Sitanii

Na Deodatus Balile, Arusha

Wiki hii nimerejea katika ukumbi huu. Msomaji wangu niwie radhi sikuweza kuandika katika wiki mbili zilizopita, kwani nilikuwa na maandalizi mazito ya mkutano mzito ulioileta Afrika Tanzania. Huu si mwingine, bali ni mkutano wa Siku ya Uhuru wa Vyombo vya Habari Duniani (WPFD) uliofanyika Arusha, Tanzania.

Sitanii, naomba kuchukua fursa hii kumshukuru Rais Samia Suluhu Hassan. Siku hii Mei 3, 2022 imeadhimishwa siku iliyokuwa na ratiba ngumu mno kwa Rais. Ilikuwa ni siku ya Eid el Fitr, hivyo Rais alilazimika kuswali kwanza Swala ya Idd Dar es Salaam, baadaye akaja Arusha kufungua mkutano wa Siku ya Uhuru wa Vyombo vya Habari Duniani ambayo kwa Afrika imeadhimishwa Tanzania na jioni akahudhuria Baraza la Eid Dar es Salaam.

Kwa hakika tumeiona faida ya usafiri wa uhakika, yaani matumizi ya ndege. Ingekuwa magari, nakuhakikishia Rais asingeweza kufanya ziara hizi zote akazikamilisha kwa wakati. Na hii niongezee. Ndiyo maana napingana na wanaomshutumu Waziri Nape Nnauye kwa kutumia helikopta katika kukamilisha mradi wa anwani za makazi.

Umefika wakati sasa viongozi wa kitaifa watumie helikopta au ndege. Kwa mawazo finyu tunaweza kudhani wanapata raha, si kweli. Fikiria kwa mfano Rais ana mkutano Kilimanjaro asubuhi, na jioni anapaswa kuwa Mpanda. Tukiwaza kwa ufinyu, litatolewa jibu la haraka kuwa haiwezekani, lakini tukitumia ndege na helikopta ni jambo la kawaida. Marekani wanafanya hivyo, na hata majirani zetu Kenya mawaziri wanatumia helikopta.

Ukimwambia mtu kuwa helikopta inapunguza gharama, utabishiwa. Lakini fikiria msafara wa magari, muda unaopotea barabarani na hatari za ajali zilizopo. Waziri Nape usife moyo, najua unashambuliwa kwa kutumia helikopta, lakini kila jambo lazima liwe na wa kulianzisha. Katika hili umeonyesha njia na si muda mrefu wengine watafuata. Mjadala huu una sura nyingi, wapo wanaolizwa na posho kwa kuwaza kuwa wakitumia magari idadi ya siku za safari inaongezeka, lakini kwao ufanisi na uchovu hawayafikirii.

Sitanii, nimeligusa la Nape baada ya kuona nchi inaacha mambo makubwa inajadili vitu visivyoongeza tija. Mama, Mheshimiwa Rais nakwambia sisi Jukwaa la Wahariri Tanzania (TEF) na wadau wa habari, umetupa heshima kubwa. Ungeweza kumtuma mwakilishi katika mkutano wetu na ugumu wa ratiba yako ungeeleweka kwa kila mtu.

Nikushukuru pia kwa kuwajulisha kuwa nilipowasiliana na wewe tukakubaliana usiahirishe ujio wako katika shughuli hii kwa kuwa maandalizi yalikwishakamilika, maana wapo waliokwishaanza kusambaza umbea kuwa nimewadanganya usingekuja. Ulipofika, aibu imewazingira kila kona. Asante sana Mhe. Rais kwa heshima kubwa uliyotupa wanahabari kwani ni mara ya kwanza mkutano huu kuhudhuriwa na Rais.

Sitanii, naamini pia wasaidizi wako wanapitia kwenye vyanzo vya habari. Utakubaliana na mimi kuwa mkutano huu umeitangaza Tanzania kwa uzuri nje ya nchi haijapata kutokea. Hotuba yako iliyogusa Bara la Afrika na kututaka waandishi kulijenga bara letu, imekuwa habari kubwa katika vyombo vya kimataifa. 

