Author

Jamhuri

Oxfarm: Kilimo kitaondoa umaskini

by Jamhuri June 3, 2021

written by Jamhuri

DAR ES SALAAM

Na Pawa Lufunga

Shirika la Oxfarm Tanzania limewaasa wadau wa maendeleo nchini kuweka kipaumbele katika sekta ya kilimo ili kutokomeza umaskini.

Akizungumza katika warsha ya wiki mbili iliyowakutanisha wadau wa kilimo nchini, Ofisa Ushawishi wa shirika hilo, George Mwita, amesema kilimo ndiyo sekta inayochukua kundi kubwa la wajasiriamali na wazalishaji mali nchini.

“Sekta hii inaajiri zaidi ya asilimia 65 ya Watanzania na kuchangia takriban asilimia 30 ya pato la taifa; na asilimia 30 ya bidhaa zote zinazosafirishwa nje ya nchi,” anasema Mwita.

Kwa upande wa mifugo, Mwita anasema sekta hiyo ndogo huchangia asilimia 1.4 ya pato la taifa na kuajiri asilimia 35 ya Watanzania huku Tanzania ikishika nafasi ya tatu kwa nchi zenye mifugo mingi Afrika.

“Ilani ya Uchaguzi ya CCM mwaka 2020 -2025 inasema kilimo cha kisasa ndio msingi wa kujenga uchumi wa taifa na kina nafasi ya pekee.

“Ndiyo maana serikali imekuwa ikiweka mikakati mbalimbali kuwezesha sekta hii kuleta tija kwa wananchi na kwa pato la taifa,” anasema.

Baadhi ya washiriki wa warsha hiyo wakiwamo madiwani, wamebainisha kuwa kutokuwapo bajeti shirikishi inayotokana na mahitaji halisi kutoka kwa wakulima wenyewe ni moja ya changamoto zinazokikabili kilimo.

“Kuna tatizo la bajeti kutokuendana na unyeti wa kilimo ambacho ndio uti wa mgongo wa uchumi wetu. Sasa sisi tunapaswa kuishauri serikali kuhakikisha bajeti inakigusa kilimo katika nafasi ya pekee sana,” anasema Alice Mwangomo, Diwani wa Liwiti, mkoani Dar es Salaam.

June 3, 2021 0 comment 12 views

Gazeti Letu Kitaifa

‘Balozi’ Alphayo Kidata kufikishwa mahakamani

by Jamhuri November 21, 2018

written by Jamhuri

Kuna kila dalili kuwa aliyekuwa Balozi wa Tanzania nchini Canada, Alphayo Kidata, atafikisha mahakamani Kisutu muda wowote kuanzia sasa kujibu tuhuma za matumizi mabaya ya madaraka wakati akiwa Kamishna Mkuu wa Mamlaka ya Mapato Tanzania (TRA), uchunguzi wa JAMHURI umebaini.

Kidata aliapishwa Mei 10, mwaka huu kwenda kuwa Balozi wa Tanzania nchini Canada, alikokwenda kuziba nafasi iliyoachwa wazi na Balozi mstaafu, Jack Zoka, aliyehudumu katika nchi hiyo tangu Septemba 30, 2014 hadi muda wake ulipokwisha Machi, mwaka huu.

JAMHURI limepata taarifa zisizotiliwa shaka kwamba Taasisi ya Kuzuia na Kupambana na Rushwa (Takukuru), imekuwa ikifanya uchunguzi dhidi ya Kidata kuhusu matendo yake wakati akiwa Kamishna Mkuu wa TRA na Katibu Mkuu, Wizara ya Ardhi, Nyumba na Maendeleo ya Makazi.

“Wasichojua baadhi ya viongozi wetu hawa ni kwamba tunawachunguza muda wote wanapokuwa madarakani na hata baada ya kutoka madarakani kuhakikisha hatumii vibaya madaraka yake. Wapo wengi tunaowachunguza, ila siku za nyuma mfumo ulikuwa umepigwa ganzi, lakini sasa unafanya kazi.

“Serikali ya Awamu ya Tano inahimiza utawala wa sheria. Kwamba kila kitendo unachofanya kama kiongozi, lazima ukipime iwapo kina masilahi ya taifa au ni masilahi yako binafsi. Wanapaswa kufahamu kuwa ni lazima kila kiongozi awajibike kwa matendo yake,” amesema mtoa taarifa wetu aliyepo ndani ya TAKUKURU.

Chanzo cha kuaminika kimeliambia JAMHURI kuwa Kidata ambaye Novemba 8, 2018 mamlaka ya uteuzi imetengua uteuzi wake na wadhifa wa ubalozi, kuwa uchunguzi huo umechukua muda mrefu na sasa umefikia hatua ambayo “hakuna namna” zaidi ya mtuhumiwa kufikishwa mahakamani kujibu tuhuma.

