sambamba na matarajio, licha ya kuwepo na changamoto zitokanazo na ukuaji mdogo wa uchumi wa dunia, kupanda kwa bei za bidhaa katika soko la dunia, kuongezeka kwa mfumuko wa bei, hali ngumu ya kifedha duniani, pamoja na maambukizi mapya ya UVIKO-19 kwa baadhi ya nchi duniani.

Katika robo ya kwanza ya mwaka 2022,uchumi wa Tanzania Bara umekua kwa asilimia 5.4,ikilinganishwa na makadirio ya asilimia 4.7 kwa mwaka 2022.Ukuaji huu umechangiwa zaidi na shughuli za kilimo, ujenzi, viwanda na uchimbaji wa madini.

Kwa upande wa Zanzibar, uchumi umekua kwa asilimia 5.1, ikilinganishwa na makadirio ya asilimia 5.4 kwa mwaka 2022. Ukuaji huu unatokana na kuimarika kwa shughuli za utalii. Kutokana na mwenendo huu wa uchumi, kuna uwezekano mkubwa wa kufikia makadirio ya ukuaji wa uchumi kwa Tanzania Bara na Zanzibar kwa mwaka 2022.

Mfumuko wa bei nchini umeendelea kuongezeka, japo kwa kasi ndogo na kubaki katika wigo wa tarakimu moja. Mfumuko wa bei kwa upande wa Tanzania Bara umeongezeka na kufikia asilimia 4.6 mwezi Agosti 2022, kutoka asilimia 3.6 mwezi Machi 2022, kiwango ambacho bado kipo ndani ya lengo la wastani wa asilimia 5.4 kwa mwaka 2022/23.

Mfumuko wa bei kwa upande wa Zanzibar, umeongezeka kufikia asilimia 5.4 kutoka asilimia 3.5, kiasi ambacho ni juu kidogo ya lengo la asilimia 5. Mwenendo huu umechangiwa na kupanda kwa bei za bidhaa katika soko la dunia, hususan vyakula na mafuta.

Kwa kipindi kilichobakia cha mwaka 2022/23, mfumuko wa bei unatarajiwa kubakia ndani ya malengo kutokana na kushuka kwa bei ya mafuta katika soko la dunia hivi karibuni, thamani ya Shilingi ya Tanzania kuendelea kuwa tulivu, na matarajio ya kupungua kwa kasi ya kupanda kwa bei za vyakula nchini.

Ujazi wa fedha umeendelea kuongezeka, ukichangiwa zaidi na kasi ya ukuaji wa mikopo kwa sekta binafsi. Kwa kiasi kikubwa, ongezeko hili limetokana na utekelezaji wa sera wezeshi za fedha na bajeti, na kuimarika kwa mazingira ya kufanya biashara na shughuli za kiuchumi zilizokuwa zimeathiriwa na UVIKO-19. Ujazi wa fedha kwa tafsiri pana zaidi (M3) umeongezeka kwa asilimia 7.9 na asilimia 11.5 mwezi Julai na Agosti 2022, mtawalia, sanjari na lengo la asilimia 10.3 kwa mwaka 2022/23.

Kasi ya ukuaji wa mikopo kwa sekta binafsi imeongezeka na kufikia wastani wa asilimia 20, kwa mwezi Julai na Agosti, 2022 ikilinganishwa na makadirio ya asilimia 10.7 katika kipindi chote cha mwaka 2022/23.

Katika kipindi cha Julai na Agosti 2022, ukusanyaji wa mapato ya Serikali kwa Tanzania Bara, ulifikia asilimia 93.8 ya lengo, ambapo mapato ya kodi yalikuwa asilimia 95.9 ya lengo, huku matumizi yakiendelea kuwiana na rasilimali zilizopo. Kwa upande wa Zanzibar, mapato ya kodi yalikuwa asilimia 96.4 ya lengo, kufuatia kuanzishwa kwa matumizi ya mashine za kielektroniki (Electronic Fiscal Devices). Aidha, matumizi ya Serikali yameendelea kuwiana na rasilimali zilizopo.
Sekta ya nje imeendelea kukabiliwa na athari za ongezeko la bei za bidhaa katika soko la dunia na hali ngumu ya kifedha duniani. Hali hii imesababisha kuongezeka kwa nakisi ya urari wa biashara ya bidhaa, huduma na uhamishaji mali nchi za nje.

