Siasa

Katibu mkuu wa Chama cha Mapinduzi (CCM) Daniel Chongolo amesema CCM hakiko tayari kuacha kuhoji na kufuatilia kwa ukaribu miradi mbalimbali ya kimaendeleo na ya kimkakati inayotekelezwa na Serikali.

Chongolo ametoa Kauli hiyo leo Januari 30, 2023 katika Kata ya Dumila, Wilaya ya Kilosa aliposhiriki kikao cha Shina namba 10, ikiwa ni Siku ya tatu ya ziara yake mkoani Morogoro, ambapo pia alipata nafasi ya kusikiliza kero na changamoto mbalimbali za Wananchi kwenye Kata hiyo.

Amesema CCM ndio chama kinachoongoza Serikali ya sasa iliyopo Madarakani,Serikali inayoongozwa na Mwenyekiti wake Rais Dkt. Samia Suluhu Hassan, hivyo ni Jukumu lake kuendelea kuhoji na kufuatilia kwa Sababu ndio kimepewa dhamana ya Kuwaongoza Watanzania.

“Kuna Jamaa Wajanja wanataka tusihoji wala kufuatilia, Sisi lazima tufuatilie, tuhoji na tuambiane ukweli hadi kieleweke kwa Sababu CCM ndio iliyopewa Dhamana na Wananchi ya kuongoza nchi” amesema Chongolo.

Aidha Chongolo amesema Chama cha Mapinduzi (CCM), hakiko tayari kuharibikiwa ndio maana kinapita kwa Wananchi na kila eneo ili kutimiza wajibu wake kwa Watanzania ili kuona kama Ilani yake ya Uchaguzi ya Mwaka 2020-2025 inatekelezwa kikamilifu.

Kwa Upande wake Katibu wa Halmashauri kuu ya CCM Taifa itikadi na Uenezi Sophia Mjema amewataka Viongozi na Watendaji mbalimbali waliopewa dhamana kuhakikisha Wanasikiliza na Kutatua Kero mbalimbali za Wananchi kwenye maeneo yao.

” Kazi yetu kubwa sisi Wanachama wa Chama cha Mapinduzi ni kuendelea kuisimamia Serikali ili iweze kutatua hizo kero ikiwemo kuizungumzia miradi mbalimbali ya maendeleo inayotekelezwa na Serikali ili wananchi waweze kutambua umuhimu wake kwa ajili ya maendeleo ya Taifa” amesisitiza Sophia Mjema.

Katibu Mkuu wa Chama Chama Mapinduzi (CCM), Daniel Chongolo kwa dhamana ya kuwa Mkurugenzi Mkuu wa Uchaguzi wa ndani ya chama unaonendelea huku ukifikia ngazi za mikoa chama na jumuiya, ametangaza kufuta uchaguzi katika baadhi ya maeneo, kusimamisha mchakato wa uchaguzi na kutuma timu za uchunguzi katika maeneo mbalimbali nchini. 

Katibu Mkuu ameyasema hayo leo Jumatatu tarehe 21 Novemba, 2022 katika Ukumbi wa Jakaya Kikwete Convention Jijini Dodoma.

Katibu Mkuu amefuta uchaguzi wa Umoja wa Vijana Mkoa wa Simiyu, kwa kuwepo na tuhuma za rushwa kwa baadhi ya wagombea na timu ya uchunguzi imeshatumwa kulifuatilia hilo kwa kina, na hatua zaidi zitachukuliwa haraka baada ya uchunguzi kukamilika.

Pia, Katibu Mkuu amesimamisha uchaguzi wa nafasi ya mjumbe wa Halmashauri Kuu ya Mkoa wa Mbeya na Arusha kwa sababu za kuwepo kwa tuhuma mbalimbali zikiwepo za rushwa, na sasa uchunguzi unaendelea na hatua zitachukulia.