“Unajua wakati akiwa Kamishna Mkuu wa TRA alifanya mambo ya hovyo mpaka Rais Dk. John Magufuli akaamua kumwondoa pale na kumpeleka Ikulu kuwa Katibu Mkuu, akidhani atajirekebisha. Baadaye akaona ampe nafasi nyingine akampeleka ubalozini Canada.

“Ninafahamu kwamba Kidata amekuwa anachunguzwa na TAKUKURU kwa tuhuma kadhaa, ikiwemo ile ya matumizi mabaya ya madaraka. Kitendo cha Rais Magufuli kumvua nyadhifa zote ikiwemo ya Ubalozi, kuna jambo linakuja,” kimesema chanzo chetu.

Sambamba na suala la matumizi mabaya ya madaraka, chanzo chetu kimesema jambo jingine lililochangia kurejeshwa nyumbani kwa Kidata na kuvuliwa hadhi ya Ubalozi ni pamoja na kushindwa kuendana na kasi na matarajio ya nchi kutoka kwake.

“Unajua pale Canada ndipo zinatengenezwa ndege zetu na Kampuni ya Bombardier. Tangu alipoondoka yule balozi mwingine mambo yamekuwa yanasuasua… hilo nadhani pia halikuwafurahisha wakubwa. Maana zile ndege nyingine zilitakiwa ziwe zimekuja na kiungo hapo ni balozi.

“Ninafahamu kwamba Kidata sasa anafunga mizigo yake ili kurejea nyumbani. Akisharejea kila kitu kitakuwa bayana… kama kutakuwa na kupelekwa mahakamani,” kimesema chanzo kingine.

Jitihada za Gazeti la JAMHURI kuwapata viongozi wa TAKUKURU kuzungumzia kuhusu kuchunguzwa kwa Kidata hazikufanikiwa. Wakati huo huo, jitihada za kumpata Kidata kutoa ufafanuzi juu ya shutuma dhidi yake zinaendelea, maana alipotafutwa nyumbani kwake Canada juzi na jana hakupatikana.

Kidata aliyeteuliwa Januari, 10 kuwa Balozi, awali Machi, 2016, Rais Magufuli alimteua kuwa Kaimu Kamishna Mkuu wa Mamlaka ya Mapato Tanzania (TRA) na baadaye kumthibitisha katika wadhifa huo.

Kabla ya uteuzi huo, Kidata alikuwa Katibu Mkuu wa Wizara ya Ardhi, Nyumba na Maendeleo ya Makazi, nafasi aliyoishikilia tangu Agosti, 2013.

Kidata hapa napo anakabiliwa na tuhuma nyingine. Inaelezwa kuwa wakati akiwa Katibu Mkuu wa Wizara ya Ardhi, Nyumba na Maendeleo ya Makazi, alijiuzia shangingi lililopata ajali ndogo kwa bei ya kutupa. Shangingi hilo lilikuwa linatumiwa na aliyekuwa Waziri wa Ardhi, Nyumba na Maendeleo ya Makazi, Prof. Anna Tibaijuka.

“Mimi nilijua tu kuwa huu msala utabumburuka siku moja. Serikali ya Awamu ya Tano si mchezo. Unajiuzia gari lenye thamani ya zaidi ya Sh milioni 150 kwa Sh milioni 17? Alipaswa kujiuliza, hivi siku Mthamini wa Serikali akiangalia kiwango lilichoharibika gari na muda lililotumika vikawa haviendani na bei uliyolipa si unaingia matatani?

“Pale TRA wanasema yale makontena yaliyokuwa na mashangingi na Range Rover nayo yanamhusu. Jamani, tukipewa nafasi tujiangalie. Tujue kuna leo na kesho. Nafahamu kuna aliowakwaza watashangilia na kuona malipo ni hapa hapa duniani, lakini yanayokwenda kumkuta yanasikitisha,” kilisema chanzo kingine.

Machi 23, 2017 aliteuliwa kuwa Katibu Mkuu (Ikulu) akichukua nafasi iliyoachwa wazi na Peter Ilomo, ambaye alistaafu. Alidumu katika nafasi hiyo hadi Januari 10, alipoteuliwa kuwa Balozi.

Ibara ya 31 ya Mkataba wa Vienna unaohusu uhusiano ya kidiplomasia (VCDR-1961) inaeleza hivi; Balozi atakuwa na kinga dhidi ya mashtaka yote ya jinai katika nchi iliyompokea (Receiving State).

Pia, Balozi atakuwa na kinga dhidi ya mashtaka ya madai ama ya kiutawala katika nchi hiyo anayofanyia kazi isipokuwa kwa:

(a) Suala linalohusu mali binafsi ya Balozi isiyohamishika ambayo ipo ndani ya mipaka ya nchi iliyompokea (Receiving State). Isipokuwa kama Balozi ataishikilia mali hiyo kwa niaba ya nchi iliyomtuma (Sending State) kwa malengo ya ubalozi.

