Uchumi

Mwandishi Wetu,JamhuriMedia,Arusha

Mabadiliko ya tabia nchi,yameua mifugo na wanyamapori zaidi ya 38,72 kwa kukosa maji na malisho, wilaya ya Longido mkoa wa Arusha.

Afisa Mifugo na Mabadiliko ya tabia nchi wa Halmashauri ya Wilaya ya Longido,Nestory Daqarro alitoa taarifa hiyo, katika mkutano wa uhakiki wa taarifa(validation meeting) ulioandaliwa na taasisi ya wanahabari ya usaidizi wa jamii za pembezoni( Media Aid For Indigenous and Pastoralist Community-MAIPAC) kwa udhamini wa shirika la maendeleo la umoja wa mataifa(UNDP) kupitia mfuko wa mazingira Duniani(GEF) na kuratibiwa na jumuiko la maliasili Tanzania(TNRF) kujadili umuhimu maarifa ya asili katika utunzwaji vyanzo vya maji, misitu na kukabiliana na mabadiliko ya tabia nchi.

Daqqaro amesema katika kipindi cha miezi tisa,wanyama takribani 38,720 wamekufa wakiwepo Twiga wanne,Pundamilia 18,Swala 2 na wengine ni Ng’ombe, kondoo na mbuzi .

“Jitihada zinaendelea kufanywa hapa wilayani ikiwepo kuchimba visima na kupeleka maji maeneo ya wanyama, kutenga malisho ili kuokoa maisha ya wanyama na uchumi wa wilaya hiyo, ambapo asilimia 95 ya wananchi hutegemea mifugo”alisema

Mkurugenzi wa Jumuiko la Maliasili Tanzania(TNRF), Zakaria Faustine akizungumza katika mkutano huo, alisema kuna haja kuwa na mkakati shirikishi baina ya asasi za kiraia, serikali, mashirika ya kimataifa na wananchi kukabiliana na athari za mabadiliko ya tabia nchi.

Faustine alisema mradi wa kukusanya maarifa ya asili yanayoweza kutumika kukabiliana na athari za mabadiliko ya tabia nchi, kutunza misitu na maji ambao unatekelezwa na MAIPAC ni sehemu ya mkakati wa kupata taarifa ili kusaidia maboresho ya sera na sheria nchini.

“Tunawapongeza MAIPAC na CILAO kwa mradi huu, ambao unatekelezwa pamoja na miradi mingine 12 ya mazingira ambayo inafadhiliwa na UNDP kupitia programu ya miradi midogomidogo kwa lengo na kushirikisha jamii za asili katika utunzwaji wa mazingira na vyanzo vya maji”alisema

Mwenyekiti wa kijiji cha Kimokowa,wilaya ya Longido,Kilei Mollel alisema licha ya wilaya hiyo, kukabiliana na ukame na kukosa maji pia imeibuka mimea vamizi ambayo hailiwi na mifugo na wanyamapori ambayo imeota katika maeneo mengi.

“Tumekuwa tukishirikiana na serikali na mashirika yasiyo ya kiserikali kama CORDs kung’oa mimea lakini ni mingi zaidi ya hekali 1000 za malisho zimevamiwa”amesema.

Mkurugenzi MAIPAC Mussa Juma na Mkurugenzi wa shirika la CILAO, Odero charles Oderos,wameeleza katika mradi huo wamefika katika wilaya tatu za Monduli,Longido na Ngorongoro na kukutana na makundi ya wazee maarufu, viongozi wa mila, wanawake,vijana na wanafunzi na kukusanya maarifa za asili katika masuala ya mazingira.

Juma amesema jamii za pembezoni zina utajiri mkubwa wa maarifa ya asili lakini, kama yasipohifadhiwa yanaendelea kutoweka na hivyo, jamii kutegemea elimu za kisasa pekee katika utunzwaji wa mazingira.

Kwa upande wake Odero alifafanua kuwa, maarifa ya asili ambayo yatakusanywa katika mradi huo, yatawekwa katika vitabu na kwenye vyombo vya habari ili kuzalia kutumika katika utungaji wa sera lakini pia kuelimisha jamii umuhimu wa maarifa hayo.

Afisa misitu wa Tarafa ya Makuyuni na Manyara, Hapiness Masaki na Afisa misitu wa Wakala wa misitu(TFS) wilaya ya Ngorongoro, Major Ngoilenya wamesema ni muhimu maarifa ya asili kutumika katika kukabiliana na athari za mabadiliko ya tabia nchi katika kutunza vyanzo vya maji na misitu.