Tanzania imemwagiwa sifa kedekede. Wageni wa kimataifa waliotembelea mbunga zetu hadi kesho wanatamani kurudi tena Tanzania. Baadhi wameniambia watawashawishi marais wa nchi zao nao watengeneze Filamu ya Royal Tour kama uliyoitengeneza wewe.

Ujio wa Rais Samia kwenye Siku ya Uhuru wa Vyombo vya Habari Arusha umekuza heshima ya Tanzania kimataifa usipime. Mfano, ukitumia Google ukapekua maneno; “President Samia World Press Freedom Day 2022” kwenye mtandao, kuna habari 299,000 zinazomhusu Rais Samia na siku ya Uhuru wa Vyombo vya Habari. Ukiongeza neno Africa, zinakuja 242,500, ukiweka Tanzania, zinakuja 42,500. Hii ni kwa siku nne tu za mkutano, yaani Mei 1 hadi 4, 2022.

Sitanii, mkutano huu umenifundisha jambo. Ingawa tumefitiniwa na baadhi ya wenzetu wakati tunauandaa, ila uhalisia umelitangaza taifa letu. Rais Samia alifanya uamuzi sahihi kushiriki mkutano huu na wahariri kutoka Afrika katika nchi 54. Hii ilikuwa ni mara ya kwanza. Natamani mikutano ya hivi tuiandae kila wakati. Nchi za wenzetu zilifanikiwa kupata majina makubwa kwa kuandaa mikutano kama hii. Asante sana Rais Samia, naamini hata mabadiliko ya sheria uliyoagiza, Mhe. Waziri Nape atayatekeleza kwa wakati. Mungu akubariki sana.

Na Deodatus Balile

Wiki iliyopita ilikuwa na matukio mengi, ila nitayagusia makubwa machache. Kwanza nianze la kesho Jumatano, Machi 9, 2022 ambapo Jukwaa la Wahariri Tanzania litakuwa linafanya Mkutano Mkuu wa Mwaka wa 2022. 

Huu mkutano utahusisha wahariri zaidi ya 150. Kwa mara ya kwanza tutapata wahariri kutoka Kenya, Uganda, Rwanda, Burundi, Zimbabwe na Malawi. Mgeni rasmi ni Rais wa Zanzibar na Mwenyekiti wa Baraza la Mapinduzi, Dk. Hussein Ali Mwinyi. Vituo kadhaa vya televisheni vimetuunga mkono na vitarusha ‘live’ mkutano huu. Ni siku muhimu kwa wahariri.

Sitanii, baada ya utangulizi huo, nichukue fursa hii kumpongeza Rais Samia Suluhu Hassan kupitia kwa Mkurugenzi wa Mashtaka (DPP), Sylvester Mwakitalu, kwa kuamua kumfutia mashitaka Mwenyekiti wa Chama cha Demokrasia na Maendeleo (CHADEMA), Freeman Mbowe. Hatua hii ya Rais Samia imeendelea kutekeleza kauli yake kwa vitendo ya kuwataka Watanzania kuponya majeraha.

Mbowe anayo majeraha mengi. Ukiacha kushindwa ubunge katika mazingira ya kutatanisha, ambapo aliyekuwa Kamanda wa Polisi wa Wilaya ya Hai kabla ya uchaguzi alimwambia kuwa hawezi kushinda, Awamu ya Tano anayo mengi ya kusimulia. 

Shamba lake la mboga za majani wilayani Hai mipira ya umwagiliaji maji ilikatwakatwa na aliyekuwa mkuu wa wilaya, kwa madai kuwa amelima karibu na chanzo cha maji.

Mashamba yake mkoani Morogoro nayo yakapata zahama. Jengo la Bilcanas kulipokuwa na Night Club ya Bilcanas likavunjwa, vifaa vyake vya muziki, viti, meza na vinywaji vilivyokuwamo hadi leo haijulikani vilipo. Amekaa rumande miezi minane kwa kesi ya ‘kubumba’. Nikiri, namfahamu Mbowe angalau kwa miaka 20 sasa.