Aidha, Katibu Mkuu ameeleza kuwa uchaguzi uliofanyika jana tarehe 20 Novemba, 2022 mkoa wa kichama wa Magharibi Zanzibar, kumekuwa na malalamiko kwa kitendo cha baadhi ya wanachama kubeba sanduku la kura na kulipeleka eneo la kuhesabia, hivyo timu ya uchunguzi inafuatilia na ikigundulika jambo hilo halikuwa na nia njema uchaguzi utafutwa na kuchukua hatua zaidi.

Hata hivyo, Katibu Mkuu amewashukuru wanachama wote wa CCM kwa kuendelea na uchaguzi kwa amani na kwa utulivu mkubwa, licha ya kuwepo kwa changamoto ndogo ndogo katika baadhi ya maeneo ambapo Chama kinaendelea kufuatilia kwa karibu na kuchukua hatua kwa haraka.

Na Mwandishi Wetu,JamhuriMedia,Zanzibar

Makamu Mwenyekiti wa Chama Cha Mapinduzi (CCM) Tanzania Bara, Abdulrahman Kinana amewataka viongozi wa vyama vya siasa nchini kumuunga mkono Rais Samia Suluhu Hassan ambaye amedhamiria kuleta maridhiano na mageuzi ya uendeshaji wa siasa nchini.

Kinana ameyasema hayo jana wakati akiufunga mkutano wa pili wa kumuenzi Hayati Maalim Seif Sharif Hamad wenye maudhui ya elimu, ukuzaji vipaji, ubunifu na uwezeshaji, uliofanyika katika ukumbi wa Golden Tulip, kisiwani Unguja.

”Hii sio kazi rahisi kwani ziko changamoto zinazotukabili ikiwa ni pamoja na kutofautiana katika utekelezaji wake, kubishana kuhusu vipaumbele vyake na kuwa na mawazo tofauti kwa namna ya kasi ya utekelezaji wake,” amesema.

Kinana aliwataka wanasiasa nchini kuendeleza utamaduni wa kuzungumza, kushauriana na kila mmoja kuheshimu mawazo ya mwenzake licha ya tofauti za kimtazamo na kimkakati.

Amesema Rais Samia ana lengo la kusimamia haki, kukuza na kuimarisha uhuru, kupanua wigo wa kuendesha shughuli za kisiasa na kuleta mageuzi katika uendeshaji wa serikali kwa madhumuni ya kuharakisha maendeleo ya nchi na watu wake.

Pia, Kinana amesema wanasiasa wote kwa pamoja wanapaswa kukubaliana kuhusu mambo muhimu yanayofanywa na Rais Samia kutokana na umuhimu wake kwa nchi na mustakabali wa taifa.

Amesema katika kudhihirisha utayari wake katika kuleta mageuzi ya kweli ya kisiasa nchini, mwaka jana Rais Samia alikuwa mgeni rasmi katika ufunguzi wa kumbukumbu ya Maalim Seif ambapo Rais wa Zanzibar Dk. Mwinyi na Rais Mstaafu Amani Karume walikuwa wageni mashuhuri katika mkutano huo.

Amesema viongozi hao watatu ni viongozi wakuu ndani ya chama hatua ambayo siyo ya kiitifaki bali ni tafsiri ya dhamira ya kweli ya kujenga mazingira mapya ya kisiasa na kijamii nchini.

Akimzungumzia Maalim Seif, Kinana amesema ni kiongozi aliyekuwa na sifa nyingi nzuri zinazomfanya kuwa mtu mwenye maono, msimamo, subira, mpenda haki, mwanamapinduzi na mwenye ushawishi.

Amesema Maalim alipenda kuona vijana wanapata elimu bora iliyolingana na mahitaji ya wakati na yenye kuwajenga vijana kudadisi, kujituma, kujitegemea na kuwa wazalendo kwa nchi yao.

Aidha,ameamini kwa dhati kuwa elimu ndiyo mkombozi wa kweli kwa mwanadamu ndio maana elimu yake ya msingi na ya juu aliipata kwa kujituma bila kukata tamaa.

Kwa mujibu wa Kinana, ndiyo maana viongozi wa wakati huo waliona na kuthamini kiu ya Maalim Seif jambo lililofanya apewe nafasi ya kuongoza Wizara ya Elimu akiwa na umri mdogo.