Pamoja na changamoto hizo, akiba ya fedha za kigeni imeendelea kubakia katika viwango vya kutosha na kufikia dola za Marekani milioni 5,092 mwishoni mwa mwezi Agosti 2022, kiasi kinachotosheleza kuagiza bidhaa na huduma kutoka nje ya nchi kwa takriban miezi 4.6.

Kwa kuzingatia mazingira ya sasa na changamoto za kiuchumi duniani, Kamati ya Sera ya Fedha imesisitiza umuhimu wa kuendelea kuwa na akiba ya kutosha ya fedha za kigeni ili kudumisha utulivu wa thamani ya shilingi na kukidhi mahitaji ya nchi.

Kwa kuzingatia tathmini ya mwenendo wa uchumi wa Tanzania na changamoto za kuongezeka kwa mfumuko wa bei duniani, pamoja na kupanda kwa bei za bidhaa, Kamati ya Sera ya Fedha imeiridhia Benki Kuu ya Tanzania kuendelea kupunguza taratibu kasi ya kuongeza ukwasi kwenye uchumi katika kipindi cha mwezi Septemba na Oktoba 2022. Uamuzi huu unalenga kukabiliana na athari za kuendelea kuongezeka kwa mfumuko wa bei, sambamba na kulinda kasi ya ukuaji wa uchumi.

Gavana

Benki Kuu ya Tanzania

Waziri wa Afya Ummy Mwalimu leo Septemba 23,2022 ameweka wazi kuwa, kila mwaka takriban watoto 800 hugundulika kuwa na ugonjwa wa Saratani nchini Tanzania hivyo kuchangia ongezeko la vifo vinavyotokana na ugonjwa huo.

Waziri Ummy amesema hayo katika kikao na Taasisi ya Global HOPE iliyoko Texas nchini Marekani katika mkutano wa pembezoni baada ya Mkutano Mkuu wa 77 wa Baraza kuu la Umoja wa Mataifa (UNGA) unaoendelea New York, nchini Marekani.

“Kila mwaka takriban watoto 800 hugundulika kuwa na ugonjwa wa Saratani nchini Tanzania, lakini kama Serikali tumeendelea kuboresha matibabu ya Saratani kwa watoto ili kuokoa maisha yao.” amesema Waziri. Ummy.

Ameendelea kusema kuwa, inakadiriwa kuwa watoto wenye saratani wanaoendelea kuishi zaidi ya miaka miwili kuanzia kugundulika ni kati ya asilimia 20 hadi 40, huku katika nchi zilizoendelea ni zaidi ya asilimia 80, hii ni kutokana na kuchelewa kufanya uchunguzi, kuasi matibabu, gharama za usafiri na malazi, uchache wa vituo vinavyofanya uchunguzi na uhaba wa watumishi wenye ujuzi.

Aidha, Waziri Ummy amemshukuru Mkurugenzi Mkuu wa Taasisi ya Global Hope Dkt. David Poplack Kwa msaada wanaoipatia Serikali ya Tanzania ambapo wanaoendelea kufadhili programu na kuwajengea uwezo watumishi hususan katika fani za ubingwa bobezi wa matibabu ya Saratani na magonjwa ya damu zaidi ya 10, na kutoa vifaa vya uchunguzi katika hospitali ya Muhimbili.

Sambamba na hilo, Waziri Ummy ameiomba Taasisi hiyo kuongeza idadi ya watanzania wanaopatiwa ufadhili wa mafunzo ya utoaji huduma za Saratani Kwa kada za Uuguzi, Madaktari ,Wafamasia na Wataalamu wa maabara.

Kwa upande mwingine, Waziri Ummy amemwomba kujengea uwezo hospitali ya Rufaa ya Kanda ya Mbeya katika kutoa huduma hizo Kwa kujenga na kuipatia vifaa vya kisasa vya huduma za Saratani.

Kwa upanda wake Mkurugenzi Mkuu wa Taasisi ya Global Hope Dkt.Polack alieleza kuwa, Taasisi hiyo ipo tayari kushirikiana na Serikali ya Tanzania kutekeleza miradi mbalimbali ya kuimarisha huduma za Saratani nchini.

Na Mwandishi Wetu,JamhuriMedia,Dodoma

Mtifuano mkali unaotajwa kuwa na viashiria vya kunyemelea madaraka unaendelea ndani ya Mfuko wa Pensheni kwa Watumishi wa Umma (PSSSF), ambapo kundi la wafanyakazi waliohamishwa baada ya mifuko kuunganishwa wamefikisha malalamiko kwenye Baraza la Tume ya Maadili ya Viongozi wa Umma dhidi ya viongozi wakuu wa PSSSF. Mifuko iliyounganishwa kuunda PSSSF ni GEPF, LAPF, PPF na PSPF.

