banner
banner
Home Tags Posts tagged with "magufuli"
Tag:

magufuli

Makala

Ndugu Rais, unayo nafasi ya kipekee

by Jamhuri
written by Jamhuri

Ndugu Rais, Malcolm X, mwanaharakati wa haki za weusi huko Marekani alipata kusema: “Nitaufuata ukweli bila kujali nani anausema. Nitafuata haki bila kujali inampendelea nani au ipo dhidi ya nani.” 

Na kwa sababu hii, baba ninasema kwa sauti kubwa kuwa pamoja na kwamba kila raia ana wajibu wa kuhakikisha amani ya kweli inatamalaki katika nchi yetu, lakini katika hili wewe baba unayo nafasi ya kipekee.

Una nafasi ya kipekee kwa sababu wewe ndiye ambaye umeshika makali ya upanga. Mwaka huu 2020 ni mwaka unaohitaji uamuzi sahihi.

Baba, wananchi wameshuhudia unyama wa kutisha sana ukitendwa na baadhi ya marais katika nchi zao, hasa za Kiafrika, kutokana na wao kukiuka maagano na wananchi wao na kuamua kung’ang’ania madarakani, madaraka waliyoyapata kwa mtutu wa bunduki au kwa udanganyifu wa kura au kwa hila nyingine, huku wananchi wakiwa hawawataki! Iko mifano mingi. Katika nchi jirani ya Uganda wakati wa utawala wa Idi Amin Dada ulishuhudiwa mfano huo.

Rais aliweza kuamuru huyu atekwe, huyu alitekwa! Huyu ateswe, huyu aliteswa! Au huyu apotezwe au auawe, amri ilitimizwa! Wako marais walioua raia wao kwa mikono yao wenyewe na kusiwe kitu. Aliposema huyu au hawa wafunguliwe kesi, walifunguliwa kesi yoyote na kuwekwa ndani bila kufuata haki! Wapelelezi na waendesha mashitaka na mawakili wa uongo waliziendesha kesi zao zilizosimamiwa na mahakimu wasiomjua wala kuwa na hofu ya uwepo wa Mwenyezi Mungu!

Kupitia vyombo vya habari, baba nilikwishawahi kukuona kanisani. Kama ulikuwa unafanya ibada, Bwana akutangulie! Lakini wafafanulie wanao neno hili, kuwa: “Kila mamlaka hutoka kwa Mungu.” Haya yaliyoainishwa hapa baba bado ni sawasawa kusema kila mamlaka hutoka kwa Mungu?

Kiliposikika kilio kikuu kilicholeta simanzi kubwa katika nchi yote kuwa kuna wengine wanalalamika na kuna wengine wanaumia, kiliondosha furaha ya uhuru katika vifua vya watu wote wenye mioyo ya nyama. 

Niliwaona wengine wakipiga ishara ya msalaba na wengine wakiugulia kulingana na imani za dini zao. Baba, usikae mbali nao hao wote, bali uwategee sikio lako. Kama hawakuoni kuwa wewe ni faraja kwao, basi wote kwa pamoja tumwombe Muumba wetu ambaye ni mmoja kwetu wote wasituhesabie kuwa sisi ndio watesi wao.

Haya ni maovu yanayoweza kutendwa na shetani akiwatumia wafuasi wake. Lakini baba, tukumbuke kuwa sisi ni wapitaji tu katika hii dunia. Hapa si kwetu. Kwetu ni kule juu aliko baba. Yote tuyafanyao ni ya kitambo tu. Hivyo ni haki, vema na vizuri sana kukuambia kuwa unayo nafasi ya kipekee ya kuleta maridhiano katika nchi hii, hasa wakati huu ambao nchi na wananchi wanaelekea katika Uchaguzi Mkuu.

Kumbuka hali uliyowakuta nayo Watanzania. Walikuwa wanakula na kucheka bila kuwa na hofu katika vifua vyao. Kuyapuuza haya kutatuletea majuto, majuto ambayo hayatatusaidia kitu.

Mema mengi hayatarajiwi katika wakati huu, lakini hofu ya machungu makubwa yanayoweza kutokea kabla na wakati wa uchaguzi na hata baada ya uchaguzi iko juu sana. Ni wewe baba uliye na nafasi ya kipekee kuepusha shari hii. 

Hakuna mwingine mwenye uwezo wa kuepusha ghasia na machafuko katika nchi yetu zaidi yako wewe uliyeshika makali ya upanga. Haki ni lazima ionekane ikitendeka. Maridhiano, kusamehe na kusameheana ndiyo tofauti kubwa aliyopewa mwanadamu na Mwenyezi Mungu kumtofautisha na wanyama na viumbe vyake vingine. 

