Biashara

Na Mwandishi Wetu, JamhuriMedia, Pwani

Benki ya NMB imekabidhi msaada wa viti 100 na meza 100 vyenye thamani ya Sh. Mil. 15, kwa matumizi ya wanafunzi wa Shule za Sekondari Kidawendui na Jibondo, zilizoko Mafia mkoani Pwani, vifaa vilivyopokelewa na Mkuu wa Wilaya hiyo, Zephania Sumaye, kutoka kwa Mkaguzi Mkuu wa Ndani wa benki hiyo, Benedicto Baragomwa.

Hafla ya makabidhiano hayo imefanyika katika viwanja vya Shule ya Kidawendui (zamani ikiitwa Ndagoni Sekondari), ambako DC Zephania aliipongeza NMB na kuitaja kama moja ya silaha za Serikali katika vita ya kupambana na maadui watatu waliotajwa na Baba wa Taifa, Mwalimu Julius Nyerere, ambao ni Ujinga, Maradhi na Umaskini.

Akizungumza katika hafla hiyo, DC Zephania alisema NMB imeisaidia pakubwa Serikali, katika vita dhidi ya maadui hao, kupitia Program ya Uwajibikaji kwa Jamii (CSR) katika Sekta za Elimu na Afya, ilikojikita kutatua changamoto mbalimbali za kimiundombinu, vifaa vya kujifunzia, vya kufundishia pamoja na vifaa tiba katika shule, zahanati, vituo vya afya na hospitali.

“Wakati wa uhai wake, Baba wa Taifa Mwalimu Julius Nyerere aliwataja maadui watatu wa maendeleo ya Watanzania kuwa ni Ujinga, Maradhi na Umaskini, na sasa hivi NMB imekuwa mdau, mbia sahihi na silaha yetu kuu katika kutusaidia kupambana na maadui hao.

“Kupitia sera ya Uwajibikaji kwa Jamii, NMB inatumia sehemu ya faida yao kila mwaka kusaidia jitihada za Serikali kupambana na maadui hao kupitia misaada yao hii katika elimu na afya, kwani kuboresha mazingira ya walimu kusomesha kirahisi na kutatua kero za kujifunzia miongoni mwa wanafunzi, nako ni kupambana na ujinga.

“Kwenye afya nako NMB imejikita kusaidia maboresho ya miundombinu ya zahanati zetu, Vituo vya Afya na Hospitali, ambako imesaidia kuanzia ujenzi na hata vifaa tiba. Hii nayo pia ni kusaidia kupambana na adui maradhi. Serikali tunatambua na kuthamini mchango wenu na tunaomba muendelee na sapoti hizo,” alifafanua Zephania.

Alizitaka taasisi mbalimbali nchini kufuata nyayo za NMB katika kusaidia utatuzi wa changamoto za kijamii, huku akiwataka wanafunzi na walimu wa Shule za Kidawendui na Jibondo kutunza viti na meza hizo, ambayo ni mbinu sahihi ya kuvutia taasisi zaidi kujitoa kusaidia kutatua kero nyingi zilizopo, ambazo dawa ya kuzimaliza ni pamoja na utunzaji wa misaada inayowafikia.

Akimtangulia DC Zephania, Baragomwa alisema elimu na afya ni sekta za kipaumbele kwa benki yake, ambayo imebadili Programu ya Uwajibikaji kwa Jamii (CSR) na kuwa Programu ya Uwekezaji kwa Jamii (CSI), lengo likiwa ni kupanua wigo wa kuihudumia jamii katika nyanja hizo pamoja na utunzaji wa mazingira.

“Hizo ni sekta za kipaumbele kwetu, kwani ndio mhimili wa maendeleo ya Taifa lolote duniani. Tunatambua juhudi za Serikali ya Rais Samia Suluhu Hassan katika kusimamia upatikanaji wa elimu bora mijini na vijijini, nasi hatuna budi kuipongeza kwa hilo na tukiwa wadau muhimu, tunao wajibu wa kuunga mkono juhudi za kusaidia jamii ambayo imeifanya NMB kuwa benki kubwa kuliko zote nchini.

“Tulipopata maombi ya kuchangia maendeleo na ustawi wa elimu wilayani Mafia tulifarijika na mara moja tukachagua kuja kushirikiana nanyi na leo tuko hapa kukabidhi meza 50 na viti 50 kwa Sekondari ya Kidawendui vyenye thamani ya Sh. Mil. 7.5, na pia meza 50 na viti 50 kwa Shule ya Sekondari Jibondo vyenye thamani sawa na hiyo. Hii inamaanisha kwa ujumla msaada kwa shule hizi una thamani ya Sh. Milioni 15,” alisema Baragomwa.

Naye Mkurugenzi Mtendaji wa Wilaya ya Mafia (DED), Kassim Ndumbo, alikiri kuwa changamoto katika sekta ya elimu ni nyingi na kwamba Serikali pekee haiwezi kuzimaliza bila nguvu za wadau kama NMB, na kuongeza shule za sekondari katika wilaya yake zina uhitaji wa viti na meza 4,332, vilivyopo ni 3,464, huku shule za msingi zikiwa na upungufu wa madawati 1,000 kwani uhitaji ni madawati 6,000 na yaliyopo ni 5,000 tu.

