Jamhuri

Jukwaa la Wahariri Tanzania (TEF) limepokea kwa mshituko na masikitiko makubwa kauli ya Serikali kupitia kwa Mkurugenzi wa Idara ya Habari (MAELEZO) na Msemaji Mkuu wa Serikali, Gerson Msigwa kuwa Muswada wa Marekebisho ya Sheria ya Huduma za Habari (MSA 2016) umeshindikana kuingizwa bungeni kutokana na ripoti nyingi za Kamati za Kisekta za Bunge.

TEF inaona sababu iliyotolewa ni nyepesi na inapata wasiwasi iwapo kuna utashi wa kufanya mabadiliko katika sheria hii. Katika vikao vilivyotangulia, tumeuona ugumu kutoka kwa baadhi ya maofisa wastaafu walioazimwa na Mamlaka ya Mawasiliano Tanzania (TCRA), maafisa kutoka
Ofisi ya Mwanasheria Mkuu, na baadhi ya vyombo vya ulinzi na usalama wakionesha wazi kutokuwa na nia ya kurekebisha sheria hii.

Mara kadhaa vikao tulivyofanya, viliisha bila mwafaka katika vifungu mbalimbali ikiwamo Mamlaka ya Mkurugenzi wa Idara ya Habari (MAELEZO) chini ya vifungu vya 9 na 10, ambavyo vinampa mamlaka ya kuwa mlalamikaji, mwendesha mashitaka, mtoa hukumu na msimamizi wa utekelezaji wa hukumu; suala tunalosema ni ukiukwaji wa Utawala Bora na Utawala wa Sheria.

Taaluma nyingine nchini, mabaraza yake au bodi zake ndizo zinazofanya kazi hii, ila maafisa hawa wachache, wanang’ang’ania sekta ya habari madaraka haya yawe katika mikono ya mtu mmoja; Mkurugenzi wa Idara ya Habari (MAELEZO), suala tunalosema halikubaliki.

Ilituchukua hadi kikao cha Novemba 21, 2022 Waziri wa Habari, Mawasiliano na Teknolojia ya Habari, Nape Nnauye alipolazimika kusimamia kikao hicho ndipo maafisa hao watatu wakakubali kwa shingo upande kusema watarekebisha vifungu hivyo ili viendane na viwango vya kimataifa.

Kinachotushangaza, baadhi ya vifungu wanavyoving’ang’ania kama kashfa kugezwa jinai, tayari vimefutwa kwenye sheria mama ya Kanuni ya Adhabu Sura ya 16.

Tumekuwa na mawasiliano mazuri na Waziri Nape; Mwanasheria Mkuu wa Serikali, Jaji Dk. Eliezer Feleshi; Mwandishi Mkuu wa Sheria wa Serikali, Onorius Njole; na Ofisi ya Bunge, ila maafisa wachache wa chini ndiyo kwa muda mrefu wamekwamisha mabadiliko ya sheria hii.

Mwanzo tuliahidiwa muswada wa mabadiliko ungeingizwa bungeni mwaka 2022 katika vikao vya Februari,wakasema Aprili, baadaye Septemba, ikasogezwa Novemba, lakini kote huko hakuna kilichotekelezwa.

Zamu hii tuliweka matumaini makubwa na hasa baada ya Waziri Nape kutangaza hadharani kuwa amewasilisha mapendekezo ofisini kwa Mwanasheria Mkuu wa Serikali na kuwa Februari hii muswada huu ungeingizwa bungeni.

Kwa namna ya ajabu, muswada huu umeshindikana kuingia bungeni tena (Februari, 2023). Tunajiuliza kama taarifa za kamati zimezuia muswada kuingia bungeni, je, muswada huu utapataje nafasi kwenye mkutano ujao wa Aprili, 2023? Je, itawezekana vipi katikati ya hotuba za Bunge la Bajeti la mwaka 2023/2024?

Suala la kubadili sheria hii limekaa muda mrefu. Sisi tunapodai Uhuru wa Habari si kwa sababu ya wanahabari pekee, hapana. Uhuru huu ni wa Watanzania wote kutoa maoni yao; na kwa kufanya hivyo tunakuza demokrasia nchini na kuongeza uwajibikaji.

Ni kawaida watu wenye shaka na watendayo, huwa hawataki mambo yao yafahamike mbele ya jamii, hivyo njia pekee na rahisi ni kukandamiza vyombo vya habari visiwe huru kusema ukweli bila upendeleo wala uonevu.

Kwa kuwa Juni 28, 2021 Rais Samia Suluhu Hassan alielekeza TEF na wadau tukakae na Wizara inayosimamia habari tuzungumze jinsi ya kubadili sheria hii ili ikidhi viwango vya kimataifa; na kwa kuwa alisema tukikwama sehemu yoyote au tukashindwa kuelewana tusisite kurudi kwake, basi tunaomba Mhe. Rais Samia atupe nafasi ya kukutana naye tumweleze wapi tumekwama na
wanaokwamisha ni kina nani, pengine akiwauliza yeye watampa majibu ya msingi kuliko tunavyoshuhudia wakitupuuza sisi kwenye vikao.