Kwa kuwa hayo ni mema, basi hayawezi kumpendeza shetani asilani. Na kwa kuwa naye shetani ana kundi lake la watu wanaomsujudia, basi Muumba wetu atuepushe tusije kuhesabiwa kati yao waliojaa kiburi.

Itapendeza na kutufurahisha sana ikiwa tutachaguliwa katika uchaguzi ujao. Tusihangaike kupiga bao, mahesabu yako wazi. Utatukuzwa kwa mema yako. Babu zetu walisema: “Chema chajiuza, kibaya chajitembeza.”

Ndugu Rais, katika kitabu cha Mwalimu Mkuu wa Watu imeandikwa: “Umekuwa ukipokea ushauri kutoka pande nyingi. Huyu akikwambia hivi, unamsikiliza. Na yule akikwambia vile, naye unamsikiliza, bila kujua kuwa miluzi mingi humchanganya mbwa.” 

Matokeo ya uchaguzi wa serikali za mitaa umethibitisha yaliyoandikwa kuwa ujuzi ni mwalimu mzuri kuliko elimu. Ushindi wa nguvu hauwezi kuisuluhisha mioyo ya wananchi, bali utazidi kuivimbisha na kutafuta kisasi. Vita ni mbaya kwa aliyeshindwa, maana hupata hasara kubwa. Pia vita ni mbaya kwa anayeshinda, maana huandamwa na kisasi siku zote za maisha yake.

Ilizoeleka katika historia mtawala kuwa na anayemwamini ambaye humtumia kwa kila atakacho kufanya. Tulimwona Idi Amin Dada akiwa na Maliyamungu, Nyerere akiwa na Kawawa, lakini mara zote wakubwa ndio walioonekana kuwaendesha waliokuwa chini yao. Katika hii miaka minne wananchi wameona tofauti.

Ujio wa Bashiru Ally, baba wengine waliona kama Mungu kakutumia msaidizi. Lengo lake Muumba yawepo maridhiano kati ya watu wake. Wasiwepo wanaolalamika na wengine wanaoumia! Bashiru alileta faraja kubwa aliposema atawapeleka viongozi vijana mafunzoni wakafundwe. 

Akataka viongozi wengine nao wajivue uheshimiwa waende vijijini na mashambani wakawaelimishe wananchi miradi hii mingi na mikubwa inayofanywa na serikali ina faida gani kwao?

Ndugu Rais kumbuka baba, uliiambia dunia kuwa Watanzania si wajinga. Waliofungiwa watakapowaambia wananchi wapime mantiki iliyopo katika kujenga treni ya nne kwa gharama kubwa, wakati kwa tatu zilizopo hakuna mzigo wala abiria anayebaki wasije kuitwa wachochezi.

Watataka waeleweshwe busara iliyopo ya kuendelea kununua ndege huku watoto wao waliotakiwa kuandikishwa kuanza shule wakiendelea kurundikwa tu kama mifugo kwa kukosa vyumba vya madarasa na madawati. 

Wanafunzi waliokosa kuingia sekondari kutokana na uhaba wa vyumba vya madarasa wametapakaa kwa maelfu nchi nzima. Wengine wa vyuo vikuu hadi leo haijulikani wanaishije baada ya kupatiwa ridhaa ya mikopo bila kuingiziwa fedha!

Hivi wakihoji kwa nini wasiusimamishe angalau mradi mmoja tu fedha hizo si zingetatua kero zote hizi? Baba wataitwa wachochezi? Kwa nini baba tusijipange kuyatafutia majibu mapema? Tukisubiri kuja kuwaita wachochezi wanaotupa ushauri huu. Wataliliwa na dunia kwa kiwango kilekile alicholiliwa Nelson Mandela na wapigania uhuru wenzake. Inaumiza sana kulazimika kumkumbuka Samwel Doe, Rais aliyekatwa masikio akiwa hai!

0 comment 7 views
0 FacebookTwitterPinterestEmail
Kurasa za Ndani

Ndugu Rais shangazi kutangulia sikupi pole

by Jamhuri
written by Jamhuri

Sehemu ya kwanza, nilieleza kuwa wanahistoria wanasema hadi karne ya 17 (miaka ya 1600 AD), duniani hapakuwapo kitu kinachoitwa au kinachojulikana kama CHAMA CHA SIASA tangu enzi za Wagiriki. Endelea….

 

Enzi za utawala wa Warumi (The Roman Empire) kulikuwa na mfumo wao wa utawala ambao haukuwa tofauti na ule wa Wagiriki. Warumi nao walikuwa na mfumo wa wawakilishi. Nao makundi yao yalikuwa mawili.

