Na Prosper Makene
Dar es Salaam, Tanzania – Jumamosi, 1 Agosti 2026: Katibu Mkuu, Wizara ya Habari, Utamaduni, Sanaa na Michezo, Bw. Gerson Msigwa amesema michezo imeendelea kuwa daraja muhimu la kuimarisha urafiki na ushirikiano kati ya Tanzania na China.
Msigwa aliyasema hayo wakati wa ufunguzi rasmi wa Mashindano ya 13 ya Mpira wa Kikapu ya Jamii ya Wachina yaliyofanyika katika Viwanja vya Don Bosco, Namanga. Mashindano hayo yamedhaminiwa na Stanbic Bank kwa Shilingi milioni 30.
“Uhusiano kati ya China na Tanzania una historia ndefu na unaendelea kuimarika kupitia matukio kama haya ambapo michezo inatuunganisha katika roho ya urafiki na kuheshimiana. Naipongeza Stanbic Bank kwa kuendelea kudhamini mashindano haya kwa miaka mingi,” alisema Msigwa.
Hafla hiyo ilihudhuriwa na Balozi wa Jamhuri ya Watu wa China nchini Tanzania, Mheshimiwa Chen Mingjian ambaye alishuhudia ukabidhi wa hundi ya udhamini kutoka Stanbic Bank.
Mbali na kuwa mdhamini mkuu, Stanbic Bank pia imetoa timu yake kushiriki mashindanoni. Ushiriki huo unaonyesha namna uhusiano kati ya benki na jamii ya Wachina ulivyoendelea kuimarika, huku michezo ikitumika kama chombo cha kuimarisha mahusiano ya kibiashara, mshikamano wa kijamii na kubadilishana tamaduni.
Mashindano hayo yamekuwa jukwaa la kuleta pamoja wafanyabiashara wa Kichina, viongozi wa jamii na wadau mbalimbali katika mazingira ya urafiki na ushirikiano.
Mkuu wa Kitengo cha Uwekezaji (Corporate and Investment Banking) wa Stanbic Bank Tanzania, Ester Manase, alisema udhamini huo unaakisi dhamira ya benki ya kujenga ushirikiano wa kweli unaovuka huduma za kifedha.
“Kwa miaka mingi, mashindano haya yamekuwa moja ya majukwaa muhimu kwetu katika kuimarisha mahusiano na jamii ya Wachina nchini Tanzania kwa sababu tunaamini ushirikiano imara hujengwa kupitia uzoefu wa pamoja, si miamala ya kifedha pekee. Dhamira hiyo ndiyo msingi wa kazi yetu kupitia Standard Bank Group, ushirikiano wetu na ICBC pamoja na dawati letu maalum la huduma kwa wafanyabiashara wa Kichina,” alisema Manase.
Aliongeza kuwa:
“Udhamini wetu wa Shilingi milioni 30 una maana kubwa zaidi ya kugharamia mashindano. Kwa kushiriki kama mdhamini na pia mshindani, tunaonyesha kuwa ushirikiano wetu ni wa dhati na wa muda mrefu. Tunaendelea kuunga mkono mipango inayokuza mshikamano wa jamii, kubadilishana tamaduni na maendeleo ya pamoja.”
Mashindano ya Mpira wa Kikapu ya Wachina yameendelea kuwa jukwaa muhimu la kujenga mitandao ya biashara, kuimarisha mahusiano na kukuza kubadilishana uzoefu wa kitamaduni kati ya wadau kutoka Tanzania na China.
Kadri ushirikiano huo unavyoendelea kukua, Stanbic Bank itaendelea kuimarisha uhusiano wake na jamii ya Wachina nchini Tanzania pamoja na kuunga mkono majukwaa yanayochochea ushirikiano, maelewano na maendeleo ya pamoja.