“Jukumu hilo lilikuwa zito kwa kuwa fursa za elimu zilikuwa ndogo na hafifu, kwa ujasiri mkubwa na kwa hatua za kuthubutu alijitwisha dhamana ya kufanya kazi aliyopewa kwa ustadi, hasama na ari kubwa,” amesema.

Ameeleza kuwa, kutokana na juhudi zake vijana wengi wa Zanzibar walipata nafasi za elimu ndani na nje ya nchi, ambapo Maalim aliamini katika elimu, nafasi ya elimu na fursa zinazotolewa na elimu katika maisha ya binadamu na uhai wa taifa.

Ameeleza kuwa, kwa kutambua hayo yote,Tanzania iko katika mchakato wa kutazama upya sera na mfumo wa elimu kwa lengo la kuboresha elimu ili elimu wanayopatiwa watoto ilenge kujenga, kujitegemea na kuendana na mabadiliko na mahitaji ya dunia ya sasa.

Amesema mada zilizojadiliwa katika mkutano huo zimejadili umuhimu wa elimu, sera na namna inavyotakiwa kuikomboa jamii na kuharakisha maendeleo yao hususan katika zama hizi za utandawazi na maendeleo ya teknolojia.

Na Mwandishi Wetu,JamhuriMedia

Mfanyabiashara na mbunge wa zamani wa Jimbo la Igunga mkoani, Tabora Rostam Aziz,amesema kuwa elimu na ujuzi itasaidia kujenga mitaji wa umma wa ndani ili kuwezesha wananchi wa Rais wa Tanzania na Rais Zanzibar na wananchi kufaidika na juhudi zinazofanywa na marais hao katika kuchochea mitaji kutoka nje.

Hayo yamebainishwa wakati wa mkutano wa kumuenzi aliyekuwa Makamu wa Kwanza wa Rais wa Zanzibar, Maalim Seif Sharif Hamad ulioandaliwa na Maalim Seif Foundation uliofanyika mjini Unguja Rostam ambapo alikuwa akizungumzia mada ya ‘elimu kama msingi wa kukuza uchumi na kuzalisha utajiri wa Taifa.’

Amesema kuwa mitaji kutoka nje ni kichochea cha ukuaji uchumi kwani mitaji hii inaziba la uwezo mdogo wa kuweka akiba tuliyo nayo hivi sasa.

“Uwiano wa uwekaji akiba wa pato wa taifa hapa Tanzania ni wa kiwango cha chini sana yaani ni chini ya asilimia 15 wakati wa uchumi wentu ili tupige hatua tunahitaji angalau kuwa na uwiano wa asilimia 30,” amesema.

Rostam amesema kuwa tangu kuingia madarakani kwa Rais Samia Suluhu Hassan na Rais Dkt.Hussein Ally Mwinyi kumekuwa na juhudi kubwa zinazofanywa na marais hao katika kuchochea maendeleo.

Amesema kuwa elimu na ujuzi zitasaidia kujenga mtaji wa umma wa ndani ili kuwezesha wananchi wa Tanzania na Zanzibar kufaidika kwa pamoja katika juhudi zinazofanywa na marais hao.

Amesema kuwa tangu kuingia madarakani kwa viongozi hao Rais Samia na rais Mwinyi wamekuwa mstawi wa mbele kushawisihi mitaji kuingia nchini ambapo katika kipindi cha mwaka mmkoja tangu Machi 2021 hadi Machi 2022 mtaji kutoka nje uliongia nchini uliongeza kwa asilimia 300 kutoka bilioni 1.3 na kufikia bilioni 4.14 za kimarekani.

“Kama alivyosema Rais Samia Suluhu Hassan katika mazungumzo yake na Rais William Ruto wa Kenya hivi karibuni, tusipoimarisha uwezo wa watu wetu kushiriki katika uchumi, tutajikuta tunagawana umasikini badala ya kugawana utajiri,” amesema

Amesema kuwa kwa kulitambua hilo, ndiyo maana Rais Samia amejitoa na kujipambanua kuwa mkombozi halisi wa wanyonge na masikini wananchi hii, kwa tafsiri sahihi ya neno hili.