Kabla ya hafla hiyo, msafara wa NMB ulitembelea Ofisi za DC na DED, ambako Baragomwa alimtambulisha Meneja mpya wa NMB Kanda ya Dar es Salaam na Pwani, Dismas Prosper, ambapo DC Zephania aliitaka NMB kushirikiana na serikali yake kutangaza vivutio vya utalii na fursa za uwekezaji zilizopo Mafia. Dismas alimshukuru DC na kumtaka kuitegemea benki yake katika mipango ya kimaendeleo iliyonayo.

Na Mwandishi Wetu, JamhuriMedia, Dar

Benki ya NMB mwishoni mwa wiki ilikabidhi madawati, viti na meza zenye thamani ya shilingi milioni 41.2 kwa shule sita zilizopo wilaya ya Ilala, mkoani Dar es Salaam ikiwa ni sehemu ya utekelezaji wa dhamira ya benki hiyo wa muda mrefu ya kusaidia maendeleo ya sekta ya elimu.

Shule zilizonufaika na msaada huo ni pamoja na Shule ya Msingi Juhudi iliyopokea meza 100 na madawati 100 yenye thamani ya shilingi milioni 10, Shule ya Msingi Juhudi Jeshini iliyopokea madawati 100 yenye thamani ya shilingi milioni 10, Shule ya Msingi Amani iliyopokea madawati 60 yenye thamani ya shilingi milioni 6.

Pia shule ya Msingi Jaica iliyopo Mzambarauni ambayo ilipokea madawati 42 yenye thamani ya shilingi milioni 4.2, Shule ya Msingi Zavalla iliyopokea meza 25 na viti 25 vyenye thamani ya shilingi milioni 6 na Shule ya Msingi Umoja iliyopokea madawati 50 yenye thamani ya shilingi milioni 5.

Akizungumza katika hafla ya makabidhiano hayo iliyofanyika katika Shule ya Msingi Juhudi, Seka Urio Kaimu Meneja wa Benki ya NMB Kanda ya Dar es Salaam alisema kitendo hicho kinaendana na mkakati wa benki hiyo wa kuchangia maendeleo hasa kwa jaamii ambapo benki hiyo inafanya kazi zake.

“Sisi kama benki ya NMB tumejitolea kweli kuunga mkono mipango mbalimbali ya maendeleo nchini kote. Ili kuthibitisha tena dhamira yetu, tumetenga shilingi bilioni 6.2 mwaka huu ambazo zitatumika kuchangia maendeleo ya jamii yaani CSR kote nchini katika sekta zetu za kipaumbele ikiwa ni pamoja na elimu, afya na dharura,” alisema.

Urio alibainisha kuwa madawati yaliyotolewa na benki hiyo yanalenga kuweka mazingira mazuri ya kujisomea kwa wanafunzi wa shule tano za wilaya ya Ilala.

“Leo, tunakabidhi madawati, viti na meza zenye thamani shilingi milioni 41.2 ili kupunguza upungufu wa madawati na kuhakikisha wanafunzi wanajifunza katika mazingira mazuri na rafiki. Ninaomba shule zinazonufaika zitumie vitu vilivyotolewa kwa manufaa ya vizazi vijavyo,” alisema.

Awali,Neema Msolo Mwalimu Mkuu wa Shule ya Msingi Juhudi katika hotuba yake iliyosomwa wakati wa makabidhiano hayo alibainisha kuwa msaada huo umekuja wakati muafaka kwani shule yake imekuwa ikikabiliwa na changamoto mbalimbali ikiwemo upungufu mkubwa wa madawati.

Kwa upande wake Mkuu wa Wilaya ya Ilala Edward Mpogolo ambaye alikuwa mgeni rasmi katika hafla hiyo alisema mchango wa benki hiyo unadhihirisha uhusiano mzuri na wenye afya kati ya serikali na sekta binafsi.

Mpongolo alisema serikali yake inatambua kuwa elimu ni chachu ya maendeleo ndiyo maana imekuwa ikiwekeza kwa kiasi kikubwa katika maendeleo ya sekta ya elimu na kuipongeza benki hiyo kwa kuendelea kusaidia kuchangia mipango mbalimbali ya maendeleo inayofanywa na Serikali huku akiongeza kuwa Serikali ya awamu ya sita chini ya Rais, Dk Samia Suluhu Hassan amejipanga kuendelea kufanya kazi kwa karibu sana na sekta binafsi.

“Ili kikuza sekta ya elimu, Serikali tayari imeweka miundombinu wezeshi ya majengo, inatia moyo kuona wadau wa maendeleo kama baenki ya NMB wamajitokeza kuunga mkono juhudi zetu kwa kuchangia madawati,” amesema Mpongolo.

Serikali imezugumzia malalamiko ya watumiaji wa bidhaa ya Saruji aina ya Hauxin inayozalishwa na kiwanda cha Maweni Limestone Limited kilichopo Mkoani Tanga kuhusu upungufu wa uzito wa bidhaa hiyo.