Sitanii, Mbowe ni kiongozi msikivu. Si mtu wa mabavu au shari. Ndiyo maana pamoja na kukaa rumande miezi minane, bado amekwenda Ikulu kuonana na Rais Samia na akatamka kuwa kuna kila sababu ya kufanya siasa za kistaarabu. Wala hakuanza leo kuonyesha uungwana wake. Mtakumbuka mwaka 2020 katika uchaguzi ulipotokea mtifuano kati ya Chadema na Shirika la Utangazaji la Taifa (TBC), nilimwita Mbowe, nikamwita Mkurugenzi Mkuu wa TBC, Dk. Ayub Rioba na nikamwomba Mkurugenzi wa Uchaguzi wa NEC, Dk. Charles Mahela, awepo, tukakaa, tukazungumza, tukayamaliza. TBC na Chadema wakaendelea kushirikiana.

Mbowe angekuwa sawa na baadhi ya wanasiasa nisiotaka kuwataja hapa, ambao wakikorofishana na wabunge anawaambia Out… Out… Out…, wala asingekubali kukaa meza ya mazungumzo na TBC au asingetoka rumande alikokaa miezi minane hadi akafikisha umri wa miaka 60 akiwa rumande, lakini bado akakubali kwenda Ikulu kukutana na Rais na bado akatoa kauli ya kiungwana kuhamasisha Watanzania kufanya siasa za kistaarabu.

Sitanii, wakati unamsifia mtu kwa mbio, ni vema pia usisahau kumsifia aliyekuwa akifukuzana naye. Wakati nikisifia uungwana wa Mbowe, hapa tusisahau uungwana wa aina yake wa Rais Samia. Rais Samia alisema anataka kuifungua nchi. Alipata kutoa kauli ya kuomba aachwe ajenge nchi kwanza, watu hawakumwelewa. Kwa vyovyote iwavyo, naamini sasa wengi wanamwelewa.

Tanzania ilikuwa kisiwani katika suala la corona, ameifungua nchi. Uhuru wa vyombo vya habari ulikuwa kitanzini, Februari 10, 2022 ameyafungulia magazeti ya Mwanahalisi, Mseto, Tanzania Daima na Mawio. 

Baada ya kumaliza hayo, lilibaki kubwa la Mbowe kuwa gerezani kutokana na kesi ‘iliyoumbwa’ miaka miwili iliyopita, kabla Rais Samia hajaingia madarakani. Sasa nalo amelimaliza.

Najua yapo mengine mawili ambayo Rais Samia ameishaanza kuyapatia ufumbuzi. Mikutano ya hadhara na Katiba Mpya. Hili ameliundia kikosi kazi. Ni matumaini yangu kuwa mwendo anaokwenda nao Rais Samia wa kutatua tatizo moja baada ya jingine, Tanzania itarudi katika nafasi yake kikanda na kimataifa. Nchi zote zinazotuzunguka, zamani ziliiona Tanzania kama msuluhishi, ila siku za karibuni tumeshuhudia mifarakano ya kisiasa isiyomithirika. Tumetoka huko wala tusirudi.

Sitanii, nilipooandika makala za kumwomba Rais Samia kumwachia huru Mbowe, nilisema kuna masalia ya waoneaji wasiofurahishwa na hatua anazozichukua Rais Samia za kuwapa watu haki. Kama nilivyotegemea genge la ‘makuwadi’ wa uonevu likamtuma kijana asiye na maadili kuniandika kwa lugha chafu kwenye mitandao ya kijamii, akidhani ningejibu mapigo. Kijana huyo tulimfukuza uanachama katika Jukwaa la Wahariri Tanzania kutokana na tabia zake za ‘uyoyoni’ na vitendo vya rushwa. Kuniita mimi chawa, anatafuta pa kuinulia jina lake, nami sitampa nafasi hiyo, nimeamua sitamjibu.

Nafasi inazidi kuwa finyu. Wakati nikimpongeza Rais Samia kwa kumwachia huru Mbowe, sitatenda haki nisipogusia hili la vita ya Urusi na Ukraine. Hapa mtu unahitaji kuwa refarii huru tu, wala hutakiwi kutumia nguvu kuthibitisha nani anaonewa katika mgogoro huu. Marekani imepigana vita zaidi ya nchi 40 tangu mwaka 1945, haijawahi kufungiwa na FIFA wala kuwekewa vikwazo.