Kundi la watu mashuhuri ukoo wa watawala (emparors) na wanajeshi na kundi la matajiri – mabepari kama vile katika hadithi ya “The Merchant Of Venice” akina “Shaylock”. Hivyo, utawala wa Warumi ulikuwa wa matabaka – wenyenacho waliunda seneti ya kujadiliana namna ya kulinda maslahi yao. Akina kabwela waliunda kikundi chao ili kujadili namna ya kudai haki zao kutoka kwa watawala na matajiri. Tunaona pia makundi mawili yenye maslahi tofauti kabisa. Bado makundi yale hayakuitwa vyama vya siasa.

Nchini Uingereza nako tunaambiwa hivyo hivyo kwamba mnamo karne ya 17 hivi ndipo kulizuka chokochoko zilizoanzisha vyama vya siasa. Lakini kule Uiingereza hivyo vyama vya siasa havikutokana na makundi ya walionacho (mabwanyenye) na kundi la wasionacho (makabwela). Kule tunaambiwa makundi yalitokana na imani ya DINI.

Ilikuwa enzi za utawala wa Mfalme Charles II (1660-1685) kulitokea sokomoko lililoanzia kwenye UZUSHI uliosambazwa na Mwingereza aliyeitwa Titus Oates ambaye aliwahi kuwa Kasisi wa Kanisa la Anglikana, lakini aliachishwa ule ukasisi (a renegade Anglican priest).

 

Huyu Titus alizusha na kueneza habari kuwa kulikuwa na mpango katika Kanisa Katoliki ulioandaliwa rasmi wa kumuua Mfalme Charles II na kisha kumteua mwana mfalme James aliyekuwa Duke of York ambaye alikuwa ni mdogo wake huyo Mfalme Charles II.

 

Uzushi ule ulijulikana kule Uingereza kama “THE POPISH PLOT” katika historia ya siasa za Uingereza na ulisambazwa kati ya Agosti 12 na Septemba 28, 1678. (soma hayo toka Encyclopaedia Britannica Vol. 16 uk. 815).

Ikumbukwe kuwa Uingereza ni nchi ya madhehebu ya Anglikana kuanzia enzi ya utawala wa Mfalme Henry VIII (1491 – 1547). Huyu Mfalme Henry VIII licha ya kuwa Mkatoliki, ndiye aliyetofautiana na Papa wa Roma juu ya mambo ya NDOA. Basi, mfalme alivunja uhusiano na Roma Desemba 17, 1538 na ikajitenga kuwa nchi yenye madhehebu yake na akayaita ANGLIKANA -dini rasmi ya Uingereza na yeye ndiye akawa Kiongozi Mkuu wa Madhehebu hayo. Hii ilitokea enzi za Upapa wa Paulo III (1534-1549). (Soma zaidi juu ya Mfalme Henry VIII katika Gazeti la Kiongozi toleo No. 24 la tarehe 15 – 21 June, 2018 na matoleo kadhaa yaliyofuata).

Basi, kuanzia Desemba 17, 1538 uhusiano na Roma ulivunjika rasmi. Wafalme wa Uingereza wakawa “automatically” ni Waangalikana na hivyo kuongoza madhehebu hhaya ya Anglikana. Basi, Mfalme Charles II hakuepuka kuwa Mwanglikana.

Kwa kuwa mdogo wake James Duke of York alikuwa bado Mkatoliki, uzushi ule wa Titus ulilenga kuisambaratisha familia ya kifalme, kati ya Waanglikana na Wakatoliki.

Katika Bunge la Uingereza lililokuwa na wajumbe kutoka dini zote mbili, Waanglikana na Wakatoliki kukazuka mjadala wa nguvu kutokana na uzushi ule. Kwa vile wajumbe wengi walikuwa Waanglikana, Bunge likaamua wabunge wale Wakatoliki waondolewe bungeni. Na Wakatoliki wote wenye kazi na nyadhifa serikalini watimuliwe kazi, (huku Tanzania tunasema watumbuliwe).

Na uamuzi wa mwisho wa Bunge lile ulimtaka Mfalme Charles II amfute mdogo wake James Duke of York toka katika ile orodha ya warithi wa Kiti cha Ufalme (from the hereditary line of Royal Family).

Hapo ndipo Mfalme Charles II akaonesha mamlaka yake ya kifalme. Aliwaeleza wabunge kuwa hakubaliani na uamuzi wao kwani uliingilia mamlaka ya ufalme wake.