Mkurugenzi wa shirika la MIMUTIE women Orgganization (MWO), Rose Njilo akizungumza katika mkutano huo, licha ya kupongeza mradi wa kukusanya taarifa za maarifa ya asili unaotekelezwa na shirika la MAIPAC, alisema hivi sasa wanaoathirika na mabadiliko ya tabia nchi ni wanawake na watoto.

“Mradi huu umekuja wakati muafaka sasa elimu ya asili itambulike na watunga sera ili iweze kuwasaidia wanawake na watoto jamii za pembezoni ambao ndio waathirika wakubwa wa mabadiliko ya tabia nchi”alisema.

Afisa habari wa shirika la PINGOs Forums, Elie Chansa alitaka taarifa za asili ambazo zitakusanywa katika mradi huo,zifikishwe serikalini na katika mashule na vyuo ili ziweze kutumika katika kutunza mazingira kabla walivyofanya mababu.

Mradi wa kukusanya taarifa za uhifadhi mazingira, kutunza vyanzo vya maji, misitu na kukabiliana na athari za mabadiliko ya tabia nchi, unatekelezwa na shirika la MAIPAC kwa kushirikiana na shirika la CILAO katika wilaya tatu za mkoa Arusha ambazo ni Longido, Monduli na Ngorongoro.

Na Mwandishi Wetu,JamhuriMedia,Mwanza

MAKAMU Mwenyekiti wa Chama Cha Mapinduzi (CCM) Tanzania Bara, Kanali Mstaafu Abdulrahman Kinana amepokea malalamiko 13 ya wavuvi wa samaki katika Ziwa Victoria ikiwemo utitiri wa kodi pamoja na mateso wanayoyapata wavuvi wanapokuwa ziwani ambapo yote hayo ameahidi kuyafikisha katika mamkala husika kwa ufumbuzi.

Aidha amesema Rais Samia Suluhu Hassan amedhamiria kutatua changamoto mbalimbali zikiwemo za kisheria, hivyo changamoto zilizotolewa na wavuvi zitafanyiwa kazi kwa ajili ya kuifanya sekta ya uvuvi kuwa na tija zaidi.

Kinana ameyasema hayo jana jijini Mwanza alipozungumza na wavuvi wa Kanda ya Ziwa Victoria katika ukumbi wa BoT, akiwa katika ziara ya kukagua uhai wa Chama na utekelezaji wa Ialani ya Uchaguzi ya CCM ya 2020-2025.

“Ndugu zangu nimekuja hapa kuwasikiliza kwa sababu mbili, kwanza Serikali hii ni ya Chama Cha Mapinduzi na pili nimekuja kuwasikiiliza, nimewasikiliza vizuri na kwa umakini, nimesikiliza risala pamoja na wasemaji wengine na yote yaliyozungumzwa na mliyosema tumeandika.

“Rais wa Jamhuri ya Muungano wa Tanzania lengo lake kuu ni kuwasaidia Watanzania ili kipato chao kiendelee kuongezeka wanapofanya bisahara. Tunapozungumzia sekta binafsi imara nyingi tunawafikiria wawekezaji wakubwa wa viwanda na wakati mwingine tunawafikiria hata watu kutoka nje pekee.

“Ieleweke ukiifikiria sekta binafsi ni hawa (wajasiriamali wadogo) na ndio wenye viwanda vidogo, wanajituma ili wawe na maisha bora. Serikali haiwezi kumwondolea mtu umasikini wake, lakini inaweza kutengeneza mazingira mazuri, sheria na kanuni nzuri ili iwe rahisi kwa mtu kufanya shughuli zake kwa ufanisi na kwa faida, hiyo ndio kazi ya Serikali,” alisema Kinana.

Aliongeza kuwa, wakati anasikiliza risala ya wavuvi miongoni mwa malalamiko ni uwepo wa kodi 11 ambazo ili uweze kumudu lazima uwe na kipato kikubwa huku akieleza kushangwa na uwepo wa kodi ya maegesho vyombo vya uvuvi.

“Imenifanya nicheke eti kuna kodi ya ‘parking’ yaani kodi zote wamechukua mwisho wa siku wamekuja na parking. Sasa hivi kodi nyingi kidogo, natolea mfano tu., lakini niwaambie nia ya Rais na nimemsikia Rais amezungumza juu ya malengo manne aliyonayo maana la kwanza ni kuleta maridhiano kwa Watanzania, kuleta maboresho ya serikali katika muundo, sheria, sera na kanuni ili maisha ya watu yawe bora zaidi.