Urusi mara kadhaa imeomba kuwa ilikwisha kuvunja Warsaw Pact, ila ikaomba ipewe uanachama kwenye NATO, kwa pamoja washirikiane kuongeza usalama wa dunia. Marekani haitaki. 

Wakati Marekani wanataka kujenga mitambo ya kijeshi jirani na Urusi kwa maana ya nchini Ukraine, wanasahau kuwa Ukraine ilikuwa sehemu ya Urusi hadi mwaka 1991. Rais Vladimir Putin amehoji iwapo Urusi inaweza kuanzisha uhusiano wa kijeshi na Mexico au Canada na Marekani wakaendelea kuwa na amani, hawajajibu swali hili.

Nafasi imekuwa finyu, naendelea kufuatilia kwa karibu vita ya Urusi na Ukraine na siku za usoni nitaendelea kuandika ukweli kuhusu kinachoendelea. Asante Rais Samia kufungulia magazeti na kumwachia huru Mbowe. Mungu ibariki Tanzania.

Na Deodatus Balile

Tangu Urusi ianze mashambulizi dhidi ya taifa la Ukraine, nimekuwa na ufuatiliaji wa karibu wa mashirika mbalimbali ya habari ya kimataifa. Kuna jambo gumu nimejifunza. Nimekuwa nikilisikia hili nililojifunza, ila sasa nimejifunza kwa njia ngumu.

Sitanii, miaka yote niliamini misingi ya Uhuru wa Vyombo vya Habari tunayofundishwa na wakubwa hawa wanaiishi. Kumbe hakika sivyo. Februari 24, 2022 Urusi ilipoanzisha mashambulizi, zilitoka taarifa huru zikasambaa dunia nzima juu ya mwenendo wa vita.

Tulishuhudia manuari za Urusi, ndege za kivita na askari wa nchi kavu wakiishambulia Ukraine kutokea majini, ardhini na angani. Miji kadhaa ikatangazwa kuwa imetekwa. Mji wa pili kwa ukubwa, Kharkiv, nao ukatajwa kuwa umetekwa.

Saa 24 baada ya picha hizo kurushwa, mwelekeo ukaanza kubadilika. Mashirika makubwa kama BBC, CNN, Aljazeera na mengine yakageuza mwelekeo. YouTube wakatangaza kufungia mitandao ya Urusi na Televisheni ya Taifa ya Urusi – RT.

Ghafla tukaona “Ukraine inapata nguvu kupitia vyombo vya habari vya Magharibi”. Ghafla tunapata taarifa za askari 190,000 wa Urusi kuzidiwa nguvu na raia 18,000 wa Ukraine. Nasema raia 18,000 kwa sababu Serikali ya Ukraine imeona jeshi halitoshi na ikatangaza kugawa bunduki kwa raia 18,000. Hawana mafunzo ya kijeshi.

Tangu siku ya tatu, tunaambiwa habari za upande mmoja. Kiev tuliyoambiwa awali ingetekwa ndani ya saa 1, na kwamba viwanja vya ndege karibu vyote vilikuwa vimetekwa na Urusi, sasa tunaambiwa iko huru. Tunapewa takwimu za vifo vya askari wa Urusi.

Sitanii, kwa sasa tunaonyeshwa vifaru viwili, vitatu vya Urusi vilivyodunguliwa. Tunatangaziwa kuwa Ukraine wameua askari 4,300 wa Urusi. Hadi sasa kwa taarifa zinazotangazwa na BBC na CNN ambazo kwa bahati mbaya zinafanana neno kwa neno, zinaonyesha hakuna askari hata mmoja wa Ukraine aliyeuawa. Akili za kuambiwa, changanya na zako.

Wamesahau hata wale askari waliouawa wakatuonyesha waliokuwa katika Kisiwa kinachofahamika kama Snake Island. Ambao meli ya vita ya Urusi ilifuta wakazi wote wa kisiwa hiki katika uso wa dunia. Matangazo yanayoendelea sasa yanaonyesha wananchi 210 wa Ukraine ndio wameuawa na majeshi ya Urusi.