Mfalme aliunda kamati maalum kufanya uchunguzi wa kina kujua hasa hii “The Popish Plot” ilianzaje, madhara yake na nini kifanyike. (The Popish Plot was planned by the Catholic Church, under the guidance from The Pope in Rome) kwa kusema Kanisa Katoliki lilipanga kumuua Mfalme Charles II ili mdogo wake yule James Duke of York atawazwe kuwa Mfalme wa Uingereza kungekuwa na athari gani.

Jamani, duniani kote binadamu (isipokuwa Kaini kule bustani ya Eden) wanaona damu ni nzito kuliko maji. Hivyo wana ndugu wa ukoo mmoja wana ule mvuto na mshikamano wa damu kuwa ni wamoja kabisa.

Basi kwa ule uzito wa damu moja Mfalme Charles II alikataa kata kata kumwondoa mdogo wake James katika ile orodha ya warithi wa kiti cha ufalme.

Baada ya uchunguzi wa kina ikabainika kuwa uzushi ule wa Titus haukuwa na ukweli wowote. Matokeo yake sasa yalileta mtafaruku katika Bunge la Uingereza.

Msimamo ule wa Mfalme Charles II wa kukataa uamuzi wa Bunge, ulileta mgawanyiko mkubwa usiowahi kutokea katika Bunge lile. Kundi moja la wabunge walimuunga mkono mfalme na kusisitiza kuwa mamlaka ya mfalme yasiingiliwe. Kundi hili lilidai kuwa ile haki ya James Duke of York kurithi kiti cha ufalme (hereditary right of James in spite of his Roman Catholic faith) ni haki yake ya asili na ya kuzaliwa. Kundi hili la wabunge likaitwa “The Torries” maana yake Wakatoliki.

 

Kundi lile la wabunge lililokuwa na msimamo mkali kutokana na uvumi wa Titus lilipinga matakwa yale ya Watori, hili lilidai na kung’ang’ania James Duke of York aondolewe kwenye orodha ya warithi wa taji la kiti cha Ufalme. Hili lilikuwa la Waanglikana, na liliitwa “THE WHIGS” maana yake wapinga uamuzi wa mfalme (wapinzani wapinga Ukatoliki) (Tazama hayo yote katika Encyclopedia Britannica Vol. 23 uk.568).

 

Sasa makundi yale mawili katika Bunge la Uingereza ndiyo yalikuwa asili ya vile vyama vya siasa kule Uingereza viliitwa “Political Parties”. Historia inatuonesha kuwa hii istilahi ya Vyama vya Siasa (this terminology of Political Parties) ndio kwanza inasikika mwaka ule 1678 enzi za utawala wa mfalme Charles II.

 

Ilipofika mwaka 1688/89 kulitokea mageuzi au mapinduzi ya kisiasa (revolution) huko Uingereza. Baada ya mapinduzi yale kimtazamo kule Uingereza, makundi yote mawili “The Torries” na “The Whigs” yenye kuanza kwa mitazamo tofauti ya kidini, tunaambiwa mitazamo yao ikaja kubadilika na kurekebishika (wenyewe wanasema – modified division of principles between the two parties) sasa mitazamo yao kwa umoja wao ililegea na kubadilika – wale “The Torries” wakaja hata kukumbatia itikadi ile ya “The Whigs”.

Kuanzia mwaka 1885 wale waliokuwa wakiitwa “The Torries” ndio sasa wamegeuka kuwa ndio hawa mabwanyenye – “Conservatives”. Historia hii ndugu zangu inatuonesha namna au asili ya vyama vya siasa kule Uingereza tunakowasujudu kama walimu au wasimamizi wa demokrasia duniani.

Basi, katika miaka nenda miaka rudi ya dunia hali Uingereza imefikia hatua ya kuzalisha vyama viwili vikubwa kule hata sisi wa nchi zinazoendelea tunavijua. Kuna chama cha “CONSERVATIVES” na kuna chama cha wafanyakazi kinachoitwa “LABOUR” – hiki kilianzishwa na wafanyakazi mwaka 1900 na kipo pia chama cha waungwana kinachoitwa “THE LIBERALS”. Hiki chama kwa asili yake kilitokana na “The Whigs”. Ni pale ule msimamo mkali “The Whigs” ulipoanza kuyeyuka wenyewe Waingereza wanasema “the evolution from Whiggery to liberalism started roughly around 1815 – 1832” yaani mwanzoni mwa karne ya 19 chama hiki cha “The Liberals” kilianzishwa rasmi (Encyclopaedia Britannica Vol. 13 uk. 1022). Msimamo wa chama hiki cha The Liberals ni rahimu sana.

 

 

 

Itaendelea….

