Biashara

Baraza la Taifa la Hifadhi na Usimamizi wa Mazingira (NEMC) limeteketeza vifungashio tani 44.4 ambavyo vimepigwa marufuku kwa matumizi, ambapo uteketezaji huo umefanyika katika kiwanda cha Saruji cha Twiga Cement Jijini Dar es Salaam.

Akizungumza katika zoezi hilo ambalo limefanyika leo Septemba 14,2022 Mkuu wa Wilaya ya Kinondoni Godwin Gondwe amesema katika tani 44.4 za mifuko ambayo imekamatwa na kuteketezwa, mifuko tani 41 zimekamatwa katika Wilaya ya Kinondoni.

Amesema wataendelea kuhakikisha zoezi hilo linakuwa endelevu kuhakikisha mifuko ya plastiki inaondoka katika mazingira ili kuokoa viumbe hai ambavyo vingeweza kuathirika na mifuko hiyo.

Kwa upande wake Mkurugenzi Mkuu wa Baraza la Taifa la Hifadhi na Usimamizi wa Mazingira (NEMC), Dkt. Samuel Gwamaka amesema uwepo wa vifungashio hivyo vinaathiri afya za binadamu na wanyama kwani kumekuwa na matumizi ambayo si sahihi hasa kufungashia chakula cha moto na kusababisha kumleta madhara ya kiafya kama saratani na magonjwa ya damu.

“Hivi vifungashio havitakiwi kuwa sokoni ndo maana tunachukua jukumu la kuteketeza ili kuwaonyesha wengine kwamba hivi vifungashio havipaswi kuwa kwenye mazingira kwasababu vikiingia kwenye mazingira vitaathiri ustawi wa jamii”. Amesema Dkt.Gwamaka.

Aidha Dkt.Gwamaka amesema zoezi hilo linaendelea kwa mikoa mingine kukamata vifungashio hivyo, na amewataka wananchi kuacha mara moja kutumia mifuko ya plastiki ili kulinda afya zao na wanyama.

Na Mwandishi Wetu,JamhuriMedia, Dar

Mkuu wa Mkoa wa Dar es Salaam, Amos Makalla ametangaza kuondoa katazo lililokuwa likizuia mabasi yaendayo mikoani na nje ya nchi kutoruhusiwa kupakia abiria au kushusha katika vituo binafsi na badala yake ameruhusu utaratibu huo kuendelea kwa sharti la kila basi kuingia ndani ya Kituo Kikuu cha Mabasi cha Magufuli.

RC Makalla ametoa maamuzi hayo wakati wa kikao cha pamoja baina ya Mamlaka ya Udhibiti Usafiri Ardhini (LATRA),wamiliki wa stendi binafsi na Halmashauri ya Ubungo na kubaini pasipokuwa na shaka kuwa waliotengeneza vituo binafsi walifuata taratibu na kupatiwa vibali na LATRA baada ya kukidhi vigezo.

Miongoni mwa vigezo vilivyotolewa na LATRA ili kuruhusiwa kuanzisha stendi binafsi ni pamoja na uwepo wa vyoo, sehemu ya mapumzimo kwa abiria, virutubisho na sehemu ya maegesho.

Kutokana na hilo, RC Makalla ameridhia vituo binafsi vitano vilivyohakikiwa kuendelea kutoa huduma na kufungua milango kwa wamiliki wengine wanaohitaji kuwa na vituo binafsi kushirikiana na LATRA ili wapatiwe vigezo vinavyohitajika ambapo wamepewa mamlaka ya kufuta au kutoa leseni.

Aidha, RC Makalla ameagiza Halmashauri ya Manispaa ya Ubungo kukaa kikao mara moja na wamiliki wa stendi binafsi ili kuona njia bora ya ukusanyaji wa mapato.

Na Mwandishi Wetu, JamhuriMedia,Dodoma

Waziri wa Maliasili na Utalii Balozi Dkt. Pindi Chana ameishukuru Kamati ya Kudumu ya Bunge ya Ardhi, Maliasili na Utalii kwa jitihada inazofanya za kuishauri na kutoa maoni yanayoiwezesha Serikali kutekeleza mipango mbalimbali ya maendeleo kupitia Sekta ya Maliasili na Utalii.