Vyombo hivi vya habari vya Magharibi vinasahau kuwa Rais wa Ukraine, Volodymyr Zelensky, ametamka mara kadhaa kuwa muda wowote maisha yake hapa duniani yatakoma kwa kuuawa. Marekani wamempa fursa ya kumwondoa Ukraine na kumpeleka mahala salama, yeye akasema anataka silaha si kusafirishwa nje ya nchi. Ukraine inaendelea kupata ushindi mkubwa kupitia vyombo hivi vya habari!!!!!

Sitanii, Afrika tunapaswa kuamka katika habari tunazolishwa kutoka vyombo vya Magharibi. Kwa sasa vifaru na mashambulizi yanayofanywa na Urusi havitangazwi popote. Habari katika mashirika haya makubwa zimekuwa za upande mmoja.

Wote wanaonyesha kumshambulia Urusi. Wanatangaza habari za anga kufungwa kwa ndege za Urusi, ila hawatangazi habari za kulipuliwa kwa bomba kubwa na hifadhi ya mafuta nchini Ukraine. Hawatangazi hatari inayolikabili Bara la Ulaya kuwa Urusi ndiye muuzaji wa mafuta namba mbili duniani na muuzaji wa gesi namba moja duniani.

Hawaelezi tena hasara wanayokwenda kupata nchi kama Ujerumani na nyingine za Ulaya zinazotegemea gesi kutoka Urusi kuendesha viwanda vyao na kuwapatia wananchi wao nishati majumbani. Kinachoangaliwa sasa ni siasa za Ubwanyenye na Ujamaa. Nchi za Magharibi zinapambana kupata furaha ya kuiangusha Urusi.

Hiyo Ukraine inayopiganiwa ilimegwa kutoka Urusi mwaka 1991. Nchi za Magharibi zinadaiwa kujitanua kwenda Ulaya Mashariki na hili ndilo analolipinga Rais Vladimir Putin. Anawaambia wakae huko waliko, wao wanasema wanataka kuiingiza Ukraine kwenye Umoja wa Kujihami wa Nchi za Magharibi (NATO).

NATO ilianzishwa mahususi mwaka 1949 kuupinga Umoja wa Kisovieti, uliokuwa unaongozwa na Urusi. Hapa kinachopambaniwa ni umiliki wa rasilimali gesi na mafuta kwa gharama ya kuua wananchi wa kawaida.

Sitanii, kama si ubabe, nchi hizi zingeweza kushirikiana zikatumia rasilimali hizi zinazogombewa kwa pamoja, ila umimi una nafasi kubwa kuliko upendo. Umefika wakati wa kumgeukia Mungu. Tuombe wakubwa hawa wafahamu kuwa ipo siku sote tutatoa hesabu za matendo yetu mbele ya Muumba wetu.

Nahitimisha makala yangu kama nilivyoianza kuwa, kwa vyovyote iwavyo, sijaona weledi, mizania na umahiri kwa jinsi vyombo vya Magharibi vinavyoripoti vita ya Urusi na Ukraine kwa kuandika habari za upande mmoja. Tuombe Mungu aiepushe dunia dhidi ya balaa la nyuklia.

Na Deodatus Balile, Zanzibar

Leo naandika makala hii nikiwa hapa eneo la Mlandege, Zanzibar. Nimemaliza mjadala wa kuelekea mwaka mmoja wa uongozi wa Rais Samia Suluhu Hassan. Mjadala huu ulihusu “Maendeleo katika Sekta ya Habari, Mawasiliano na Teknolojia ya Habari.” Waendesha mjadala waliuliza, sisi wanatasnia ya habari tunauonaje mwaka mmoja wa uongozi wa Rais Samia?

Sitanii, mjadala ulikuwa mzuri mno. Wachangiaji walieleza tulikotoka, tulipo na matumaini ya siku za usoni. Mkurugenzi wa Radio One/ITV, Joyce Mhaville, ameeleza sura halisi anayoiona kuwa chini ya Rais Samia kuna mwelekeo mzuri kwa vyombo vya habari katika eneo la uhuru na uchumi.

Wala alichosema Dada Joyce siyo siri. Tumeshuhudia Februari 10, 2022 Waziri wa Habari, Mawasiliano na Teknolojia ya Habari, Nape Nnauye, amefungulia magazeti ya Mwanahalisi, Tanzania Daima, Mawio na Mseto. Ni bahati mbaya kutokana na sekta kupigika kiuchumi kwa muda mrefu, pamoja na kufunguliwa magazeti haya hayajaanza kuchapishwa kwa sababu za kiuchumi. 

