Na Mwandishi Wetu, Jamhuri Media, Dar es Salaam
Chama cha Makocha wa Ngumi za Kulipwa Tanzania (TPBCA) kimetangaza kufanyika kwa tukio maalum la Boxing Media Day litakalofanyika Aprili 15, 2026, likiwa na lengo la kuibua vipaji, kuhamasisha maendeleo ya mabondia, na kukuza taaluma ya ukocha nchini.
Akizungumza na waandishi wa habari leo Machi 30, 2026 jijini Dar es Salaam, Mwenyekiti wa TPBCA, Jaffary Ndame, amesema kuwa siku hiyo itahusisha ziara katika kumbi mbalimbali za mazoezi (gym) ili kujionea namna mabondia wanavyoandaliwa pamoja na mchango wa walimu wao katika kukuza mchezo huo.
Amesema tukio hilo litakuwa jukwaa muhimu la kutangaza kazi zinazofanywa na makocha wa ngumi pamoja na juhudi za chama hicho katika kuinua hadhi ya mchezo huo nchini.
“Lengo letu ni kuonyesha kuwa ngumi ni taaluma kama zilivyo taaluma nyingine. Tunataka kubadili mtazamo uliopo kuwa mabondia ni wale walioshindwa masomo. Hii si kweli—tunajenga kizazi cha mabondia wenye nidhamu na uwezo wa kuliletea taifa heshima,” amesema Ndame.
Aidha, amesisitiza kuwa mwaka huu utakuwa wa kipekee, hasa kwa mabondia wanawake, ambapo mashindano yao yanatarajiwa kufanyika kwa muda mrefu zaidi kuliko ilivyokuwa hapo awali, hivyo kuhitaji maandalizi ya kina kutoka kwa walimu na mabondia wenyewe.
Kwa upande wake, Katibu wa TPBCA, Jumma Mbogo, ametambulisha kamati mbalimbali zitakazosimamia maandalizi ya tukio hilo, zikiwemo kamati ya ufundi, nidhamu, afya, pamoja na habari na mawasiliano, ili kuhakikisha Boxing Media Day inakuwa ya mafanikio makubwa.
Mbogo pia amesema kuwa tukio hilo limedhaminiwa na kampuni ya Robby Farmer’s, huku akitoa wito kwa wadau wengine kujitokeza kusaidia kukuza sekta ya ngumi za kulipwa nchini.
Naye Mweka Hazina wa chama hicho, Hamis Richard, amesema TPBCA ina mpango wa kuhakikisha walimu wa mabondia wananufaika na mikataba rasmi, hatua itakayosaidia kuboresha maisha yao na kuwaondoa katika changamoto za kiuchumi.
Kwa upande wa Meneja wa Habari na Mawasiliano, Somba Dauka, amesema wadhamini hao wameandaa zawadi maalum kwa mabondia wanawake watakaotembelewa kwenye gym mbalimbali, hasa zile zinazoongozwa na makocha wanawake, ikiwa ni njia ya kuhamasisha ushiriki wao katika mchezo huo.
“Kwa miaka ya nyuma, mapambano ya ngumi kwa wanawake yalikuwa yakipewa muda mfupi, lakini sasa tunaleta mabadiliko—yanatarajiwa kuwa ya muda mrefu zaidi ili kutoa nafasi ya mabondia hao kuonesha uwezo wao kikamilifu,” amesema Dauka.
Kwa ujumla, tukio la Boxing Media Day linatarajiwa kuwa chachu mpya ya maendeleo ya ngumi nchini, likiwahamasisha makocha na mabondia kujipanga vyema ili kuleta ushindani na mafanikio katika sekta hiyo inayozidi kukua kwa kasi.
