Baraza la Mitihani la Tanzania (NECTA) limetangaza matokeo ya Mtihani wa Kidato cha Sita na Mitihani ya Ualimu ya Mei 2026, yakionyesha ongezeko la kiwango cha ufaulu ambapo watahiniwa wa shule wamefaulu kwa asilimia 99.92.
Akizungumza wakati wa kutangaza matokeo hayo, Katibu Mtendaji wa NECTA, Profesa Said Ally Mohamed, alisema kati ya watahiniwa 125,320 wa shule waliopata matokeo, watahiniwa 125,056 wamefaulu kwa kupata madaraja ya Kwanza, Pili, Tatu na Nne. Kwa upande wa watahiniwa wa kujitegemea, waliofaulu ni 6,012, sawa na asilimia 94.
Kwa ujumla, watahiniwa 124,663, sawa na asilimia 99.6, walipata madaraja ya Kwanza, Pili na Tatu, hali inayoonyesha kuwa ubora wa ufaulu umeendelea kubaki zaidi ya asilimia 99 kwa miaka minne mfululizo.
Aidha, idadi ya watahiniwa waliopata Daraja la Kwanza imeongezeka kutoka 61,020 mwaka 2025 hadi 67,606 mwaka 2026, ikiwa ni ongezeko la asilimia 5.5. Daraja la Kwanza sasa linawakilisha asilimia 54.11 ya watahiniwa wote waliopata matokeo.
Kwa upande wa jinsia, wasichana waliofaulu ni 61,703, sawa na asilimia 99.94, huku wavulana waliofaulu wakiwa 63,323, sawa na asilimia 99.91, jambo linaloonyesha kuwa tofauti ya ufaulu kati ya jinsia hizo ni ndogo.
Katika mchepuo wa sayansi asilia, watahiniwa 38,118 walipata madaraja ya Kwanza na Pili, wakilinganishwa na 37,677 mwaka 2025 na 31,386 mwaka 2024. Mchepuo wa Historia, Kiswahili na Lugha (HKL) uliongoza kwa kuwa na zaidi ya asilimia 95 ya watahiniwa waliopata Daraja la Kwanza na Pili.
Kwa upande wa shule, kati ya shule 1,064 zilizokuwa na matokeo, shule 757, sawa na asilimia 71, zilipata wastani wa Daraja C, huku shule 943, sawa na asilimia 88, zikipata wastani wa Daraja A hadi C. Hakuna shule iliyopata wastani wa Daraja F mwaka huu.
Katika ufaulu wa masomo, karibu masomo yote yalikuwa na kiwango cha ufaulu cha zaidi ya asilimia 93. Somo la Basic Applied Mathematics (BAM) ndilo lililokuwa na ufaulu wa chini zaidi wa asilimia 80.5, lakini bado limeonyesha ongezeko kutoka asilimia 73 mwaka 2025.
Kwa upande wa usajili wa mtihani, jumla ya watahiniwa 133,647 walijiandikisha kufanya Mtihani wa Kidato cha Sita katika vituo 2,992 nchini. Kati yao, wasichana walikuwa 65,217 na wavulana 68,491. Mahudhurio ya watahiniwa wa shule yalikuwa asilimia 99.22, huku ya watahiniwa wa kujitegemea yakifikia asilimia 91.35.