Hiki nacho ni kitisho kingine cha uhuru wa habari. Magazeti yana leseni, hayazuiwi, ila yana ukata. Tuombe Mungu alichosema Dada Joyce kuwa uchumi umeanza kurudi kwenye vyombo vya habari kizae matunda haraka. Natamani kuona magazeti haya yakirejea sokoni, yakiwa na habari zilizosheheni ukweli kuwahudumia wananchi.

Nikiri katika mjadala nilioutaja hapo juu, Waziri Nape amenikosha. Kuna wachangiaji wawili walitaka magazeti na mitandao ya kijamii ifungiwe. Nilisema kwa uchungu kidogo. Niliwashangaa wachangiaji hawa, kwani huko katika ‘fungafunga’ ya vyombo vya habari ndiko tunakotoka, wao bado wana hamu ya kufungia. Niliomba mawazo yao yasubiri miaka 200 ijayo.

Sitanii, mimi nikimwangalia Rais Samia ana nia ya dhati ya kuunganisha Watanzania. Tulishuhudia mara tu baada ya Makamu Mwenyekiti wa Chama cha Demokrasia na Maendeleo (CHADEMA), Tundu Lissu, kupigwa risasi, alisafiri hadi Nairobi, Kenya kumjulia hali. Pamoja na hali ngumu ya uhuru wa kujieleza iliyokuwapo, alivaa ujasiri akamjulia hali.

Msomaji usidhani lilikuwa jambo rahisi. Balozi Joseph Sokoine aliyekwenda hospitalini Brussels, Ubelgiji kumwona Lissu, alitenguliwa ubalozi. 

Ni wazi kama Rais Samia wakati huo asingekuwa Makamu wa Rais na kwamba Katiba au hakuna sheria inayomruhusu Rais kutengua ushindi wa Mgombea Mwenza, basi naye sheria ingeruhusu, huenda angetenguliwa.

Nilisoma makala ya Mwandishi Mkongwe, Absalom Kibanda, aliyekuwa anaandika safu ya TUENNDAKO, ambayo nayo chini ya Awamu ya Tano safu hii ilikufa kifo cha asili, kwamba kabla ya kifo cha safu hii alisema: “Nchi imetoka katika nyakati za hatari, imeingia katika nyakati za giza.” Kilichotokea nyakati zilizopita ni cha kuandikia kitabu, na naomba Mungu anijalie nipate nguvu niandike kitabu hiki, pengine miaka 500 ijayo Watanzania wasirejee makosa yaliyofanywa na kizazi chetu katika uchaguzi wa mwaka 2015. Najua kuna baadhi ya wanufaika kwa kusema hivi mnafuka moshi kwa ndani.

Sitanii, nafahamu bado kuna masalia. Hata huko kwenye mitandao ya kijamii kwenye hiyo inayoitwa Club House, nako masalia hayakosekani. Nimesikiliza mjadala unaoendeshwa baadhi wakimmwagia matusi Rais Samia kwa kukutana na Lissu huko Ubelgiji. Wanamwita kila jina baya, ila unahitajika umakini kufahamu iwapo wanaorusha matusi si sehemu ya masalia.

Nafahamu hata baadhi ya watendaji kuna kambi. Kuna wale wenye mfumo dume, kuna wale waliokuwa wanufaika wa ukandamizaji wa Watanzania. Kwa sasa tumepumzika kusikia watu wakifikishwa Kisutu, maana ilifanywa mara nyingi, hadi watu wakaacha kuona anayefikishwa mahakamani ni mdhambi. 

Nimewahi kuliandika hili, Lissu amemwomba Rais Samia na mimi naomba kulirejea. Tanzania ni nchi ya amani. Tanzania udugu wetu ni zaidi ya majirani zetu wafanyavyo. Sisi si taifa la visasi.

Desemba 15, 2021 pale jijini Dodoma, Rais Samia ulitwambia enzi za kusema “amani inapatikana kwa ncha ya upanga zimepitwa na wakati”. Ulitusihi tuitafute amani ya Tanzania kwa “ncha ya ulimi”. Nafahamu Mahakama imetoa uamuzi wa awali kuwa Mwenyekiti wa Chadema, Freeman Mbowe na wenzake wana kesi ya kujibu.

