Na WAF, Kigoma
Naibu Waziri wa Afya, Dkt. Florence Samizi, ameendelea kuzisitiza hospitali zote nchini kutozuia maiti kwa sababu yoyote, akisema kuwa hatua hiyo ni utekelezaji wa ahadi ya Rais wa Jamhuri ya Muungano wa Tanzania, Dkt. Samia Suluhu Hassan, aliyoitoa wakati wa kampeni.
Dkt. Samizi ametoa maagizo hayo leo Novemba 29, 2025, wakati wa ziara yake mkoani Kigoma ya kukagua miradi ya maendeleo na hali ya utoaji huduma za Hospitali ya Rufaa ya Mkoa wa Kigoma.
Amesema Rais Samia ameweka msimamo thabiti kwamba hakutakuwa na kikwazo chochote cha kutoa maiti kwa ajili ya maziko, huku taratibu za malipo zikiendelea kufuatwa bila kuathiri familia.
Mbali na agizo hilo, Naibu Waziri Samizi ameagiza majengo yote ya hospitali ambayo yamekamilika kuanza kazi mara moja kutumika, huku akibainisha kuwa kwa majengo yaliyokuwa yakisubiri mkataba, taratibu zimekamilika na mkandarasi anatarajiwa kurejea eneo la mradi muda wowote kuendelea na kazi.
Katika hatua nyingine, Dkt. Samizi amewataka watumishi wa sekta ya afya kufanya kazi kwa weledi, uadilifu na kuwatumikia wananchi ipasavyo ili kufanikisha azma ya Serikali ya Awamu ya Sita ya kuboresha huduma bora za afya nchini.