“Sasa katika kuboresha mambo risala yenu hii itatizamwa namna gani tunaweza kubadili mambo yao yawe bora zaidi. Risala yenu itatazamwa namna gani tunaweza kubadilisha mambo ambayo yapo kama 14,” alisema.

Aidha, alisema baada ya miaka mingi Rais Samia ametoa fedha za ruzuku kwa ajili ya wakulima, lakini ametoa fedha za ruzuku kwa baadhi ya wavuvi ambapo ametoa fedha kwa ajili ya kutengeneza viamba na kwa mkoa wa Mwanza umepata viamba 42.

“Kwa hiyo Rais ana lengo nzuri , hawezi Rais anaweza kuwa na nia njema , malengo mazuri lakini watanzania lazima tumsaidie ili kazi na malengo yaweze kufikiwa. Risala yenu hii ni moja ya njia ya kumsaidia Rais Samia kuwasaidia Watanzania kuondokana na umasikini vile vile kuwa matajiri kupitia uvuvi,”alisema Kinana.

Hivyo amewaahidi kupitia nafasi aliyonayo vikao alivyonavyo , kwa namna anachohusika na Chama chake na Serikali yake hayo mambo yote waliyoyasema yatashughulikiwa ipasavyo.

“Sina jibu la kutoa hapa na si vizuri nikaanza kuyajibu haya mambo kwasababu mliniita niwasilikize , nimewasiliza mmeniomba na kunitaka kama Chama kinachounda Serikali yake kitafute namna ya kutatua matatizo haya.

“Niwaahidi nitakwenda kuwahakikisha haya masuala yote yaliyotolewa humu ndani yanapata majibu na yanapata ufumbuzi .Yako yanahusu Serikali ya utekelezaji, Wizara , sera, sheria pamoja na kanuni zinazotungwa na Serikali hasa Wizara .Nitatizama namna gani nitasaidia ili na ninyi kwa yale mliyoyasema yaweze kufanikiwa,”alisema Kinana.

Awali akisoma risala ya wavuvi, Katibu wa Kamati ya Ushauri wa Wavuvi Ziwa Victoria Mayalu Kasiri, alielezea changamoto na matatizo yanayosumbua sekta ya uvuvi na kusababisha kudorora.

Ametaja changamoto hizo ni kukithiri kwa uvuvi haramu ambalo limekuwa likiitesa sekta hiyo katika Ziwa Victoria, pili biashara holela ya mabondo ya Sangara ambayo inachangia iwepo wa uvuvi haramu , uvamazi, utekeji na unyang’anyi wa samaki kwa wavuvi ziwani.

Changamoto nyingine ni muundo wa Wizara ya Uvuvi ambapo ameeleza sio mzuri kwa kuwa ina mkurugenzi mmoja ambaye ndiye anayeratibu shughuli zote za Wizara wakati yupo makao makuu ya Wizara.

“Tunaomba Serikali kuweka mfumo rasmi wa wavuvi kwani kumekuwa na matatizo mengi ya wavuvi kuhusu kukosa mitaji na zana bora za uvuvi, hivyo tunaomba Serikali yetu kuweka mfuko maalumu kwa ajili ya wavuvi tu kuliko ilivyo sasa kupitia benki ya kilimo ambayo mvuvi akienda hakopeshiki mpaka alete dhamana ya mali zao kama hati ya nyumba,”amesema.

Ametaja changamoto nyingine tozo ya ushuru wa wavuvi ambazo ziko 11 na ambapo meeleza kwa muda mrefu sasa wamekuwa na utitiri wa tozo na ushuru ambazo hulipwa na wavuvi na kufanya wabebe mzigo mzito na hatimaye washindwe kujikwamua dhidi ya umasikini.

Wakati changamoto nyingine ni ulinzi na usalama wa mali za wavuvi kwani kwa muda mrefu sasa wamekuwa wakipatwa na majanga pindi wawapo katika kazi zaa ziwani.Changamoto nyingine ni mafuta kwa ajili ya wavuvi ambayo alisema wamekuwa wakitumia nishati ya mafuta ya petrol, dizeli na mafuta ya taa ambayo bei yake kwa sasa iko juu.