Jukwaa la Wahariri na Wadau, kwa kuona kazi kubwa anayoifanya Rais Samia ya kurejesha uhuru katika sehemu mbalimbali nchini ikiwamo kufungulia magazeti ya Mwanahalisi, Mseto, Tanzania Daima na Mawio, kurejesha Bunge Live, kushusha bei za leseni za TV na Radio, tuliamini njia ya diplomasia ingetufikisha katika nchi ya ahadi, ila tunaona baadhi ya maafisa hawako tayari kuona uhuru wa habari ukirejea nchini.Tunaomba Rais Samia anusuru hali hii.

Hatujafurahishwa na danadana tunazopigwa katika suala la mabadiliko ya Sheria ya Huduma za Habari (MSA, 2016).Tunaomba tukutane na Mhe. Rais Samia, tukiamini mkutano huo utatukwamua tulipokwama.

Mungu ibariki Tanzania.

Na Mwamvua Mwinyi,JamhuriMedia,Pwani

Mkuu wa Mkoa wa Pwani,Abubakari Kunenge amekemea vikali vitendo vya ukatili vinavyoendelea kushamiri ndani ya mkoa huo baada ya Neema John , kulazwa katika Hospitali ya Rufaa ya Mkoa ya Tumbi baada ya kufanyiwa ukatili na mumewe kwa kupigwa na fimbo sehemu mbalimbali za mwili wake kisha kumwagiwa maji ya moto na kukimbia kusikojulikana.

Akielezea tukio hilo,Kunenge amesema kuwa tangu kufanyika kwa kitendo hicho ni siku ya 10 ambapo mtuhumiwa alikimbia na kumwacha mkewe akiwa na majeraha makubwa yaliyotokana na kipigo hicho huku akimwacha na watoto wanne akiwemo mtoto mchanga wa siku 26.

Kutokana na ukatili huyo, RC Kunenge ameitaka Ofisi ya Ustawi wa Jamii Mkoa wa Pwani kulibeba suala hilo na kumsaidia mwanamke huyo hadi atakapopona.

“Vitendo hivi ni vya hovyo kabisa, huu ni sawa na uuaji kwani kumpiga mkeo namna hii,ni kwamba amedhamiria kumuua, vyombo vya sheria vimsake na kumchukulia hatua kali ili fundisho kwa wengine” amesema.

Ametoa rai kwa wanawake na jamii kwa ujumla kuacha kuficha viashiria vya matendo ya ukatili kwani vinachangia vifo na hata ulemavu.

Kunenge amewataka viongozi wa dini, Serikali,kijamii, vyama vya siasa, kuendelea kutoa elimu kwa jamii, kuhusiana na kuacha vitendo hivi vya kikatili ambavyo haviendani na sera, sheria,kanuni na mila na hata desturi za nchi yetu.

Hata hivyo amewaasa watendaji wa ustawi wa jamii pamoja na mkoa kuacha kukalia taarifa za aina hiyo, wazitoe kwa wakati pasipo kuficha ili ofisi yake izifanyiwe kazi.

“Haiwezekani vitendo hivi vinatokea, taarifa mnazipata mitandaoni,mtu anapelekwa Kituo Cha afya Mlandizi,Tumbi, Serikali hamjui,mnasubiri kutumiwa picha mitandaoni, haiwezekani, mnasubiri mkuu wa mkoa ndio nifuatilie wajibu wenu.

“Mimi nitashughulikia mambo mangapi,kwa hili nitawashughulikia na kuwajibisha wale wote waliohusika kwa namna moja au nyingine”Inakera yaani RC nitoke ndio nishughulikie wajibu wenu, na atakayebainika kuhusika kuzembea nitamwajibisha kwa hili,”amesema Kunenge.

Kamanda wa Jeshi la Polisi mkoani Pwani Pius Lutumo amekiri kuwepo kwa tukio hilo na kusema bado mhusika hajapatikana ,Jeshi la Polisi linaendelea na msako.

“Ujue hawa wafugaji huwa wanatabia ya kufanya tukio na kukimbilia maporini ,lakini licha ya hilo tupo kazini na tutahakikisha tunamkamata “amesisitiza Lutumo.

Lutumo ameitaka jamii kuacha kujichukulia sheria mkononi, na wenye ndoa kuacha kufanya ukatili kwa wenza wao kwani kwa kufanya hivyo ni ukiukwaji wa haki ya binadamu.

Kwa upande wake mwanamke aliyefanyiwa ukatili Neema John akiwa Hospital ya Rufaa ya Mkoa ya Tumbi kwa matibabu ameeleza anashukuru kupata matibabu na anaendelea vizuri kidogo.

“Kosa langu lilikuwa kuchelewa kuwasha moto ndipo mume wangu akaamua kunipiga kiasi hiki mgongoni,usoni na kunimwagia maji ya moto mapajani na mguuni”amesema Neema kwa uchungu.

Mganga Mkuu wa Mkoa wa Pwani Gunini Kamba, amesema mgonjwa huyo alipokelewa akitokea Mlandizi lakini sasa anatibiwa Hospital ya Tumbi na wanashukuru anaendelea na matibabu.