(b) Jambo linalohusiana na Balozi kumiliki kutoka kwa mtu mwingine/Balozi ambalo ni la binafsi na halihusiani na nchi iliyomtuma. (c) Jambo linalohusiana na weledi au masuala ya biashara ambalo Balozi amelifanya nje ya majukumu yake ya kibalozi.

Kwa mujibu wa Ibara ya 36 (2) ya Katiba ya Jamhuri ya Muungano wa Tanzania ya mwaka 1977, inasema Rais atakuwa na madaraka ya kuteua watu kushika nafasi za madaraka ya viongozi wanaowajibika kuweka sera za idara na taasisi za Serikali, na watendaji wakuu wanaowajibika kusimamia utekelezaji wa sera za idara na taasisi hizo katika utumishi wa Serikali ya Jamhuri ya Muungano, nafasi ambazo zimetajwa katika sheria mbalimbali zilizotungwa na Bunge kwamba zitajazwa na uteuzi unaofanywa na Rais.

Katika historia ya nchi hii, Kidata anakuwa Balozi wa pili kutenguliwa nafasi yake na kufikishwa mahakamani, baada ya Balozi Prof. Costa Ricky Mahalu kutenguliwa ubalozi na kufikishwa mahakamani Kisutu.

Prof. Mahalu aliyekuwa Balozi wa Tanzania nchini Italia, alitenguliwa ubalozi wake na kushtakiwa kwa tuhuma za kununua nyumba kwa bei isiyo na uhalisia, ikiwamo matumizi mabaya ya madaraka.

Kesi ya Balozi Mahalu iliweka historia katika nchi ya Tanzania, kwani Rais (mstaafu) Benjamin Mkapa, alilazimika kupanda kizimbani kutoa ushahidi kuwa masuala yote aliyoyafanya Balozi Mahalu yalitokana na maelekezo yake.

Kwa mujibu wa Katiba ya Jamhuri ya Muungano wa Tanzania, Ibara ya 46 (2), Rais haruhusiwi kushtakiwa kwa jambo lolote alilolitenda akiwa madarakani, iwe ni jinai au madai. Kwa ibara hii, na baada ya Rais (mstaafu) Mkapa kutamka kuwa alimwagiza yeye kutenda yote aliyoyatenda, kesi ya Prof. Mahalu ilikufa kifo cha asili kwa Mkurugenzi wa Mashtaka nchini (DPP) kuwasilisha nia ya kutoendelea na kesi mahakamani (nolle presequi).

Ibara ya 46(2), inasema: “Wakati wote Rais atakapokuwa bado ameshika madaraka yake kwa mujibu wa Katiba hii, haitaruhusiwa kufungua mahakamani shauri kuhusu jambo lolote alilolitenda au alilokosa kulitenda yeye binafsi kama raia wa kawaida ama kabla au baada ya kushika madaraka ya Rais, ila tu kama angalau siku thelathini kabla ya shauri kufunguliwa mahakamani, Rais atapewa au ametumiwa taarifa ya madai kwa maandishi kwa kufuata utaratibu uliowekwa kwa mujibu wa sheria iliyotungwa na Bunge, na taarifa hiyo ikiwa inatoa maelezo kuhusu chanzo cha shauri hilo, kiini cha madai yenyewe, jina lake na anwani ya mahali anapoishi huyo mdai na jambo hasa analodai.”

Baadaye Rais Magufuli alimrejeshea hadhi ya Ubalozi Prof. Mahalu mwezi Machi mwaka huu. “Kwa Kidata, yajayo yanafurahisha. Hapa namuona akipambana na hali yake. Inasikitisha, ila kama alivyopata kusema Waziri Mkuu (mstaafu) Cleopa David Msuya; ‘kila mtu atabeba msalaba wake’,” kimesema chanzo chetu kingine.

November 21, 2018 0 comment 49 views

Nyundo ya Wiki

Mchati: Mti wa thamani unaotoweka Mafia

by Jamhuri November 21, 2018

written by Jamhuri

Licha ya ukweli kuwa uoto wa asili wa Kisiwa cha Mafia unafanana kwa kiasi kikubwa na uoto wa asili wa visiwa jirani vya Pemba na Unguja na maeneo ya Bara yaliyopo jirani kama Kisiju na Rufiji, watafiti Rogers na Greenaway (1988) waliokuwa wakidurusu uoto wa Kisiwa cha Mafia walishangazwa mno na kiwango kikubwa cha upekee (endemism) wa mimea ya kisiwa hiki.

Waligundua mimea minne isiyopatikana pengine popote duniani isipokuwa Mafia (Complete Endemic to Mafia Island). Mimea hiyo ni Oldenlandia aegialodes, Xyris parvula, Spermacoce species na Eriocaulo ciliipetalum.

Mimea mingine mitatu ikiwa karibu kuwa ya kipekee (near endemic) nayo ni Tristemma schliebenii na Diospyros mafiensis (mkuremba) ikipatikana Mafia na maeneo jirani ya Bara. Mti mwingine ni Philippia mafiensis (mchati) uliokuwa ukipatikana Mafia na Pemba pekee.