Naibu Waziri wa uwekezaji,viwanda na biashara Exaud Kigahe (Mb) ameyabainisha hayo leo jijini Dodoma wakati akieleza mwenendo wa bei za bidhaa muhimu nchini kwa April,2023 ambapo amesema kuwa kwa mujibu wa kifungu namba 41 (a) na (b) cha sheria ya vipimo, sura ya 340 kinatoa katazo kwa mtu yeyote kuuza bidhaa yoyote iliyo chini ya uzito, kipimo au namba kama inavyohitajika kwa mujibu wa sheria.

Naibu Waziri Kigahe amesema sheria hiyo pia inatoa katazo kwa yeyote katika ufanyaji biashara kutoa taarifa za uongo juu ya bidhaa yoyote kuhusu uzito, kipimo, namba, geji au kiwango na endapo makosa hayo yatafayika wote watakuwa wametenda kosa kwa mujibu wa sheria.

Kwa upande wa mweye duka anajukumu la kuhakiki kila bidhaa anayouza kabla ya kumuuzia mlaji wa mwisho na kujiridhisha kuwa bidhaa husika ipo katika hali inayotakiwa kulingana na matakwa ya sheria.

Kigahe amesema sheria hiyo ya vipimo sura ya 340 inatoa adhabu mbili kwa mtu ambaye atakuwa ametenda makosa hayo endapo atakuwa amekiri kosa sheria inampa mamlaka Kamishina wa Wakala wa vipimo kufifisha kosa (compounding of offences) na kumtoza faini ya kiasi kisichopungua shilingi laki moja na kisichozidi milioni ishirini na hiyo ni kwa mujibu wa kifungu cha 46 cha sheria ya vipimo.

Aidha Kigahe amesema sheria hiyo imetoa adhabu ya jumla kwa yeyote ambaye atakuwa ametenda kosa chini ya sheria na ni mkosaji wa mara ya kwanza akitiwa hatiani mahakamani basi atawajibika kulipa faini kiasi kisichopungua laki tatu na kisichozidi milioni hamsini au kifungo kisichozidi miaka miwili au vyote kwa pamoja na endapo ni mara yake ya pili akitiwa hatiani atawajibika kulipa faini isiyopungua kiasi cha shilingi laki tano na isiyozidi milioni mia moja au kifungo kisichopungua miaka mitano au vyote kwa pamoja.

Hata hivo Naibu Waziri huyo amesema baada ya mweye duka kukiri kosa, amechukuliwa hatua za kisheria kwa kufifilishwa kosa kama iliyoelezwa kwa mujibu wa sheria ikiwa ni pamoja na kulipa faini na kupewa maelekezo mengine ikiwemo kufanya marekebisho ya mapungufu yaliyojitokeza.

Kigahe ametoa wito kwa wazalishaji wa bidhaa zote za viwandani kuongeze jitihada za uzalishaji wa bidhaa Kwa ubora unaohitajika sokoni na Kwa kufuata sheria, kanuni na taratibu zilizowekwa ili kukabiliana na mfumuko wa bei na bidhaa mbalimbali.

Kampeni ya kuhamasisha matumizi ya NMB mastercard na QR Code ‘Lipa Mkononi’ iitwayo NMB MastaBata ‘Kote Kote’, imefikia ukomo kwa wateja 7 na wenza wao kujishindia safari ya Dubai kwa siku nne inayogharamiwa kila kitu na Benki ya NMB.

Kampeni hii imeendeshwa kwa miezi mitatu na kutoa zawadi mbalimbali zenye thamani ya zaidi ya Sh. Mil. 350 kwa washindi.

Akizungumza katika droo hiyo ya fainali Afisa Mkuu wa Wateja Binafsi na Biashara wa Benki ya NMB – Filbert Mponzi aliwataja washindi hao kua ni: Upendo Yohana Msanjila (Dar), Edwin Sett Mwakabage (Kilimanjaro), Benigna Xaveria Hyera (Dar), Nazia Abdulsatar Lakha (Dar), John Wayne Lubisha (Dodoma), Chintan Chandrakant Kamania (Dar) na Qamara Rose Aloyce (Arusha)

Kampeni ya NMB MastaBata ‘Kote Kote’ msimu wa nne ilizinduliwa Oktoba 28 mwaka jana ili kuchagiza matumizi yasiyohusisha pesa taslimu ‘cashless’

Kabla ya ‘grand finale’ hiyo, jumla ya washindi 750 walishinda pesa kiasi cha Sh.100,000 kila mmoja, wengine 98 wakizawadiwa Sh. Mil. 1 kila mmoja, huku washindi 12 wakitwaa bodaboda moja moja zenye thamani ya Sh. Mil. 3 kwa kila moja na washindi wengine wanne wakijishindia safari ya Zanzibar kuhudhuria Tamasha la NMB Full Moon Party.

Kampeni hiyo imekuwa ya mafanikio makubwa kwa kufanikiwa kubadili tamaduni za matumizi ya kadi na QR Code ambayo ni salama, rahisi na nafuu zaidi.