Kasiri ametaja changamoto nyingine ni sheria za uvuvi na kanuni zake zilizopo sasa ni kandamizi kwa wavuvi kwani hazitoi mwanya wa mvuvi kupata haki zake kama raia wa Tanzania. Wakati nyingine ni bei kubwa ya zana za uvuvi.

Changamoto ya 10 ni mazalia ya samaki katika ziwa victoria kwani sehemu nyingi yanaharibiwa ,changamoto nyingine ni matumizi mabaya ya taa za sola ziwani ambapo kuna baadhi ya wavuvi huzibadilisha na kuzitumbukiza ziwani kuweka taa mbili kwenye Sikimai mojana zaidi ya Wati 10, kutumia betri kubwa ya uwezo wa taa na kutumia ambazo hazijafanyiwa utafiti.

Akiendelea kutaja changamoto hizo alisema iko pia fidia kwa wavuvi walioathiriwa na operesheni sangara mwaka 2018 na changamoto ya mwisho ni kutokuwepo na bodi ya uvivi ambapo wameomba iundwe ili kuratibu masuala ya uvuvi kwa ukaribu zaidi.

=======

Na Mwandishi Wetu,JamhuriMedia

SERIKALI kupitia Mamlaka ya Majisafi na Usafi wa Mazingira Dar es Salaam (DAWASA), imetenga sh. trilioni 1.029 kutekeleza miradi ya maji 13 ya kimkakati katika mwaka wa fedha 2022/2023.

Hayo yamesemwa leo Agosti 13,2022 jijini Dodoma na Afisa Mtendaji Mkuu wa Mamlaka ya Majisafi na Usafi wa Mazingira Dar es Salaam (DAWASA) Mhandisi Cyprian Luhemeja,wakati akizungumza na waandishi wa habari kuhusu utekelezaji wa shughuli mbalimbali za mamlaka hiyo na mwelekeo wa utekelezaji wa bajeti kwa mwaka wa fedha wa 2022-2023.

Mhandisi Luhemeja, amesema kuwa lengo la mamlaka hiyo ni kuhakikisha upatikanaji maji unafikia asilimia 100 kama ilivyoelekezwa kupitia mpango biashara wa mamlaka hiyo unaotekelezwa kuanzia mwaka 2021/22-2023/24.

Ameitaja miradi hiyo ya kimkakati ni mradi wa uboreshaji mfumo wa usambazaji maji kuanzia Chuo kikuu cha Ardhi hadi Bagamoyo, miradi ya maji Mshikamamo, mradi wa maji Kigamboni, mradi wa maji Chalinze awamu ya tatu, mradi wa ujenzi wa bwawa la Kidunda, miradi ya maji safi pembezoni na mradi wa kupunguza kiwango cha maji yasiyolipiwa.

Miradi mingine ni mradi wa Uboreshaji wa Ufanisi wa Utendaji (PIP), mradi wa ujenzi wa mtambo wa majitaka Mbezi Beach, mradi wa ujenzi wa mtambo wa majitaka Buguruni, mradi wa uboreshaji wa mifumo ya majitaka pembezoni, mradi wa ujenzi wa vituo vya huduma za usafi kwa umma na ununuzi wa magari ya majitaka.

‘Sh. bilioni 388 zimetengwa kwani ujenzi wa bwawa hilo utawezesha kuhifadhi maji lita trilioni 1.6 ambapo tayari sh. bilioni 60 zimetolewa na mkandarasi anatarajiwa kukabidhiwa mradi, Oktoba mwaka huu.’amesema Mhandisi Luhemeja

Mhandisi Luhemeja,ameeleza kuwa mamlaka hiyo inaendelea kuhakikisha wananchi waishio maeneo ya pembezoni mwa Dar es Salaam wanapata huduma ya maji yenye uhakika kwani imetenga sh. bilioni 22 kufanikisha mradi huo.

”Mamlaka hiyo itajenga mtambo mkubwa wa uzalishaji maji katika Mto Rufiji unaotarajiwa kuzalisha lita milioni 750 za maji kwa siku, hivyo kuongeza uhakika wa upatikanaji maji kwa wakazi wa Dar es Salaam na baadhi ya maeneo ya Mkoa wa Pwani.”

Vilevile, amesema sh. bilioni 207 zimetengwa kwa ajili ya ujenzi wa mtambo wa kuchakata maji taka eneo la Buguruni ambao awali ulipangwa kujengwa eneo la Jangwani.

