TAKRIBANI watu 68 wamefariki katika mgongano wa treni mbili za mwendo kasi nchini Uhispania. Waziri wa Uchukuzi amesema moja iliruhusiwa kuendelea baada ya hitilafu ya mfumo wa usalama, licha ya ishara ya kusimama.
Watu 68 wamefariki baada ya treni ya mwendo kasi kuigonga kwa nyuma treni nyingine iliyokuwa imesimama kwenye reli katikati mwa Uhispania Jumatano. Serikali ya mkoa wa Castilla-La Mancha imethibitisha idadi hiyo na kusema watu wengine 58 walihitaji matibabu hospitalini, huku waokoaji wakiendelea kutafuta manusura na miili kwenye mabaki ya mabehewa.
Ajali imetokea katika jimbo la Toledo, kwenye eneo la mashambani kati ya Urda na Los Yébenes, takribani kilomita 130 kusini mwa Madrid. Treni zote mbili zilikuwa zikisafiri kuelekea kusini, kutoka mji mkuu Madrid kwenda Seville.
Kwa mujibu wa mamlaka, treni ya shirika la serikali la Renfe iliigonga treni ya kampuni binafsi ya Iryo iliyokuwa imesimama. Mgongano huo ulisababisha mabehewa mawili kuacha njia na kuanguka chini ya tuta la reli. Treni hizo zilikuwa zimebeba jumla ya abiria 544: watu 397 katika Renfe na 147 katika Iryo.
Picha kutoka eneo la ajali zimeonyesha mabehewa yaliyoharibika vibaya, huku vipande vya vyuma na mabaki mengine vikiwa vimesambaa kwenye reli na mteremko ulio pembeni yake. Timu za dharura zimeelekeza juhudi katika mabehewa mawili yaliyopata uharibifu mkubwa zaidi.
Waziri wa Uchukuzi Óscar Puente amesema mgongano huo ulitanguliwa na hitilafu ya mfumo wa usalama na agizo kutoka kituo cha udhibiti alilolitaja kuwa “lisiloelezeka.” Maelezo yake yameelekeza maswali ya awali katika maamuzi yaliyofanywa baada ya hitilafu hiyo, ingawa uwajibikaji wa wahusika bado haujabainishwa.
Uhispania, Urda 2026 | Waokoaji katika eneo la ajali baada ya mgongano wa treni mbiliUhispania, Urda 2026 | Waokoaji katika eneo la ajali baada ya mgongano wa treni mbili.
