Serikali ya Awamu ya Sita chini ya Rais Dkt. Samia Suluhu Hassan imetoa zaidi ya Sh.trilioni 4.7 kwa ajili ya mikopo na ruzuku kwa wanafunzi wa elimu ya juu tangu ilipoingia madarakani, ikiwa ni sehemu ya juhudi za kuhakikisha vijana wanapata fursa ya elimu na kutimiza ndoto zao.
Mkurugenzi Mkuu wa Bodi ya Mikopo ya Wanafunzi wa Elimu ya Juu (HESLB), amesema hayo alipokuwa akiwasilisha taarifa kwa wajumbe wa Kamati ya Ustawi wa Jamii na Kamati ya Fedha ya Baraza la Wawakilishi la Serikali ya Mapinduzi Zanzibar, waliotembelea Bodi hiyo kwa lengo la kujifunza uzoefu wa uendeshaji wake.
Amesema kiasi hicho ni sehemu kubwa ya fedha takribani Sh.trilioni 9 ambazo HESLB imekwishatoa tangu kuanzishwa kwake, huku zaidi ya nusu ya fedha hizo zikitolewa katika kipindi cha uongozi wa Serikali ya Awamu ya Sita.
Mkurugenzi huyo amesema katika mwaka wa masomo 2021/2022, HESLB ilitoa mikopo kwa wanafunzi wapya na wanaoendelea na masomo, huku idadi ya wanufaika ikiendelea kuongezeka katika miaka iliyofuata.
Amesema katika mwaka uliopita, jumla ya wanafunzi zaidi ya 212,000 walinufaika na mikopo, ambapo takribani 181,000 walikuwa wanafunzi wanaoendelea na masomo, hatua inayoonyesha ongezeko la mahitaji na jitihada za Serikali kupanua fursa za elimu ya juu.
Ameeleza kuwa kwa mwaka huu wa masomo, Serikali inatarajia kutoa zaidi ya Sh.trilioni 1.1 kwa ajili ya mikopo ya wanafunzi, ikiwa ni ongezeko linalolenga kuwafikia vijana wengi zaidi wenye uhitaji wa msaada wa kifedha.
Amesema HESLB haitoi mikopo pekee, bali pia inatoa ruzuku kwa wanafunzi wanaokidhi vigezo, huku ruzuku hiyo ikitolewa kwa kuzingatia ufaulu wa mwanafunzi (merit-based), badala ya kutegemea mahitaji pekee.
Amefafanua kuwa wanafunzi wanaopata ruzuku kwa mujibu wa utaratibu huo wanaweza kunufaika kwa kugharamiwa mahitaji mbalimbali ya masomo, ikiwemo ada na bima ya afya, kulingana na masharti yaliyowekwa.
Mkurugenzi huyo amesema katika kutathmini uhitaji wa mwanafunzi, Bodi huzingatia sifa mbalimbali za ziada, ikiwemo kuwa yatima, ambapo taarifa kutoka mamlaka husika hutumika kuthibitisha hali hiyo.
Amesema Bodi pia imeunganisha mifumo yake na taasisi mbalimbali ili kubaini wanafunzi waliowahi kufadhiliwa katika ngazi za awali za elimu, wanaotoka katika kaya maskini, wenye ulemavu pamoja na wanafunzi ambao wazazi wao wamefungwa na hivyo kukabili mazingira magumu ya maisha.
Ameeleza kuwa katika utoaji wa mikopo, HESLB hugharamia mahitaji mbalimbali yakiwemo ada, chakula na malazi, vitabu na vifaa vya masomo, mafunzo kwa vitendo, utafiti pamoja na mahitaji maalum kwa wanafunzi wanaosoma kozi zinazohitaji vifaa maalum.
Amesema malipo hayo hayatoi fedha zote moja kwa moja kwa mwanafunzi, bali Bodi hulipa ada moja kwa moja chuoni na kwa chakula na malazi huzingatia idadi ya siku ambazo mwanafunzi anakaa katika chuo husika.
Ameongeza kuwa HESLB imeanza pia kutoa mikopo kwa wanafunzi wa vyuo vya kati katika kozi za kipaumbele, ikiwemo sayansi shirikishi, elimu, usafiri na usafirishaji, uhandisi, nishati na madini, afya pamoja na kilimo, huku Zanzibar pia ikiwa miongoni mwa maeneo yanayonufaika na programu hizo.
Amesema hatua hizo zinaonyesha namna Serikali ya Awamu ya Sita inavyoweka msisitizo katika elimu kwa vijana, kwa kuwa uwekezaji huo unalenga kuwawezesha kupata elimu, kutimiza ndoto zao, kusaidia familia zao na hatimaye kuchangia katika maendeleo ya uchumi wa Taifa.