Uwepo wa mti wa mchati (Philippia mafiensis) kisiwani Mafia kuliwastaajabisha kidogo, hii ilitokana na ukweli kuwa miti mingi katika familia ya Eracaceae (family eracaceae) inapatikana katika maeneo ya milima na sehemu za baridi kali zenye mwinuko wa mita 2,700 kutoka usawa wa bahari. Ni mchati pekee katika family eracaceae unaopatikana maeneo ya pwani tambarare, tena Bahari ya Hindi.

Kwa mara ya kwanza mchati ulitambuliwa na kupangwa (verified and classified) na Greenaway mwaka 1948 baada ya kuwa umerekodiwa Kinazini – Pemba (1679, 1981) na maeneo tofauti kisiwani Mafia. Kwa kawaida mchati hukua kama kichaka (shrub) cha mashina mengi na hukua kufikia urefu wa mita 1-5. Lakini baadhi ya sehemu zenye rutuba huweza kufika urefu hadi wa mita 8. Majani ya mchati ni madogo, yenye ukubwa wa milimita 0.5-4.5 na hutoa maua madogo yanayokaa kwa vishada na kila kishada kina maya kati ya 7 mpaka 15.

Mchati hukua katika maeneo yasiyo na rutuba nyingi, yanayohusisha udongo wa kichanga. Hadi mwaka 1988 mchati ulikuwa umeenea na kuchukua ardhi kubwa katika maeneo ya Kilindoni, Dongo mpaka Ras Mbizi, kisiwani Mafia.

Wakati kuna taarifa kuwa mchati ulishamalizika Kinazini – Pemba na haupo tena, huku Mafia mchati unaelekea kufutika kabisa. Maeneo yaliyokuwa na mchati Kilindoni yote yamekuwa makazi ya watu na mchati kufyekwa kuanzia Mabati mpaka Suni Kigamboni kuelekea Dongo. Licha ya kuwa mchati umebaki katika maeneo machache mno ya Mwambae, njia ya Marimbani na eneo dogo njia ya Usewe karibu na Mwembe Mtu, lakini bado mti huu adimu unakatwa katika kiwango cha kutisha kinachohatarisha uwepo wake Mafia na duniani kwa ujumla (extinction).

Kwanini mchati unakatwa sana?

Ukiacha ukataji unaosababishwa na ongezeko la watu wanaohitaji makazi mapya, bado kuna sababu mbili hatarishi zinazoongoza kuumaliza mti wa mchati kisiwani Mafia.

Mosi, ukataji kwa ajili ya kuni za kupikia: Kuni za mchati hazihitaji kukaushwa ili ziwake. Huwaka vizuri hata zikiwa mbichi. Maana yake unaukata mchati sasa hivi na kuutumia kwa kuni za kupikia muda huo huo. Tabia hii ya mchati imeufanya upendwe kama kuni namba moja au mbili kwa matumizi ya nyumbani. Si hivyo tu, bali biashara ya dagaa ambayo inahitaji dagaa wachemshwe kabla ya kuanikwa inapeleka kilio kwa michati kila siku. Biashara hii inahitaji kuni nyingi kuchemshia dagaa na mchati ndio mti unaopendwa sana kwa kuwa una kuni nzuri. Ni kusema mchati unaponzwa na uzuri wake.

Pili, mtazamo wa jamii kuwa ilipo michati basi mikorosho hustawi vizuri: Mtazamo huu umesababisha wananchi wengi kuikata michati kisha kuotesha mikorosho kwa ajili ya biashara. Ni kawaida ukipita Dongo kukuta mtu kuchoma moto michati ili aoteshe mikorosho.

Kwanini ni muhimu kuhifadhi na kuulinda mchati?

Ndugu msomaji, unaweza ukawa unajiuliza, hivi ni kwanini tusiikate miti ya michati wakati inajiotea tu maporini?

1. Kulipo na mchati kuna maji: Uzoefu unaonyesha kuwa mahali ambako michati iko mingi ni rahisi kupata maji. Huenda mti wa mchati unatunza maji ardhini. Katika dunia ambayo inakwenda kuwa maji bidhaa adimu, mchati unaweza kutusaidia siku za usoni kutunza vyanzo vya maji.

2. Mchati ni zawadi kutoka kwa Mungu: Upekee wa mchati na uwepo wake Pemba na Mafia na kukosekana maeneo mengine duniani unaweza kuiita ni zawadi ya Mungu kwa watu wa maeneo husika. Kwanini watu washiriki katika kufuja neema za Mungu alizozitoa bure?

3. Ni kumbukumbu na urithi kwa vizazi vijavyo: Mchati tumerithi kutoka kwa mababu zetu, mchati umekuwa nasi ukitusaidia kwa miaka mingi, kwanini tuumalize bila wajukuu zetu kuuona? Kwanini tusiutunze vizazi vyetu vitushukuru kwa zawadi ya mti huu wa kipekee?