0 comment 6 views
0 FacebookTwitterPinterestEmail
Kitaifa

RAIS WA JAMHURI YA UGANDA, YOWERI MSEVENI KUFANYA ZIARA NCHINI TANZANIA 9 AGOSTI 2018

by Jamhuri
written by Jamhuri
Rais wa Jamhuri ya Uganda, Mheshimiwa Yoweri Kaguta Museveni atafanya ziara ya kikazi ya siku moja hapa nchini tarehe 09 Agosti 2018.
Lengo la ziara hiyo ni kuimarisha ushirikiano na ujirani mwema uliopo kati ya Tanzania na Uganda.
Mara baada ya kuwasili katika Uwanja wa Ndege wa Kimataifa wa Julius Nyerere jijini Dar es Salaam, Mheshimiwa Rais Museveni atapokelewa na mwenyeji wake Mheshimiwa Dkt. John Pombe Joseph Magufuli, Rais wa Jamhuri ya Muungano wa Tanzania.
Akiwa nchini, Mheshimiwa Rais Museveni atakutana kwa mazungumzo ya faragha na Mheshimiwa Rais Magufuli yatakayofanyika Ikulu jijini Dar es Salaam.
Mazungumzo hayo yatafuatiwa na Chakula cha Mchana kilichoandaliwa na Mheshimiwa Rais Magufuli kwa heshima ya Mheshimiwa Rais Museveni.
Mheshimiwa Rais Museveni na Ujumbe wake wataondoka nchini siku hiyo hiyo kurejea Uganda.
0 comment 18 views
0 FacebookTwitterPinterestEmail
Kurasa za Ndani

JPM ainoa safu yake

by Jamhuri
written by Jamhuri

DAR ES SALAAM

NA MWANDISHI MAALUMU

 

Julai 28, mwaka huu, Rais John Magufuli, alifanya uteuzi na uhamisho wa viongozi wa mikoa, wizara na wilaya.

Amefanya mabadiliko hayo baada ya baadhi ya viongozi kustaafu, kuteuliwa kushika nafasi nyingine na wengine kuachwa.

 

 Wakuu wa Mikoa

 

  1. Ally Salum Hapi (aliyekuwa Mkuu wa Wilaya ya Kinondoni) ameteuliwa kuwa Mkuu wa Mkoa wa Iringa. Anachukua nafasi ya Amina Masenza ambaye amestaafu.

 

  1. Brigedia Jenerali Marco Elisha Gaguti ameteuliwa kuwa Mkuu wa Mkoa wa Kagera. Anachukua nafasi ya Meja Jenerali Mstaafu Salum Kijuu ambaye amestaafu.

 

  1. Albert Chalamila ameteuliwa kuwa Mkuu wa Mkoa wa Mbeya. Anachukua nafasi ya Amos Gabriel Makala ambaye amehamishwa na kuwa Mkuu wa Mkoa wa Katavi.

 

Aliyekuwa Mkuu wa Mkoa wa Katavi Meja Jenerali Mstaafu Raphael Muhuga amestaafu.

 

  1. Brigedia Jenerali Nicodemas Elias Mwangela ameteuliwa kuwa Mkuu wa Mkoa wa Songwe. Anachukua nafasi ya Luteni Mstaafu Chiku Gallawa ambaye amestaafu.

 

Wakuu wa mikoa ambao hawakutajwa katika mabadiliko haya wanaendelea na nyadhifa zao kama kawaida.

 

Makatibu Tawala wa Mikoa

  1. Kessy Maduka ameteuliwa kuwa Katibu Tawala wa Mkoa wa Dodoma. Anachukua nafasi ya Rehema Madenge

 

  1. Aboubakar Mussa Kunenge ameteuliwa kuwa Katibu Tawala wa Mkoa wa Dar es Salaam. Anachukua nafasi ya Theresia Mmbando.

 

  1. David Kafulila ameteuliwa kuwa Katibu Tawala wa Mkoa wa Songwe.

 

  1. Denis Bandisa ameteuliwa kuwa Katibu Tawala wa Mkoa wa Geita. Anachukua nafasi ya Selestine Gesimba

 

  1. Happiness Seneda William ameteuliwa kuwa Katibu Tawala wa Mkoa wa Iringa. Anachukua nafasi ya Wamoja Dickolagwa.

 

  1. Abdallah Mohamed Malela ameteuliwa kuwa Katibu Tawala wa Mkoa wa Katavi.

 

  1. Rashid Kassim Mchata ameteuliwa kuwa Katibu Tawala wa Mkoa wa Kigoma. Anachukua nafasi ya Charles Pallangyo.

 

  1. Missaile Mussa ameteuliwa kuwa Katibu Tawala wa Mkoa wa Manyara.

 

  1. Caroline Albert Mthapula ameteuliwa kuwa Katibu Tawala wa Mkoa wa Mara.

 

  1. Dk. Jilly Elibariki Maleko ameteuliwa kuwa Katibu Tawala wa Mkoa wa Mtwara. Anachukua nafasi ya Alfred Luanda.

 

  1. Christopher Derek Kadio ameteuliwa kuwa Katibu Tawala wa Mkoa wa Mwanza. Anachukua nafasi ya Kamishna wa Polisi Mstaafu Clodwing Mtweve.

