Na Mwandishi Wetu, JamhuriMedia, Ruangwa

Naibu Waziri wa Ardhi, Nyumba na Maendeleo ya Makazi ambaye pia ni Mbunge wa Jimbo la Ruangwa, Kaspar Mmuya, amezindua rasmi jengo la kupumzikia ndugu wa wagonjwa katika Hospitali ya Wilaya ya Ruangwa, mradi uliogharimu Shilingi milioni 35 kupitia Mfuko wa Jimbo la Ruangwa.

Mradi huo unalenga kuboresha mazingira ya utoaji wa huduma za afya kwa kuwapatia ndugu wa wagonjwa sehemu salama, yenye hadhi na inayowalinda dhidi ya jua, mvua na vumbi wanapokuwa wakisubiri wagonjwa wao kupata matibabu.

Akizungumza Agosti 3, 2026 wakati wa uzinduzi huo uliofanyika wilayani Ruangwa, Mhe. Mmuya amesema Serikali ya Awamu ya Sita chini ya Rais Dkt. Samia Suluhu Hassan imeendelea kupeleka fedha za maendeleo zinazogusa mahitaji halisi ya wananchi kupitia Mfuko wa Jimbo na mifuko mingine ya maendeleo.

Amesema uamuzi wa kutenga Shilingi milioni 35 kwa ajili ya ujenzi wa jengo hilo ulitokana na changamoto iliyokuwa ikiwakabili ndugu wa wagonjwa waliolazimika kukesha nje ya hospitali katika mazingira yasiyo salama.

Aidha, amewataka viongozi na watumishi wa sekta ya afya kutunza miundombinu hiyo ili iendelee kutoa huduma kwa ufanisi na kunufaisha wananchi kwa miaka mingi ijayo.

Kwa upande wake, Kaimu Mganga Mkuu wa Wilaya ya Ruangwa, Dkt. Msafiri Njaidi, amesema kukamilika kwa jengo hilo kutaboresha mazingira ya utoaji wa huduma kwa wagonjwa na ndugu zao kwa kuondoa changamoto ya kukosekana kwa sehemu salama ya kupumzikia.

Amesema jengo hilo pia litasaidia kupunguza msongamano katika maeneo ya kutolea huduma, hatua itakayochangia kuimarisha usafi wa mazingira na utekelezaji wa kanuni za kudhibiti maambukizi ya magonjwa mbalimbali.

Naye Kaimu Mtendaji wa Kata ya Nachingwea, Bi. Angel Mtengwa, amesema mradi huo ni ushahidi wa namna fedha za maendeleo zinavyoweza kutatua changamoto halisi za wananchi pale zinapotumika kwa ufanisi na kusimamiwa vizuri.

Amesema jengo hilo litawanufaisha wananchi wanaotoka maeneo ya mbali kwa kuwapatia sehemu salama ya kupumzika wanapokuwa wakisubiri ndugu zao wanaopatiwa matibabu katika Hospitali ya Wilaya ya Ruangwa.

Ujenzi wa jengo hilo ulianza Machi 12, 2026 na kukamilika kwa gharama ya Shilingi milioni 35 zilizotolewa kupitia Mfuko wa Jimbo la Ruangwa. Mradi huo ni sehemu ya jitihada za Serikali za kuendelea kuboresha huduma za afya na kuhakikisha wananchi wanapata huduma katika mazingira bora, salama na yenye utu.

Naibu Waziri wa Ardhi, Nyumba na Maendeleo ya Makazi na Mbunge wa Jimbo la Ruangwa, Mhe. Kaspar Mmuya, akizungumza na wananchi wakati wa uzinduzi wa jengo la kusubiria ndugu wa wagonjwa katika Hospitali ya Wilaya ya Ruangwa. Jengo hilo lenye thamani ya Shilingi milioni 35, lililojengwa kupitia Mfuko wa Jimbo la Ruangwa, linalenga kuboresha mazingira ya huduma za afya kwa kuwapatia ndugu wa wagonjwa sehemu salama ya kupumzika.
 Mwonekano wa jengo jipya la kusubiria ndugu wa wagonjwa katika Hospitali ya Wilaya ya Ruangwa, lililozinduliwa rasmi na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya. Mradi huo wa Shilingi milioni 35 umejengwa kupitia Mfuko wa Jimbo la Ruangwa kwa lengo la kuwaondolea wananchi adha ya kukesha nje ya hospitali.
Kaimu Mganga Mkuu wa Wilaya ya Ruangwa, Dkt. Msafiri Njaidi, akiwasilisha taarifa ya mradi wa ujenzi wa jengo la kusubiria ndugu wa wagonjwa kabla ya uzinduzi rasmi uliofanywa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya. Dkt. Njaidi amesema mradi huo utaboresha mazingira ya utoaji wa huduma na kuongeza ustawi wa wagonjwa pamoja na ndugu zao.
Naibu Waziri wa Ardhi, Nyumba na Maendeleo ya Makazi na Mbunge wa Jimbo la Ruangwa, Mhe. Kaspar Mmuya, akizindua rasmi jengo la kusubiria ndugu wa wagonjwa katika Hospitali ya Wilaya ya Ruangwa. Jengo hilo lililojengwa kwa gharama ya Shilingi milioni 35 kupitia Mfuko wa Jimbo la Ruangwa ni sehemu ya juhudi za Serikali ya Awamu ya Sita za kuboresha huduma za afya na kuhakikisha wananchi wanapata huduma katika mazingira salama na yenye hadhi.
 Baadhi ya wananchi wa Wilaya ya Ruangwa wakishuhudia uzinduzi wa jengo la kusubiria ndugu wa wagonjwa katika Hospitali ya Wilaya ya Ruangwa. Mradi huo wa Shilingi milioni 35, uliozinduliwa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya, unalenga kuboresha ustawi wa wananchi kwa kuwapatia sehemu salama na yenye hadhi wakati wa kuwahudumia wagonjwa wao.

Post Views: 110