Na Mwandishi Wetu, Namtumbo
WAZIRI wa Katiba na Sheria Dkt Juma Homera amesema,zaidi ya watu 607 kati ya 2,500 waliokamatwa baada ya kufanya vurugu kwenye uchaguzi mkuu wa mwezi Oktoba mwaka huu wameachiliwa huku wengine 1,736 wataachiliwa hivi karibuni.
Waziri Homera amesema hayo jana,baada ya kupokea taarifa ya maendeleo ya Wilaya ya Namtumbo iliyotolewa na Mkuu wa Wilaya hiyo Ngollo Malenya.
Waziri Homera amesema, watu wengine 309 watabaki kwa ajili ya kuendelea na uchungu zaidi ili kujiridhisha kuhusika kwao kwenye vurugu hizo zilizopelekea baadhi ya watu kupoteza maisha na kuharibiwa kwa mali.
“Wale wenzetu walioko ndani kila siku tunaendelea kuwatoa na hadi wiki ijayo tutafikia hatua nzuri kwa watu wengi zaidi kutolewa ili waweze kuungana na familia zao”alisema Homera.
Amesema kuwa,Wizara ya Katiba na Sheria itaendelea kusimamia sheria za nchi ili wananchi waweze kupata haki yao ya msingi ili kutoa nafasi kufanya shughuli mbalimbali za kujiletea maendeleo.
Hata hivyo amesema,haki lazima iendane na wajibu na sio kupata haki tu bila wajibu kwa hiyo ni lazima watu watimize wajibu kwa kutii sheria za nchi na kuhakikisha wanalinda amani na mshikamano wa Taifa letu.
“Jambo la amani ni muhimu sana kwetu sisi watanzania kwani hatuna Taifa lingine zaidi ya Tanzania,hatuna mama mwingine tunayemtegemea zaidi ya Taifa la Tanzania,kwa hiyo naamini kwamba hadi sasa tunakwenda vizuri na nawaomba sana wana Namtumbo tuwe sehemu ya watu wa kutekeleza sheria za nchi ili kuwa mfano kwa wengine”alisisitiza Waziri Homera
Amewataka wananchi wa Wilaya ya Namtumbo na Mkoa wa Ruvuma kwa ujumla,kuwa wa kwanza kulinda amani na mshikamano uliopo na kutekeleza sheria za nchi yetu na huku akiwapongeza wananchi wa Wilaya hiyo kwa kufanya kazi kwa bidii hususani kilimo ili kujikwamua na umaskini.
Amesema,kama Mbunge wa Jimbo hilo atasimamia sekta ya kilimo ili kuhakikisha kilimo katika Wilaya hiyo kinakuwa na kutoa mchango mkubwa kwa ajili ya kuiwezesha Halmashauri ya Wilaya Namtumbo kukusanya mapato na mapato hayo yanakwenda kufanya kazi iliyokusudiwa.
Waziri Homera, amewatoa wasiwasi Watanzania kuhusu mchakato wa kupata Katiba mpya ambapo amesema,Serikali kupitia Wizara hiyo itaanza kufanya mchakato huo ili kuhakikisha watanzania wanapata Katiba mpya.
”Mchakato wa kupata Katiba mpya unafanyiwa kazi na Wizara yangu ndiyo inayohusika,nawaomba Watanzania tuendelee kuwa na subira Serikali ya awamu ya sita chini ya Rais Samia Suluhu Hassan imedhamiria kuona tunakuwa na Katiba mpya”alisema Dkt Homera.
Mkuu wa Wilaya ya Namtumbo Ngollo Malenya amesema,katika Wilaya hiyo hali ni shwari na wananchi wanaendelea kufanya kazi za kujiletea maendeleo na wanafurahia uwepo wa amani na utulivu.
Amesema,katika msimu huu wa kilimo wilaya hiyo wanatarajia kuongeza uzalishaji wa mazao ya chakula na biashara baada ya Halmashauri ya Wilaya kuweka mpango wa kusamba mbegu bure kwenda kwa wakulima kama mkakati wa Wilaya hiyo kuongeza uzalishaji ili Halmashauri iweze kukusanya mapato mengi kupitia ushuru wa mazao.
Malenya amesema,Wilaya ya Namtumbo yenye kata 21 na vijiji 66 wamejipanga kuhakikisha hakutakuwa na maandamano kwa sababu wananchi walijitokeza kwa wingi kumpigia kura nyingi Rais Samia Suluhu Hassan,Mbunge Dkt Juma Homera pamoja na madiwani wanaowapenda.
Kwa mujibu wa Malenya,katika uchaguzi Mkuu wa Mwezi Oktoba mwaka huu Wilaya ya Namtumbo ndiyo inayoongoza kwa kura nyingi za Urais,Ubunge na Udiwani katika Mkoa wa Ruvuma ambapo wanaendelea na mahusiano na wananchi kwa kukagua miradi inayoendelea kutekelezwa ambayo inaweza kusababisha wananchi kufanya maandamano.
“lakini tunashukuru sana Mungu kwamba ndani ya wilaya hii hakuna hali wala viashiria vyovyote vinavyopelekea kuwepo kwa maandamano kwa sababu wananchi wameridhika na matokeo ya uchaguzi mkuu na wamemchagua Rais,mbunge na wawakilishi amba oni madiwani wanaowataka”alisema Malenya.
Amemuhakikishia Waziri wa Katiba na Sheria kwamba,wananchi wa Namtumbo wameamua kulinda wilaya yao na kuhakikisha kuwa hali ya usalama itaendelea kuwa shwari na wako tayari kutoa ushirikiano kwa Serikali kwa watu wengine wenye nia hovu(mbaya)watakaojitokeza kufanya vurugu na maandamano.