 

  1. Eric Shitindi ameteuliwa kuwa Katibu Tawala wa Mkoa wa Njombe. Anachukua nafasi ya Jackson Saitabau.

 

  1. Profesa Riziki Salas Shemdoe ameteuliwa kuwa Katibu Tawala wa Mkoa wa Ruvuma. Anachukua nafasi ya Hassan Bendeyeko.

 

 

Makatibu Tawala waliohamishwa

 

  1. Rehema Madenge aliyekuwa Katibu Tawala wa Mkoa wa Dodoma, amehamishiwa katika Mkoa wa Lindi.

 

  1. Theresia Mmbando aliyekuwa Katibu Tawala wa Mkoa wa Dar es Salaam amehamishiwa katika Mkoa wa Pwani.

 

 

Makatibu Wakuu na Naibu Makatibu Wakuu

 

  1. Profesa Joseph Buchweshaija anakuwa Katibu Mkuu wa Wizara ya Viwanda, Biashara na Uwekezaji. Anachukua nafasi ya Prof. Elisante ole Gabriel.

 

  1. Andrew Wilson Massawe anakuwa Katibu Mkuu Ofisi ya Waziri Mkuu Sera, Bunge, Kazi, Vijana, Ajira na Wenye Ulemavu.

 

  1. Profesa Elisante ole Gabriel anakuwa Katibu Mkuu wa Wizara ya Mifugo na Uvuvi (Mifugo).

 

  1. Dk. Jim James Yonazi anakuwa Naibu Katibu Mkuu katika Wizara ya Ujenzi, Uchukuzi na Mawasiliano (Mawasiliano)

 

  1. Edwin Paul Mhede anakuwa Naibu Katibu Mkuu wa Wizara ya Viwanda, Biashara na Uwekezaji.

 

Wakuu wa Wilaya

 

  1. Jerry Cornel Muro anakuwa Mkuu wa Wilaya ya Arumeru.

 

  1. Frank James Mwaisumbe ni Mkuu wa Wilaya ya Longido. Anachukua nafasi ya Daniel Geofrey Chongolo.

 

  1. Patrobas Katambi kuwa Mkuu wa Wilaya ya Dodoma.

 

  1. Mwanahamisi Athuman Mukunda anakuwa Mkuu wa Wilaya ya Bahi. Anachukua nafasi ya Elizabeth Simon Kitundu.

 

  1. Daniel Geofrey Chongolo aliyekuwa Mkuu wa Wilaya ya Longido anakuwa Mkuu wa Wilaya ya Kinondoni.

 

  1. Sara Msafiri Ally aliyekuwa Mkuu wa Wilaya ya Hanang amehamishiwa Wilaya ya Kigamboni. Anachukua nafasi ya Hashim Shaibu Mgandilwa.

 

  1. Said Mkumba anakuwa Mkuu wa Wilaya ya Bukombe. Anachukua nafasi ya Josephat Paulo Maganga

 

  1. Josephat Paulo Maganga amehamishwa na kuwa Mkuu wa Wilaya ya Geita. Anachukua nafasi ya Herman Clement Kapufi.

 

  1. Kanali Patrick Norbert Songea amekuwa Mkuu wa Wilaya ya Chato. Anachukua nafasi ya Shaaban Athuman Ntarambe.

 

  1. Rashid Mohamed Mwaimu ameteuliwa kuwa Mkuu wa Wilaya ya Kyerwa. Anachukua nafasi ya Kanali Shaban Ilangu Lissu

 

  1. Kanali Simon M. Anange anakuwa Mkuu wa Wilaya ya Kasulu.

 

  1. Luteni Kanali Michael Masalama Ngayalina anakuwa Mkuu wa Wilaya ya Buhigwe. Anachukua nafasi ya Brigedia Jenerali Marco Elisha Gaguti.