“Mtetezi au mkombozi wa wanyonge si anayepiga piga kelele kusema bali ni yule anayewapa vituo vya afya, kuwajengea shule, kuwajengea masoko, kuwafungulia fursa za biashara na ujasiriamali na kuifungua Tanzania kimataifa ili kuongeza fursa kwa Watanzania.

“Unaiona dhamira yake hasa ya kuwafanya Watanzania wawe wachezaji, na siyo watazamaji tu wa maendeleo ya wengine. Anataka kuona Watanzania kuwa washiriki na siyo waimba mapambio,” amesema Rostam.

Katika kumuenzi Maalim Seif amesema kuwa ni muhimu sana kuwekeza nguvu kubwa katika ubora wa elimu ili kuwaandaa Wazanzibari kwa uchumi ambao yeye Maalim Seif akiamini unapaswa kufikiwa ambao ni wa kuifanya Zanzibar kuwa Singapore ya Afrika Kituo cha Biashara na Huduma katika Afrika Mashariki na Bahari ya Hindi.

Amesema kuwa kwa kuwa Dira ya Maalim Seif na Wazanzibari wengi ni Zanzibar kuwa Singapore ya Afrika, ni vyema kutazama namna nchi hiyo ilivyoweka nguvu kwenye elimu katika maendeleo yake. Waziri Tharman Shanmugaratnam wa Singapore amenukuliwa katika Kitabu cha The Asian Aspiration akisema “Elimu ndio mkakati wetu muhimu zaidi kiuchumi na kijamii.

Rostam amesema kuwa Maalim Seif, katika uongozi na dira yake, alisisitiza sana umuhimu wa kujenga uwezo wa kielimu kwa Wazanzibari ili kuweza kukabili changamoto za maisha yao, kuleta maendeleo yao na kutenegeneza utajiri katika nchi yao.

“Alikuwa na ndoto ya kuifikisha Zanzibar mahala pakubwa kiuchumi na katika maendeleo ya jamii kwenye eneo letu la ukanda wa Afrika Mashariki na katika Dunia. Kutengeneza ndoto kwa unaowaongoza, na kuwapa hamasa na imani ya kuweza kuifikia ndoto hiyo, ni wajibu mkubwa wa kiuongozi lakini sio viongozi wote wana uwezo huo” amesema.

Amesema kuwa Maalim Seif alitaka kujenga Zanzibar yenye watu wenye elimu na maarifa ya kutosha kuendesha uchumi ambao unatoa huduma kwa eneo lote la Afrika Mashariki, Maziwa Makuu na Bahari ya Hindi.
“Kuiishi dira yake, tunapaswa kujielekeza huko. Hiyo ndio namna bora kabisa ya kumuenzi Mzee wetu huyu.

“Watoto wetu wapate elimu, vijana wetu wapate ajira, mama zetu waweze kuishi maisha bora bila ya kuhangaika na kuteseka na wajasiriamali wetu waweze kutajirika na kutengeneza mitaji ya kuwekeza zaidi,” amesema.

Na Mussa Augustine,JamhuriMedia

Katibu Mku wa Chama Cha Mapinduzi (CCM), Daniel Chongolo amewataka makatibu wa chama hicho kuanzia ngazi ya tawi hadi mkoa kuhakikisha wanasimamia vizuri mali za chama ili kukifanya chama hicho kuwa na maendeleo endelevu.

Chongolo ametoa agizo hilo leo Oktoba 22,2022, wakati wa uwekaji wa majiwe ya msingi katika ujenzi wa ofisi ya CCM Wilaya ya Kigamboni pamoja na nyumba ya kuishi Katibu wa CCM Mkoa wa Dar es Salaam inayojengwa wilayani humo.