Sitanii, Mheshimiwa Rais Samia wewe ni jasiri. Hakuna lililokuwa jambo gumu kama ulipounda Kamati ya Wataalamu, wakakushauri ukabadili msimamo kuhusu ugonjwa wa Corona na kusema tuanze kuchukua tahadhari kama nchi. Hili lilikuwa gumu, kwani Watanzania walikwisha kuaminishwa kuwa Corona ni vita ya kiuchumi. Nilihoji hii vita inailenga Tanzania pekee? Sikujibiwa.

Nikahoji mbona Marekani, Uingereza, Brazil, Italia, Afrika Kusini na kwingine wanakufa kwa Corona? Mbona ilifika wakati vitanda vikajaa wagonjwa katika hospitali zetu hadi mtu akakosa nafasi ya kumlaza ndugu yake hospitalini? 

Achilia mbali kupewa matibabu. Mbona kipindi hicho nyumba za kuhifadhia maita (mortuary) zilijaa hata Wakristo wakalazimika kuzika siku hiyo hiyo kama Waislamu? Mambo ni mengi siwezi kuyataja yote. Kubwa, nafahamu umeunda Kikosi Kazi kupitia hali ya siasa nchini. Hapana shaka kitashauri. Niishie hapo kwa hili.

Narudia, uamuzi ulioufanya wakati wa Corona ulikuwa mkubwa na mzito kuliko hii kesi inayochafua taifa letu. Neno UGAIDI si la kutajataja katika nchi. Tukiwatangazia mataifa ya wenzetu kuwa hapa kwetu kuna magaidi, tujue tunafukuza watalii, wawekezaji na tunahatarisha usalama wa nchi yetu. Kumtangaza mtu kuwa ni gaidi kunapaswa kuwa mchakato mrefu na shirikishi, unaoihusisha Mahakama. Hili neno tukiendelea kulitumia tunaharibu wenyewe heshima ya nchi yetu. 

Sitanii, bila kupepesa macho, naomba kitumike Kifungu cha 91(1) cha Sheria ya Mwenendo wa Mashitaka, kinampa DPP madaraka ya kuondoa mahakamani shauri lolote ambalo halijatolewa hukumu. 

Nafahamu Mama umetenda mengi mazuri. Nakuomba kupitia kwa DPP ulimalize hili, nchi iondokane na joto lisilo la lazima.

Nafahamu kama nilivyosema hapo juu, bado tunayo masalia. Pia hata baadhi ya wasaidizi wako ni mateka wa mfumo dume. Wapo wanaosema: “Kama Rais angekuwa mwanamume Mbowe angetoa kauli kama hizi?” Haya wanayatumia kuhalalisha hulka zao za kutaka watu wateseke, nchi ichemke isiwe na amani. 

Jamii sasa inaacha kujadili madarasa 18,000 uliyojenga, vituo 420 vya Afya unavyojenga tena ukaweka madirisha ya aluminium, visima vya maji… inajadili mashahidi wanaougua kizimbani. Inajadili mashahidi wanaosema hawajui nini kilitokea. Wanajadili kesi ya ugaidi wa Sh 600,000. Mama nakuomba liponye taifa letu vidonda vya ukatili. Tulikotoka siko, umekwishasema tushikane mikono. Kama nilivyosema, iwapo ulilimaliza la Corona, hushindwi hili la Mbowe.

Kama ni adabu, ameishaishika. Ametimiza miaka 60 akiwa jela. Ni historia asiyoweza kuifuta. Jamii yetu naamini haijafikia mahala pa kuulizwa kati ya Yesu na Baraba aachiwe nani tukasema Barabaaaaaaa…. Mheshimiwa Rais mimi nakuamini, naamini mengi uliyoyafanya, wala usisikilize hizo kelele za mtandaoni, kuna waliopandikizwa wakutoe kwenye ajenda ya maendeleo, uanze kuhangaika na watu. Njia hiyo si salama sasa na baadaye huko tuendako. Mungu ibariki Tanzania.