 

  1. Lengai ole Sabaya anakuwa Mkuu wa Wilaya ya Hai.

 

  1. Hashim Shaibu Mgandilwa ahamishiwa Wilaya ya Ruangwa. Anachukua nafasi ya Joseph Joseph Mkirikiti.

 

  1. Elizabeth Simon Kitundu anakuwa Mkuu wa Wilaya ya Babati. Anachukua nafasi ya Raymond Hieronimi Mushi

 

  1. Joseph Joseph Mkirikiti anakuwa Mkuu wa Wilaya ya Hanang. Anachukua nafasi ya Sara Msafiri Ally.

 

  1. Mary-Priska Winfred Mahundi anakuwa Mkuu wa Wilaya ya Chunya. Anachukua nafasi ya Rehema Manase Madusa.

 

  1. Ngollo Malenya ameteuliwa kuwa Mkuu wa Wilaya ya Ulanga. Anachukua nafasi ya Jacob Joseph Kassoma.

 

  1. Moses Joseph Machali amekuwa Mkuu wa Wilaya ya Nanyumbu.

 

  1. Dk. Severin Mathias Lalika amekuwa Mkuu wa Wilaya ya Ilemela.

 

  1. Dk. Philis Meshack Nyimbo amekuwa Mkuu wa Wilaya ya Nyamagana. Anachukua nafasi ya Mary Onesmo Tesha.

 

  1. Dk. Philemon Sengati ameteuliwa kuwa Mkuu wa Wilaya ya Magu. Anachukua nafasi ya Hadija Rashid Nyombo.

 

  1. Kanali Lucas Boniphace Magembe anakuwa Mkuu wa Wilaya ya Ukerewe. Anachukua nafasi ya Estomih Francis Chang’ah.

 

  1. Zainab Rashid Mfaume Kawawa anakuwa Mkuu wa Wilaya ya Bagamoyo. Anachukua nafasi ya Majid Hemed Mwanga.

 

  1. Jokate Mwegelo amekuwa Mkuu wa Wilaya ya Kisarawe. Anachukua nafasi ya Happiness Seneda William.

 

  1. Sophia Kizigo anakuwa Mkuu wa Wilaya ya Namtumbo. Anachukua nafasi ya Luckiness Adrian Amlima.

 

  1. Jasinta Venant Mboneko amekuwa Mkuu wa Wilaya ya Shinyanga. Anachukua nafasi ya Josephine Rabby Matiro.

 

  1. Rahabu Mwagisa Solomon ameteuliwa kuwa Mkuu wa Wilaya ya Manyoni.

 

  1. Pasacas Muragiri amekuwa Mkuu wa Wilaya ya Singida. Anachukua nafasi ya Elias Choro John Tarimo.

 

  1. Komanya Eric Kitwala ameteuliwa kuwa Mkuu wa Wilaya ya Tabora.

 

  1. Kisa Kasongwa amepelekwa kuwa Mkuu wa Wilaya ya Korogwe.

 

32:  Gift Isaya Msuya ameteuliwa kuwa Mkuu wa Wilaya ya Uyui mkoani Tabora.

 

 

 

Taarifa ya Ikulu ilisema tarehe ya kuapishwa kwa Wakuu wa Mikoa, Makatibu Wakuu, Naibu Makatibu Wakuu na Makatibu Tawala wa Mikoa itafanyika tarehe 1/082018  siku ya jumatano.

Wakuu wa Wilaya wataapishwa na Wakuu wao wa Mikoa kwa utaratibu utakaopangwa.

0 comment 16 views
0 FacebookTwitterPinterestEmail
Kitaifa

Magufuli Ateua Wakuu wa Wilaya Wapya

by Jamhuri
written by Jamhuri

Daniel Chongolo, Mkuu wa wilaya ya Kinondon akichukua nafasi ya Ally Hapi

Lengay Ole Sabaya Mkuu wa Wilaya ya Hai mkoani Kilimanjaro ameteuliwa leo

Moses Machali Mkuu wa Wilaya ya Nanyumbu mkoani Mtwara ameteuliwa.

Jokate Mwegelo Mkuu wa Wilaya ya Kisarawe.

Patrobas Katambi ameteuliwa kuwa Mkuu wa Wilaya ya Dodoma.

Jerry Muro Mkuu wa Wilaya ya Arumeru.

 

Rais Magufuli amemteua Jokate Mwegelo kuwa Mkuu wa Wilaya ya Kisarawe Aidha, amemteua David Kafulila kuwa Katibu Tawala wa Mkoa wa Songwe
Rais Magufuli amemteua Jerry Muro kuwa Mkuu wa Wilaya ya Arumeru na Patrobas Katambi kuwa Mkuu wa Wilaya ya Dodoma.
Rais Magufuli amemteua Ndg. Moses Machali kuwa Mkuu wa Wilaya ya Nanyumbu na Ndg. Lengay Ole Sabaya kuwa Mkuu wa Wilaya ya Hai
Pia amemteua Daniel Chongolo kuwa Mkuu wa Wilaya ya Kinondoni akichukua nafasi ya Ally Hapi ambaye ameteuliwa kuwa Mkuu wa Mkoa wa Iringa

0 comment 22 views
0 FacebookTwitterPinterestEmail
Kimataifa

Rais Magufuli ateuliwa mshindi wa tuzo ya Ukombozi Afrika

by Jamhuri
written by Jamhuri

Rais wa Tanzania John Pombe Magufuli ameibuka mshindi wa tuzo ya Afrika katika masuala ya uchumi.