Waziri Balozi Dkt. Pindi Chana ameyasema hayo leo Jijini Dodoma kwenye kikao cha Kamati ya Kudumu ya Bunge ya Ardhi, Maliasili na Utalii na Wizara ya Maliasili na Utalii akieleza kuwa Wizara anayoiongoza itaendelea kutekeleza majukumu kwa ufanisi na kuunga mkono kazi kubwa aliyoifanya Rais wa Jamhuri ya Muungano wa Tanzania Mhe Samia Suluhu Hassan kwenye Wizara hiyo kwa kuhakikisha lengo la kuongeza mapato na idadi ya watalii linafikiwa.

Waziri Balozi Dkt. Pindi Chana ameongeza kuwa licha ya uwepo wa janga la UVIKO-19, Programu aliyoanzisha Rais Samia Suluhu Hassan ya Tanzania The Royal Tour imezidi kuitangaza vyema Tanzania na kuongeza idadi ya watalii na mapato na kwamba hiyo ni ishara kuwa Sekta ya utalii inaendelea kuimarika baada ya Janga la UVIKO -19.

“Ni ukweli usiopingika kuwa kupitia ushauri wa Kamati hii, Wizara imekuwa ikitekeleza majukumu yake kwa ufanisi mkubwa na hivyo kuleta tija katika maendeleo ya Taifa letu husuan kukuza uchumi na ustawi wa maisha ya Watanzania” Amesisitiza Mhe. Balozi Dkt.Chana.

Katika kikao hicho kilichohudhuriwa na Waziri wa Maliasili na Utalii, Mhe. Balozi Dkt. Pindi Chana, Naibu Waziri wa Maliasili na Utalii, Mhe. Mary Masanja (Mb), Katibu Mkuu Wizara ya Maliasili na Utalii, Prof. Eliamani Sedoyeka , Wakurugenzi wa Wizara na baadhi ya Wakuu wa Taasisi , Wizara ya Maliasili na Utalii imewasilisha taarifa ya Utekelezaji wa Chuo cha Viwanda wa Misitu (FITI) na taarifa ya utekelezaji ya miaka 4 ya Mradi wa Kuongeza Mnyororo wa Thamani ya Mazao ya Misitu (FORVAC).

Na Mwandishi Wetu,JamhuriMedia,Kilimanjaro

Benki ya NMB leo imezindua rasmi mashine ya kubadilisha fedha (Forex – ATM) katika uwanja wa ndege wa kimataifa wa Kilimanjaro (KIA) yenye uwezo wa kubadili fedha za kigeni kwenda shilingi za Kitanzania. Hii ni hatua nyingine muhimu kwa Benki ya NMB ya utoaji huduma kwa Watanzania wanaosafiri kutoka nje, watalii na wageni wanaokuja nchini Tanzania.

Akizungumza katika hafla ya uzinduzi uwanjani hapo, Afisa Mtendaji Mkuu wa NMB,Ruth Zaipuna amesema, wateja na hata wasio wateja wa NMB sasa wanaweza kubadilisha fedha hadi kiasi cha Dola za Kimarekani 2,000 kwa wakati mmoja kwa viwango vya kubadilishia fedha vya Benki ya NMB kwa kujihudumia wenyewe kwa kutumia mashine hii ya ATM katika uwanja huo. Aliongeza kuwa, mashine hii pia inauwezo wa kubadilisha Euro za Umoja wa Ulaya na Pauni ya Uingereza kwenda shilingi ya Tanzania.

Uzinduzi huu ni muendelezo wa huduma hizo zilizozinduliwa kwa mara ya kwanza na NMB Jijini Dar es Salaam kwenye uwanja wa ndege wa kimataifa wa Julius Nyerere na Benki hiyo inatarajia kupeleka huduma hizo maeneo mengine ikiwemo uwanja wa ndege wa Kimataifa Abeid Amani Karume (AAKIA) Zanzibar na Zanzibar Stone Town.

Ruth amesizitiza kuwa, sasa watakao hitaji kubadili fedha uwanjani hapo, watajihudumia wenyewe wakati wote masaa 24/7 na wameanza na aina hizo tatu za sarafu, lakini muda sio mrefu wataongeza na fedha za mataifa mengine.

Mgeni rasmi katika hafla ya uzinduzi huo, Mkuu wa Mkoa wa Kiliamanjaro Nurdin Hassan Babu ameipongeza Benki ya NMB kwa kuanzisha huduma hiyo muhimu kwani imesubiriwa kwa muda mrefu mkoani hapo, ikizingatiwa kuwa mkoa huo umekuwa ukipokea wageni wengi wa kigeni ambao ndio wenye uhitaji mkubwa wa kubadili fedha.