JAMHURI linafahamu kuwa walioshitakiwa mbele ya Baraza ni Mkurugenzi Mkuu, Hosea Kashimba, Mkurugenzi wa Fedha, Beatrice Lupi, Mkurugenzi wa Tehama, Gilbert Chawe na Mkurugenzi wa Manunuzi, Ernest Kasombi. Miongoni mwa tuhuma zilizotolewa dhidi ya viongozi hao ni kutumia madaraka vibaya.

Watoa tuhuma wanadai kuwa viongozi hao wa PSSSF wamejikopesha magari bila kuwapo sera ya mikopo, bila kuwapo bajeti, bila sera hiyo kuidhinishwa na Msajili wa Hazina na Katibu Mkuu Utumishi, huku mfuko huo ukiwa hauna fedha za kutosha kulipa mafao.

Wakurugenzi kukopeshwa magari

Wanadai Mkurugenzi Mkuu Kashimba alinunua gari la ofisi Toyota Land Cruiser VXR Septemba 2020 na Desemba akajikopesha gari kama hilo la binafsi, huku mfuko huo ukiwa na magari mengi na ukiwa hauna fedha za kutosha za kulipa mafao ya wanachama.

Wanasema magari yote waliyokopeshwa wakurugenzi yanafikia karibu Sh milioni 700 na kwamba sera ya kukopesha magari inatumika pale ambapo ofisa hapewi gari la ofisi.

Uchunguzi uliofanywa na JAMHURI umebaini kuwa Bodi ya Wadhamini ya PSSSF ilikutana Novemba 13, 2020 katika Ukumbi wa Mikutano wa Bodi, Ghorofa ya Nne, jengo la PSSSF, Dodoma na kupitia ajenda Na. 5/9/2020 ya kikao hicho waliridhia mkopo wa magari kwa wakurugenzi sita, ambao ni Mkurugenzi Mkuu, Hosea Kashimba; Mkurugenzi wa Huduma za Sheria, Vupe Ligate; Mkurugenzi wa Usimamizi wa Hadhari na Majanga, Ansgar Mushi; Mkurugenzi wa Fedha, Beatrice Lupi; Mkurugenzi wa Tehama, Gilbert Chawe na Mkurugenzi wa Manunuzi, Ernest Kasombi.

Bodi ya Wadhamini ilijiridhisha kuwa kwa Mkurugenzi Mkuu Kashimba, chini ya kifungu cha 4.3.7 cha mkataba wake, anastahili kukopeshwa gari na hata wakurugenzi wa mifuko wengine waliomtangulia nao walikopeshwa magari, hivyo isingeweza kuwa tofauti kwake pekee. Bodi ilifikia uamuzi huo baada ya mashauriano na serikali ikakubalika kuwa itumie Sera ya Mifuko iliyokuwapo awali kabla ya kuvunjwa, ambapo sera hiyo inaendelea kutumiwa na NSSF.

Pamoja na masharti mengine, bodi iliwataka wakurugenzi wanaokopeshwa mikopo hiyo ya magari kukatiwa Bima ya Maisha, kwa maana likitokea la kutokea kabla mhusika hajamaliza kulipa mkopo huo ndani ya miaka mitano, bima ndiyo ilipe mkopo huo.

Pia kwa mujibu wa sera, wakurugenzi hao wanakopeshwa kiasi kisichozidi mishahara yao 24, utaratibu uliotumika kwa wakurugenzi wote waliotangulia.

JAMHURI limebaini kuwa kati ya kundi la wanaoongoza mashambulizi dhidi ya Kashimba na wakurugenzi wenzake, baadhi walikuwa waajiriwa wa mifuko kabla ya kuunganishwa wakahamishiwa vituo vingine vya kazi serikalini, ambao nao wamepata kukopa fedha za magari kwa utaratibu huo huo. “Tena la ajabu kabisa, wakurugenzi wawili walipohamishwa kutoka kwenye mifuko wamegoma kabisa kuendelea kulipa mikopo yao.

Mkopo ule una riba ya asilimia 5, mmoja deni limekua hadi Sh milioni 525 na mwingine limefikia Sh milioni 320.

Soma zaidi hapa (ukurasa wa 3)