4. Ni alama na utambulisho wa Kisiwa cha Mafia: Kisayansi kama tulivyosema hapo juu, mchati huitwa Philippia mafiensis, neno mafiensis linatokana na jina la Kisiwa cha Mafia. Popote unapotajwa mchati duniani, Mafia nayo inatajwa. Ni mti unaoitangaza Mafia duniani. Mchati kwao ni Mafia na Mafia ni nyumbani kwa mchati.

5. Mungu ametutaka tutunze mazingira: Jamii kubwa ya watu wa Mafia wanaamini katika Uislamu na Qur’an Tukufu. Hivyo kujiepusha na ufujaji wa mazingira (ukataji ovyo wa michati) ni wajibu kwa watu wote. Kwa mfano Qur’an (17:27), Allah amekataza uharibifu aliposema: “Hakika watumiao kwa ubadhirifu ni ndugu wa mashetani. Na shetani ni mwenye kumkufuru Mola wake.”

Pia Qur’an 7:56 Mwenyezi Mungu anasema: “Wala msifanye uharibifu katika nchi baada ya kuwa imekwisha kutengenezwa.”

Hitimisho

Mwishoni mwa mwaka jana (2017) Halmashauri ya Wilaya ya Mafia kupitia Idara ya Maliasili ilipiga marufuku ukataji mti wa michati kwa matumizi ya kuni.

Marufuku hii ama haitekelezwi au haisimamiwi ipasavyo, kwa kuwa mchati bado unakatwa. Ni muda muafaka sasa kwa serikali kuisimamia marufuku hii ili kuilinda michati iliyo hatarini kutoweka.

Usimamizi wa marufuku hii sharti uende sambamba na upandaji wa michati upya katika maeneo yaliyokatwa kwa mustakabali mwema wa mimea hii adimu.

Mwandishi wa makala hii, Juma Salum, ni mwana mazingira, msomi wa masuala ya maliasili aliyehitimu katika Chuo cha Usimamizi wa Wanyamapori Mweka. Anapatikana kwa simu:

0657 972723.

November 21, 2018 0 comment 49 views

Kitaifa

Benki Kuu yaichunguza BOA

by Jamhuri November 21, 2018

written by Jamhuri

Benki Kuu ya Tanzania (BoT) imeanza kuichunguza Benki ya BOA ambayo Gazeti la JAMHURI limeandika kwa wiki mbili mfululizo kuelezea jinsi inavyochezea dhamana za wateja, JAMHURI limeelezwa.

Wateja wengi wa BOA wamejitokeza na malalamiko ya aina mbalimbali dhidi ya benki hii yenye kuonyesha ukiukwaji mkubwa wa Sheria ya Benki na Maduka ya Fedha ya Mwaka 2006, ikiwamo kuwaongezea wateja riba nje ya makubaliano ya kimkataba, kukata fedha za wateja kwenye akaunti zao bila makubaliano wakidai wamewalipa madalali wa kukusanya madeni, kutumia hati za wateja waliomaliza mkopo kukopea mikopo mingine na madai mengine mengi.

“Baada ya habari yenu kutoka, Benki Kuu ya Tanzania imeona ni lazima ichunguze suala hili. Kwa mujibu wa Sheria ya Benki na Maduka ya Fedha ya Mwaka 2006, BoT ndiye mdhibiti wa biashara ya benki na maduka ya fedha.

“Ni kwa msingi huo BoT inalinda masilahi ya wateja na kuhakikisha benki hazipotezi haki yake. Kitu mlichokiandika kimetushtua mno. Ikiwa ni kweli kuwa BOA wanaweza kutumia dhamana ya mteja ambaye hakutoa idhini kumkopesha mteja mwingine mikopo mitatu, basi hii itakuwa ni hatari. Tanzania ya sasa haiwezi kwenda hivyo.

“Lakini pia lazima tujiridhishe kuwa wateja hawafanyi ujanja ujanja kuzamisha benki kwa kutumia mbinu zisizo halali kujipatia fedha kwa njia ya udanganyifu. Yote haya tutayachunguza na ukweli utajulikana,” amesema ofisa mmoja wa Benki Kuu aliyeomba asitajwe gazetini.

Kinachoshindaniwa ni Benki ya BOA kubomoa nyumba tano za Jimmy Mwalugelo anayedaiwa kuwa alimdhamini Rose Miago Asea kupata mkopo kutoka benki hiyo kwa kutumia hati yake kati ya mwaka 2011 hadi 2015.

Mwalugelo ameliambia JAMHURI kuwa yeye hajawahi kumdhamini na wala hamfahamu Rose Asea, hivyo Benki ya BOA imetumia vivuli vya mkopo alioomba mwaka 2011, lakini akakataa kuuchukua baada ya kudaiwa rushwa ya Sh milioni 24.