Aidha Mhandisi Luhemeja,amesema kuwa hali ya upatikanaji maji, sehemu kubwa ya eneo linalohudumiwa na DAWASA linapata huduma ya maji ya uhakika baada ya miradi ya kimkakati kukamilishwa ikiwemo upanuzi wa mitambo ya Ruvu Juu na Ruvu Chini, ulazaji mabomba na ujenzi wa matenki ya kuhifadhi maji.

”Hii imepelekea idadi ya wateja kuongezeka kutoka wateja 217,766 mwaka 2018 hadi kufikia wateja 370,982 mwaka huu 2022”amesema.

Amesema Miradi ya kimkakati ambayo imeanza kutoa huduma kwa wananchi ni pamoja na mradi wa kusambaza maji Makongo hadi Bagamoyo, mradi wa maji Jeti-Buza, mradi wa maji Mkuranga, mradi wa maji Pugu – Gongo la mboto,

Miradi mengine ni mradi wa maji Kibamba – Kisarawe, mradi wa maji Mlandizi – Chalinze – Mboga, mradi wa maji Mbwawa, mradi wa maji Soga, mradi wa maji Tan-choice, mradi wa maji Zegereni na miradi mbalimbali ya uboreshaji wa mifumo ya TEHAMA ili kuboresha huduma kwa wateja na kupunguza gharama za uendeshaji.

Hata hivyo amesema kuwa baada ya kukamilika kwa utekelezaji wa miradi hii ya majisafi na usafi wa mazingira, kazi itakayobaki itahusisha usogezaji wa huduma kwa wananchi na kufanya maunganisho kwa wateja wapy

Na Mwandishi Wetu,JamhuriMedia

ASILIMIA 17 ya umeme unaopotea Zanzibar kutokana na baadhi ya watu kuunga umeme kinyume na sheria hali ambayo inapelekea nchi kukosa mapato.

Waziri wa Maji,Nishati na Madini Shaibu Kaduara amesema wanaotumia umeme kinyume na Sheria ni kosa la jinai na atakaebainika atashtakiwa kwa kosa la kuhujumu uchumi wa Nchi.

Hayo yamesemwa na waziri huyo wakati aliposhiriki katika zoezi lililopewa jina la ‘Kaduara’ ambalo limejikita katika kuwatafuta wananchi wanaojiunganishia nishati ya umeme kinyemela.

Amesema zoezi limebainika wapo wananchi wengi wanaotumia umeme kinyume na sheria kwa kujiunganishia majumbani, kitendo ambacho kinatia hasara kwa Shirika la Umeme Zanzibar (ZECO).

Amesema Wizara yake imeanzisha operesheni hiyo ambayo lengo lake ni kuwafungia mita ya umeme wananchi pamoja na kufanya msako wa kuwatafuta watu wanaojipatia huduma ya nishati kinyume na Sheria zilizowekwa.

Aidha,amesema operesheni imewakamata baadhi ya watu wanaoiba umeme kwa muda mrefu ambapo wamezisimamisha mita ili zishindwe kurikodi matumizi ya umeme. Alisema watu hao hawatakua salama kwa sababu Wizara haitamuonea muhali mtu yeyote alibainika na kosa hilo.

“Nimezinduwa operesheni ‘Kaduara’ ambayo lengo lake kupambana na watu wanaotumia huduma muhimu ya umeme kinyume na Sheria ambapo tunaweza kuwaita kuwa ni wahujumu wa uchumi”amesema.

Amesema lengo la Serikali ya Mapinduzi Zanzibar (SMZ) ni kuwapatia wananchi huduma ya Maji safi na salama pamoja na huduma ya nishati kwa ajili ya kurahisisha na kuyafikiya maendeleo mjini na vijijini.

Naye fundi Mkaguzi wa ZECO Juma Mussa, amesema wamebaini wapo watu wanaotumia huduma ya umeme kwa kuunganisha umeme moja kwa moja kutoka kwenye waya mkubwa wa shirika hilo huku wengi wamezifungua mita na kutengeneza njia ya wizi na hatimae kuifunga kwa supagluu.

Amesema wateja waliokamatwa watawajibishwa kwa kutozwa faini kwa muda wote waliokuwa wakifanya uhalifu huo.

“Kaduara operesheni”ni zoezi la kufunga mita ya umeme kwa wananchi pamoja na kuwasaka watu wanaojipatia huduma ya nishati kinyume na Sheria. Zoezi hilo lilizinduliwa June, 16 2022 na linaendelea hadi hapo watu watakapoacha tabia ya kuiba umeme.