Amesema kwamba maafisa masuhuli wa chama pamoja na makatibu wanawajibu wakuhakikisha mali za chama zinakua salama hivyo kila mmoja anapaswa kuwajibika kulingana na majukumu yake kwenye nafasi aliyo nayo.

Pia amesema chama kitawachukulia hatua za kisheria wale wote ambao watahusika katika kuhujumu mali za chama kwani chama hicho kina malengo makubwa ya kuwa na miradi mikubwa ambayo itasaidia kukifanya kiwe imara kiuchumi na sio kutegemea wanachama wake kukichangia.

Katibu huyo wa CCM Taifa amesema kuwa kila kiongozi wa chama hususani makatibu ambao ndio watendaji wakuu watapimwa kwa vigezo ambavyo vinaendana na uwajibikaji wao nakwamba ambaye ataonekana kwenda kinyume na misingi ya chama atawajibishwa.

“Dhamana yakuwa katibu sio dhamana bali kuna uwajibikaji nyuma yake,makatibu wote kuanzia ngazi ya tawi,kata,Ward,Wilaya,na Mkoa mimi ndio kiongozi wenu hivyo nawasihi mlinde mali za chama,na moja ya kigezo ambacho kitatumika kuwapima kwenye utendaji wenu ni utekelezaji wa yale yaliyoelekezwa kwenye sehemu ya nafasi yenu ya kazi”amesema.

Katika hatua nyingine Chongolo amesema kuwa kumekuwa na tabia ya baadhi ya wanachama ambao wanatumia rushwa kwa ajili ya kupata uongozi hivyo CCM haitafumbiwa macho nakwamba watakaobainika watachukuliwa hatua kali za kisheria.

Kauli hiyo ya Chongolo imekuja kutokana na hivi karibu uchaguzi wa viongozi ngazi ya wilaya ndani ya chama CCM uligubikwa na vitendo vya rushwa hadi kufikia uamuzi wa baadhi ya uchaguzi katika wilaya zipatazo 21 kufutwa na kurudiwa upya.

“Bado tuna changamoto ya rushwa kwenye chaguzi zetu ndani ya chama,tumemaliza uchaguzi ngazi ya wilaya macho yetu kwa sasa ni uchaguzi wa viongozi ngazi ya mkoa,macho yetu yapo wazi hatutasita kumchukulia hatua mgombea yeyote atakayebainika kutumia rushwa ili apate uongozi”amesema Chongolo.

Amesema kuwa CCM kina watu wasomi,wazuri,viongozi wenye mapenzi ya dhati na chama lakini tatizo ni baadhi yao kutengeneza miundombinu ya haramu ikiwemo rushwa ili kuwadhibiti wasipate dhamana yakuwa viongozi.

Awali akizungumza Mwenyekiti wa CCM Mkoa wa Dar es salaam Mama Kate Kamba alisema kuwa mkoa wa Dar es salaam upo salama kutokana na ushirikiano wa viongozi wa chama uliopo nakwamba viongozi hao watashirikiana ili kutekeleza vyenma ilani ya chama cha mapinduzi katika kuwaletea wananchi maendeleo.

Naye Katibu Chama Cha Mapinduzi(CCM), Mkoa wa Dar es Salaam Adam Ngalawa, amesema kuwa ujenzi wa ofisi ya CCM Wilaya ya Kigamboni unagharimu kiasi cha shilingi milioni 28.1 lakini mpaka sasa kiasi kilichotumika ni shilingi milioni 19.7 hivyo kiasi kinachohitajika ili kukamilisha ujenzi huo ni shilingi milioni 9.5 hata hivyo ofisi ya Katibu Mkuu CCM Taifa tayari imechangia shilingi milioni 5 hadi sasa.

Amesema kuwa ujenzi wa nyumba hiyo tayari umefikia hatua ya umaliziaji na kwamba ujenzi umeanza Juni mwaka huu na unatarajiwa kukamilika Desemba mwaka huu.

Hata hivyo baadhi ya viongozi na wadau mbalimbali wameahidi kuendelea kuchangia ujenzi huo ili kuweza kufanikisha kukamilisha haraka miradi hiyo.