“Mimi nilikuwa mteja wa muda mrefu wa BOA. Nasisitiza baada ya kuwa wamenizungusha kwenye mkopo nilioomba niliwambia wanipe nyaraka zangu. Wakanirejeshea. Mwanzoni walikuwa wamezihitaji kwa ajili ya kuhakiki uhalali wa mali. Leo wanasema nilimdhamini huyo Rose, kwa kutumia nini? Hati yangu ipo kwenye taasisi ya serikali ilikowekwa kama dhamana, sasa wao wametumia hati ipi?” amehoji Mwalugelo.

JAMHURI limepata taarifa za uhakika kuwa BOA wanadai walimkopesha Rose kwa dhamana aliyoiweka Mwalugelo mwaka 2011, lakini uchunguzi unaonyesha kuwa mwaka 2012 ndipo BOA walipata hati ya nakala inayoonyesha kuwa Mwalugelo alipoteza hati yake, hivyo Wizara ya Ardhi ikampa nakala halisi ya hati.

“Benki wanayo maswali ya kujibu. Walimpaje mkopo Rose mwaka 2011 wakati Mwalugelo akiwa hati yake imepotea? Mimi nasisitiza, hati ipo na ninayo. Sasa waeleze wao ni hati ipi hiyo waliyonayo,” ameongeza Mwalugelo.

Kutokana na utata huo, Unosye Mwalugelo (mke wa Mwalugelo) alifungua kesi Na. 441 ya mwaka 2016 dhidi ya Rose Miago Asea, Bank Of Africa (T) LTD na Mabunda Auctioneer Mart Co. LTD. Hakimu Mkazi wa Mahakama ya Wilaya ya Ilala, Catherine A. Kiyoja, alitoa zuio la muda (Interim Order) kwa wadaiwa kutoshikilia na kuuza nyumba katika kiwanja Na. 671/1, 682/1, 698/1, Block ‘C’ Ukonga, eneo la Stakishari Desemba 16, 2016.

Hata hivyo wakati kuna zuio la mahakama, Machi 22, mwaka jana Benki ya BOA waliuza viwanja hivyo kwa Yusuf Omary na kubadilisha umiliki. Mei 22, mwaka jana kesi aliyofungua Unosye ilitupwa kwa maelezo kuwa Mahakama ya Wilaya ya Ilala kwa mujibu wa Kifungu cha 4 cha Sheria ya Mahakama ya Ardhi, kinainyima Mahakama ya Ilala mamlaka ya kusikiliza kesi hiyo.

Baada ya kutupwa kwa kesi hiyo, Jimmy Mwalugelo alifungua kesi Na. 152 ya 2017 katika Mahakama ya Wilaya ya Ilala dhidi ya Rose Asea, Bank Of Africa (T) LTD na Mabunda Auctioneers Mart Co. Ltd akiiomba mahakama itoe amri ya upande mmoja (Ex-Parte Drawn Order) baada ya amri ya kwanza iliyowazuia mdaiwa wa 2 na 3 kushikilia na kuuza nyumba za mlalamikaji zilizopo katika viwanja namba 660/1, 662/1, 696/1 na 698/1, Block ‘C’ eneo la Ukonga Stakishari hadi shauri la msingi litakaposikilizwa.

Juni 2, 2017, mahakama ilitoa amri nyingine ya kuwazui mdaiwa wa 2 na 3 kushikilia na kuuza nyumba hizo ambayo ilikuwa inafikia kikomo Septemba 3, mwaka jana, lakini walalamikiwa tayari walikuwa wameuza nyumba za Mwalugelo. Julai 28, mwaka jana hati ya Mwalugelo ilibadilikishwa na kuwa mali ya Yusuf Omary. Omary alilipa fedha alizonunua nyumba hizo kwenye akaunti ya Asea aliyeshindwa kulipa mkopo.

Mnunuzi wa nyumba hizo, Omary amezungumza na JAMHURI na kuthibitisha kuwa nakala za malipo lilizonazo gazeti hili ni halisi, kwani alielekezwa na BOA kulipa kupitia akaunti hiyo ya Asea na kwamba yeye alikuwa mshindi wa pili wa mnada wa kuuza nyumba za Mwalugelo.

Omary amesema hamkumbuki mshindi wa kwanza wa mnada huo, wala kampuni iliyokuwa imeendesha mnada. Mwalugelo ameeleza kuwa hajawahi kusikia tangazo lolote la kupiga mnada nyumba zake.

Mwalugelo amelieleza JAMHURI kuwa kutokana na nguvu asiyojua BOA wanaipata wapi, hakuna kesi yoyote ya msingi aliyoifungua yeye au mkewe iliyowahi kusikilizwa na mahakama zaidi ya mahakama kutoa amri dhidi ya walalamikiwa na kupuuzwa. Kesi ya msingi iliyokuwa katika Mahakama ya Wilaya ya Ilala iliondolewa na mlalamikaji baada ya kutoridhishwa na mwenendo wa mahakimu, akaihamishia Mahakama Kuu na kusajiliwa kwa Na. 701 ya 2017.

