RAIS wa Jamhuri ya Muungano wa Tanzania, Dkt. Samia Suluhu Hassan, leo Agosti 10, 2026, amekutana na kufanya mazungumzo na Maaskofu wa Kanisa Katoliki nchini Tanzania kupitia Baraza la Maaskofu Katoliki Tanzania (TEC), huku akisisitiza umuhimu wa ushirikiano kati ya Serikali na viongozi wa dini katika kujadili masuala mbalimbali ya kitaifa.
Mazungumzo hayo yamefanyika katika Ikulu ya Chamwino, mkoani Dodoma, yakilenga kuimarisha ushirikiano kati ya Serikali na TEC, pamoja na kujadili nafasi ya viongozi wa dini katika kulea jamii yenye maadili mema, uwajibikaji na mshikamano.
Kwa mujibu wa taarifa iliyotolewa na Kurugenzi ya Mawasiliano ya Rais, Ikulu, mazungumzo hayo yamegusa masuala mbalimbali ya kitaifa yanayoigusa jamii, yakiwemo siasa, imani, maendeleo, pamoja na umuhimu wa kuimarisha amani, mshikamano na kujenga mustakabali mwema wa Taifa.
Taarifa hiyo imeeleza kuwa Rais Samia amewashukuru Maaskofu hao kwa kuona umuhimu wa kukutana na kujadiliana kuhusu masuala muhimu ya kitaifa kila inapohitajika.
Aidha, Rais amesisitiza umuhimu wa kuendeleza utamaduni wa kushauriana na kushirikisha viongozi wa dini pamoja na makundi mbalimbali katika jamii katika masuala yanayohusu ustawi na maendeleo endelevu ya Taifa.
Katika mazungumzo hayo, viongozi hao wamejadili pia umuhimu wa nafasi ya madhehebu na viongozi wa dini katika kujenga jamii yenye maadili mema, uwajibikaji na mshikamano.
Rais Samia amesema ushirikiano huo ni sehemu muhimu ya kujenga Taifa lenye amani na mshikamano, huku akitambua mchango wa viongozi wa dini katika masuala mbalimbali yanayogusa maisha ya wananchi.
Mazungumzo hayo pia yameweka msisitizo katika umuhimu wa Serikali na viongozi wa dini kuendelea kuwa na majadiliano ya mara kwa mara kuhusu masuala yenye maslahi mapana kwa Taifa.