Kwa upande wake Mkurugenzi Mkuu wa Uwanja wa ndege wa Kimataifa wa Kilimanjaro (KIA) Bi. Christina Makatobe, amesema huduma hiyo ni muhimu kwa taasisi hiyo haswa ikitiliwa maanani KIA ni lango la kuingilia wasafiri kwa wingi, wengi wao wakiwa ni watalii na sasa hata wanaoingia uwanjani hapo nyakati za usiku watabadilisha fedha kwa kujihudumia wenyewe – hii itakuwa kivutio cha watalii wengi nchini kutokana na ukweli huduma bora haswa za kifedha ni moja ya vigezo ambavyo watalii hufuatilia kabla ya kutembelea nchi husika.

Christina aliiahidi kuendelea kushirikiana na NMB kuhakikisha wanaungana katika kuweka mazingira mazuri ya kuboresha sekta ya utalii nchini hasaa kupitia watumiaji wa uwanja wa KIA

Mkurugenzi Mtendaji na Mwanzilishi wa Telegram, Pavel Durov, ameikaishifu Apple kutokana na mchakato wa kampuni hiyo wa kukagua duka la Programu (Apple Store) “usio wazi” ambao unaichelewesha Telegram kutoa sasisho (ku-“Update”) kwa programu yake ambayo “itabadilisha jinsi watu wanavyojieleza katika kutuma ujumbe.”

Kupitia idhaa yake katika mtandao wa Telegram Durov amesema kwamba sasisho (updates) la Telegram katika iOS ambalo linatarajiwa kubadilisha jinsi watu wanavyowasiliana limekwama katika mchakato wa ukaguzi wa duka la program la Apple (Apple Store) kwa zaidi ya wiki mbili sasa bila mawasiliano kutoka kwa kampuni hiyo juu ya kwanini au lini itaidhinishwa

Durov anadokeza kwamba ikiwa program maarufu kama Telegram inapokea huduma ya namna hiyo kutoka kampuni ya Apple basi anaweza kufikiria matatizo na changamoto zinazowakumba watengenezaje wa progamu ndogo Zaidi.

“Unaweza kufikiria matatizo yanayokumba wasanidi programu wadogo zaidi.
Kwa mfano,sasisho (update) letu lijalo ambalo linakaribia kuleta mapinduzi ya jinsi watu wanavyojieleza katika utumaji ujumbe limekwama katika ukaguzi wa Apple kwa wiki mbili sasa, bila maelezo au maoni yoyote kutoka Appl.” amesema Durov

Hata hivyo haijulikani mpaka sasa ni kwa nini Apple inachelewesha sasisho la program ya Telegram ili kuwafikia mamilioni ya watumiaji wa mtandao huo.

Kwa kawaida programu nyingi hukaguliwa kwa haraka sana na kuidhinishwa na hivyo tukio hili la Apple linazua hisia tofaui juu ya mtandao wa Telegram

Kupitia tovuti yake Apple inasema “kila wiki zaidi ya wataalamu 500 waliojitolea duniani kote hukagua zaidi ya program laki moja na zaidi ya mawasilisho milioni moja hukataliwa”

Durov alijadili hali hiyo isiyoelezeka kama sehemu ya ukosoaji mpana wa miundo ya bishara ya duka la program (Apple Store), hata hivyo si mara yake ya kwanza kuwakoromea Apple. Mnamo mwaka 2018 pia amesema kuwa Apple imekuwa ikizuia sasisho la program za Telegram ndani ya iOS, mara baada ya Urusi kuipiga marufuku Telegram na baada ya siku moja iliidhinishiwa sasisho.

Telegram ni programu inayowawezesha watumiaji kutuma ujumbe kwa njia ya maandishi picha video na sauti kama ilivyo program ya Whatsapp.

Mnamo Januari 2021,Telegram ilipita watumiaji milioni 500 wanaotumia kila mwezi. Ilikuwa programu iliyopakuliwa zaidi mnamo Januari 2021 ikipakuliwa mara bilioni 1 duniani kote kufikia mwishoni mwa Agosti 2021. Mnamo Juni 2022, Telegram ilipita watumiaji milioni 700 wanaotumia kila mwezi.

Hivi majuzi Telegram ilizindua usajili wake wa kulipia (Premium) ambao hugharimu Sh.11,500 kwa mwezi, ambao huwapa watumiaji waliojisajili uwezo wa kufikia vipakiaji vikubwa zaidi, upakuaji wa haraka, kipengele cha kutuma sauti kwa maandishi, miitikio ya kipekee ya emoji, na zaidi.