Katika kesi hiyo BOA walibanwa mahakamani. Walimweleza Jaji Moses Mzuna wa Mahakama Kuu ya Tanzania kuwa walikwishauza nyumba hizo kwa Yusuf Omary, hivyo mlalamikaji alitakiwa kufungua kesi upya akimwongeza mnunuzi wa nyumba hizo miongoni mwa wadaiwa.

Mlalamikaji alifungua kesi upya Mahakama Kuu liliyopewa Na. 802 ya 2017 iliyomuunganisha mnunuzi wa nyumba hizo kama mdaiwa wa nne. Hata hivyo, wakati shauri bado halijasikilizwa Benki ya BOA walibomoa nyumba zote tano likiwemo Kanisa la Moravian, zilizokuwemo katika viwanja vyenye nakala ya hati ililiyokuwa benki na Jaji Mzuna alieleza kuudhiwa na kitendo hicho.

Akitoa uamuzi Oktoba 18, mwaka jana, Jaji Mzuna alisema mahakama haikutoa baraka zozote kwa walalamikiwa kujichukulia uamuzi na kupoteza hadhi ya utendaji wa mahakama. Alisema nyumba hizo ndizo zilikuwa zinalalamikiwa hivyo BOA walipaswa kusubiri uamuzi wa mahakama kabla ya kufanya jambo lolote hata kama haikuwapo amri ya zuio kwa kuwa kesi ilikuwa inaendelea mahakamani.

Hukumu ya Mahakama ya Biashara

Benki ya BOA ilifungua kesi Mahakama Kuu Kitengo cha Biashara dhidi ya Rose Assea iliyopewa Na. 138 ya mwaka 2017, ikimdai Sh milioni 101.6561 kwa kuisababishia benki hasara na kulipa gharama za kesi husika.

Benki ya BOA ambayo katika shauri hilo ilikuwa ndiye mlalamikaji, iliiambia mahakama kwamba kwa nyakati tofauti mwaka 2011, 2014 na 2015 Asea alipewa mkopo wa Sh milioni 100, Sh milioni 200, na mkopo mwingine wa Sh milioni 200 ikiwa ni mtaji wa kufanyia biashara za jumla za kuuza nguo na mikoba kutoka nje.

Wakiwa katika Mahakama Kuu Kitengo cha Biashara, BOA walidai kwamba dhamana ya mikopo hiyo kwa mteja wao huyo ni hati ya viwanja namba 662/1, 662/1 na 698/1, Kitalu ‘C’, Ukonga Stakishari, Ilala, jijini Dar es Salaam, ambavyo vinamilikiwa na Jimmy Mwalugelo.

BOA walidai kuwa mteja wao huyo alitakiwa kulipa mkopo wake wa mwisho na riba kufikia Aprili, 2016 kulingana na makubaliano waliyoafikiana naye.

Katika shauri hilo BOA inasema Aprili 4, mwaka juzi ilimpa notisi ya siku 60 mdaiwa wao, notisi hiyo ilimtaka mdaiwa kulipa mkopo, lakini hakufanya hivyo na baadaye wakatoa notisi nyingine ya siku 14 kwamba watauza dhamana iliyowekwa kwa ajili ya mkopo, bado hakulipa.

Pamoja na ushahidi uliotolewa kwa upande wa mlalamikaji na hukumu kutolewa kwa upande mmoja (Ex-Parte Judgment) Jaji wa Mahakama Kuu, A. R. Mruma, aliyekuwa anasikiliza shauri hilo alitupilia mbali madai ya BOA akiyataja kuwa ni ya ajabu na yenye hila ndani yake.

“Ni wakati mwafaka kwa mabenki kufahamu kwamba wanapoamua kutumia mamlaka yao ya kuuza mali zilizowekwa dhamana kwa mujibu wa mkataba, na uuzwaji wa dhamana kushindwa kufikia gharama halisi aliyokopeshwa mteja, hawawezi kuja mahakamani kudai kwamba hawakupata kiwango cha fedha walichotakiwa kulipwa na kuomba kuuza kwa mnada mali nyingine za mdeni.

“Mali pekee zilizowekwa kama dhamana ndizo zitumike kurejesha fedha kwa mujibu wa mkataba wa mkopeshwaji. Hivyo shauri hili la kibiashara Namba 138 la mwaka 2017 limetupwa,” inasema hukumu ya Jaji Mruma.

Nyumba zavunjwa

Wakati kwa kawaida mkopaji akishindwa kulipa deni nyumba huwa zinauzwa, kwa Mwalugelo imekuwa tofauti. Nyumba tano likiwemo Kanisa la Moravian zilizokuwa katika kiwanja kinachodaiwa kuwa hati yake ilitumika kama dhamana zimebomolewa na BOA, Oktoba 17, mwaka jana, majira ya saa 10 alfajiri. Nyumba hizo zilikuwa na wapangaji 12 wakiwemo watoto wa Mwalugelo na vitu vyote vilivyokuwemo katika nyumba hizo viliibwa na kusababisha hasara ya zaidi ya Sh bilioni 3.