Makamo mwenyekiti wa kamati ya tuzo ya ukombozi Afrika, Mwebesa Rwebugia ameieleza BBC kwamba rais Magufuli ameibuka mshindi kutokana na mchango wake wa kiuchumi hasaa katika ukuaji wa miundo mbinu.

Hii ni mara ya pili kwa kiongozi wa Tanzania kupata tuzo hii, baada ya Mwalimu Julius Nyerere kutuzwa pia kutokana na mchango wake wa kuleta uhuru katika nchi za Afrika.

Mwebesa Rwebugia ameeleza kuwa, katika kuegemea kwenye muktadha wa uchumi, kamati iliangalia umaskini ambao unatajwa kuwa adui mkubwa anayefahamika, lakini pia maradhi na ujinga.

Kwa mujibu wa kamati hiyo ya Tuzo ya Ukombozi wa Afrika, ukombozi katika kipengelee cha elimu huangazia elimu na ujinga kama sehemu ya ukombozi.

Tanzania imetolewa mfano wa elimu ya bila malipo kutoka kutoka shule za msingi mpaka sekondari.

Katika suala la umaskini, kamati imeangalizia hatua ya kuwajali watu wa kipato cha chini, ukitolewa mfano wa kusajiliwa kwa ‘machinga’ katika kuwatambua rasmi kwa shughuli zao, na pia kuondolewa kodi za mazao kwa wananchi.

Lakini sio kila mtu amepokea vyema ushindi huu wa rais Magufuli kutokana na kwamba kiongozi huyo hajakamilisha hata miaka mitano tangu aingie madarakani.

Wakosoaji wanasema amepunguza nafasi ya raia kujieleze kwa uhuru.

Na serikali yake imekosolewa kwa hatua za kuvizima vyombo vya habari na kinachotajwa kama kuvikandamiza vyama vya upinzani.

‘Rais magufuli hakutazamwa kwa muda aliyoingia madarakani lakini tangu miaka 20 iliyopita. Tangu alipokuwa wizara ya ujenzi na mawasiliano na nyingine tofauti, mpaka kufikia hadi ya kuwa rais wa taifa. Je ni mambo gani aliyoyafanya?’ Amefafanua Rwebugia.

Mnamo 2016 Magufuli alishinda tuzo ya Forbes Africa kwa kuwa mtu anayeheshimika zaidi – na aliteuliwa kwa kutambulika jitihada zake za “kushinikiza uchumi wa Tanzania”.

Tuzo ya Ukombozi Afrika inatambuliwa barani Afrika na Kimataifa lengo lake ni kutambua mchango wa viongozi wa bara la Afrika , wapigania uhuru, wapatanishi wa amani na washiriki wengine wa Ukombozi wa Afrika.

Rais wa Uganda Yoweri Museveni mwishoni mwa mwaka jana aliwahi kuteuliwa mshindi na kamati inayoratibu Tuzo hiyo ya Ukombozi Afrika.

Ushindi wake Museveni ulitangazwa baada ya kamati hiyo kuketi mwezi Oktoba, 2017 na kujiridhisha kupitia vigezo vilivyowekwa kuwa kiongozi huyo anakidhi vigezo vyote.

Alitambuliwa miongoni mwa mengine kwa mchango wake mkubwa wa kipekee alioutoa katika kusimamia amani katika nchi zilizokumbwa na migogoro ya ndani Somalia, Jamhuri ya Kidmeokrasi ya Congo na Burundi.

Vigezo vinavyozingatiwa pia ili kuteuliwa mshindi ni pamoja na mchango wa kiongozi katika ukombozi wa taifa kutoka tawala dhalimu miaka ya nyuma.

Viongozi wengine waliowahi kuishinda tuzo hiyo ni pamoja na Mwalimu Julius Nyerere wa Tanzania na Kenneth Kaunda wa Uganda ambao walitunukiwa tuzo hiyo mwaka 2014.

Rais Magufuli sasa anatarajiwa kupokea medali na cheti katika tarehe rasmi itakayotangazwa na kamati baada ya maridhiano kati ya mgeni rasmi na watu wa itifaki.

0 comment 15 views
0 FacebookTwitterPinterestEmail
Newer Posts
Older Posts