Halmashauri ya Wilaya ya Mbarali imechukua hatua ya kumuondoa mlinzi wa kiume katika eneo la kazi la wodi ya wazazi katika Hospitali ya Wilaya hiyo, kufuatia malalamiko ya wananchi kuhusu vitendo vinavyodaiwa kuhusisha kuwachungulia wateja wanaopata huduma katika eneo hilo.
Kwa mujibu wa taarifa iliyotolewa na Halmashauri Septemba 27, 2026, malalamiko hayo yaliwasilishwa Septemba 25 na Mwenyekiti wa Chama cha Mapinduzi Wilaya ya Mbarali wakati akiwa kwenye mkutano katika Kata ya Rujewa.
Uongozi wa Halmashauri umesema umeanza kuchukua hatua za kukomesha vitendo hivyo.
Mbali na kumuondoa mlinzi huyo katika eneo hilo la kazi, Halmashauri imesema imeweka walinzi wengine kwa ajili ya kuimarisha ulinzi.
Hatua hiyo inalenga kuhakikisha wagonjwa na wateja wanapata huduma katika mazingira salama huku faragha zao zikilindwa.
Halmashauri imesisitiza kuwa itaendelea kusimamia utawala wa sheria na kuhakikisha wateja wanapata huduma kwa haki, huku watendaji wakitakiwa kuzingatia maadili ya kazi, taratibu na sheria katika kutekeleza majukumu yao.