Kaimu Mganga Mkuu Mfawidhi Hospital ya Rufaa ya Mkoa Tumbi,Dkt.Devotha Julius amesema Neema kiafya anaendelea vizuri na bado yupo kwenye matibabu.

“Hata hivyo kumekuwa na wagonjwa wanaofikishwa hospitalini hapo kupata matibabu kutokana na kufanyiwa ukatili kati ya watatu hadi wanne kwa mwezi hivyo bado elimu inatakiwa kuwa endelevu ili kupunguza matukio ya ukatili,’ amesema.

Aziza Nangwa,JamhuriMedia, Mtwara

Wananchi na wadau kutoka asasi mbalimbali nchini wamefurahia elimu ya kupaza sauti juu ya baioanwai ya Shirika la Kimataifa la Uhifadhi wa Mazingira na Wanyamapori (WWF) kuwanufaisha kimaisha kwa kubadili mitanzamo yao Jamhuri imeelezwa.

Mmoja wa wananchi walionufaika na mafunzo ya kupaza sauti za uhifadhi wa baioanwai, Said Stanley, kutoka Kilwa amesema kabla ya mafunzo hayo,walikuwa hawajui umuhimu wa kulinda baioanwai katika kijiji chao walikuwa wakikata miti hovyo na kulima bila ya kujali uhalibifu utakao tokea.

Amesema lakini baada WWF kuwakusanya na kuwapa elimu juu ya umuhimu wa kushiriki kulinda misitu na faida watakayoipata juu ya utunzaji huo ,walihamasika sana na kuacha mazoea hivyo kupelekea kulinda misitu yao pamoja na wanyama kwa faida yao na taifa.

Stanley amesema mradi huo wa kupaza sauti umefika kwao kwa takribani miaka 10 iliyopita mpaka sasa wananchi wamefundishwa ,namna ya faida ya kuhifadhi, ikolojia ya misitu kwa faida maisha ya baioanwai wote.

Amesema mradi huo umewasadia sana kuweza kufahamu ni namna gani wanaweza kutunza mazingira yao kwa ,faida ya maisha yao kwa kuongeza kipato na kulinda nyara za serikali.

Ameitaja faida ya kwanza wameweza kufikia mafanikio ya kujenga shule ya msingi kwa kutumia pesa wanayoipta kutoka kwenye misitu na wamejiwekea mikakati ya kulipia wanafunzi wanaofauru kwenda sekondar. kiasi cha sh,100,000 kila mwaka.

Amesema faida nyingine ni kwamba wamejenga mazingira ya kumthamini mwanamke kwa kutoa sh.50,000 kwa kila mjamzito anayekaribia kujifungua katika kijiji chao kwa ajili ya kumsadia yeye na mtoto anayezaliwa.

Faida nyingine waliyoipata ni kujenga ofisi yenye thamani ya sh.Milioni 75 kwa kikundi chao amesema asilimia iliyobaki ambayo ni kubwa inakwenda halmashauri na katika ofisi ya kijiji kwa ajili ya maendeleo ya wananchi wote .

Mpaka sasa kijiji chetu kimeweza kutoa pesa ya kuchimba visima bure na wananchi wanatumia bure bila malipo.

Sihaba Hega kutoka Namtumbo amesema elimu ya uhifadhi katika wilaya yao imewasaidi kuelewa namna ya kuhifadhi mazingira ya misitu yao, na kulinda viumbe hai katika misitu yao ya asili kwa faida ya jamii.

Sihaba amesema uhifadhi umeleta faida kubwa katika vijiji vyao mpaka sasa wamekuwa wanajilipa sh.50.000 kila wanapokusanya wastani wa sh.milioni 100 nyingine ni kwa ajili ya maendelo ya kijiji chao.

Amesema mpaka sasa wameshajenga shule ya msingi nyumba ya mwalimu amesema changamoto iliyopo kwa sasa,baada ya uhifadhi kuwa mkubwa ,ni wanyama kuwa wengi hasa Tembo katika eneo lao wamekuwa wengi na kupelekea ufanya uhalibifu wa kuingia majumbani kuchota nafaka au pombe za kienyeji
kingine ni fidia ndogo kutoka serikalini kulipwa sh.200,000 kama kifuta jasho wakati mazao yaliyoharibiwa ni mengi.

Leticia Mbunda mwenyekiti wa kikundi cha mkoani Ruvuma Masasi amesema elimu ya uhifadhi imewasadia kulejesha wanyama poli kwa wingi na misitu katika eneo lao kwa kiasi kikubwa kuliko huko nyuma.

Amesema wamekuwa na kazi kubwa ya kuelimisha jamii kama wanakikundi wamekuwa mstari wa mbele kwenda sehemu mbalimbali kuelimisha jamii juu ya utunzaji mazingira na viumbe hai kwa manufaa yetu.

Amesema wamekuwa wakienda kwenye shule mbalimbali kuwafundisha wanafunzi juu ya utunzaji wa mazingira ya misitu na wanyama na sasa uhifadhi umefanikiwa kwa kiasi kikubwa kwa sababu wananchi wanaelewa faida na wanaiona kwnye maendeleo.