Baada ya ubomoaji wa nyumba hizo, alifungua tena shauri Na. 940 ya 2017 akijumuisha gharama za mali na wapangaji 12, lakini shauri hilo pia lilitupiliwa mbali na Jaji Mzuna kwa kutaka kesi ya msingi iendelee na gharama zote za mali zilizoharibiwa zitafuata baadaye. Hadi sasa hakuna kesi iliyosikilizwa.

Uchunguzi uliofanywa na JAMHURI unaonyesha kuwa maofisa wa benki hiyo walitumia vivuli vya hati hiyo kumkopesha Asea mkopo wa Sh milioni 100 mwaka 2011, Sh milioni 200 mwaka 2014 na Sh milioni 200 mwaka 2015 wakati mmiliki wa hati hiyo akiwa hafahamu kinachoendelea. Hii ilikuwa baada ya kuwakatalia baadhi ya maofisa wa BOA rushwa ya Sh milioni 24.

November 21, 2018 0 comment 29 views

Kitaifa

Amri ya DC Moshi yamchefua Askofu, wananchi Vunjo

by Jamhuri November 21, 2018

written by Jamhuri

Askofu mstaafu wa Kanisa la Kiinjili la Kilutheri Tanzania (KKKT) Dayosisi ya Kaskazini, Dk. Martin Shao, amepinga amri ya Mkuu wa Wilaya (DC) ya Moshi, Kippi Warioba, kuzuia ujenzi wa barabara vijijini katika Jimbo la Vunjo.

Barabara hizo zinajengwa kwa nguvu za wananchi kwa kushirikiana na Taasisi ya Maendeleo Vunjo (VDF).

Askofu Shao ambaye ni Mwenyekiti wa VDF, amewambia waandishi wa habari kwamba hatua hiyo ya mkuu wa wilaya inakinzana na msimamo wa Rais John Magufuli anayesisitiza maendeleo kwa kusema hayana chama.

Amesema wananchi wa Vunjo bila kujali itikadi na dini zao wameamua kwa hiari kuchangia maendeleo kupitia makongamano, mikutano ya vijiji na kupitia vikao vya kamati za maendeleo za kata zote 16 za jimbo hilo.

Katika kongamano la tatu la maendeleo shirikishi lililofanyika Julai 23, mwaka huu ambako mgeni rasmi alikuwa Mkuu wa Mkoa wa Kilimanjaro, Anna Mghwira, alibariki ujenzi na ukarabati wa barabara hizo.

Askofu Shao anasema Mkuu wa Mkoa, Ofisi ya Rais, Tawala za Mikoa na Serikali za Mitaa (TAMISEMI) walimwelekeza Wakala wa Barabara za Mijini na Vijijini (TARURA) kusimamia mradi huo. Ujenzi ulianza Julai 28, mwaka huu.

Awamu ya kwanza wa ujenzi ulianzia barabara ya Marangu – Mshiri – Masia na baadaye barabara ya Babylon – Rengoni hadi Masia; zote zikiwa na urefu wa kilometa 8.8.

Awamu nyingine ilihusisha barabara ya Samanga – Sembeti – Mengeni ambazo zote zipo katika Kata ya Marangu Mashariki. Ujenzi ulianza Septemba 27, mwaka huu.

Askofu Shao anasema kwa sababu ambazo hawazijui, Oktoba 8, mwaka huu DC alizuia ujenzi na kuamuru Mwenyekiti wa Kijiji cha Sembeti, Liberath Ngaseko awekwe rumande kwa saa 48.

“Wana Vunjo tuna alama yetu nayo ni furaha, amani, upendo na mshikamano na licha ya tofauti zetu za kisiasa na kidini, lakini tumeamua kwa pamoja kuifanya Vunjo kuwa mahala salama pa watu kuishi kwa amani na upendo,” anasema.

Anasema wananchi wa Vunjo wana nia, uwezo na sababu za kujiletea maendeleo kwenye eneo lao – akirejea kauli ya Baba wa Taifa, Mwalimu Julius Kambarage Nyerere, aliyoitoa wakati wa vita dhidi ya nduli Idi Amin.

Mashtaka Mahakama Kuu

Bodi ya Wadhamini ya VDF ilikutana Oktoba 30, mwaka huu na kuziteua kampuni mbili za uwakili na kumfungulia mashtaka mawili DC huyo katika Makahama Kuu ya Tanzania Kanda ya Moshi na Dar es Salaam. Mawakili hao ni Mohamed Tibanyendera wa Star Chambers Advocates; na Harold Sungusia na Hardson Mchau kutoka Kampuni ya uwakili ya Sung Consultants.

Katika shauri la kwanza la madai namba 39/2018, VDF na wananchi wa vijiji vya Sembeti na Mshiri wanamdai DC Warioba fidia ya Sh bilioni 2.044 kutokana na hasara iliyosababishwa na yeye kusimamisha ujenzi wa barabara.

Wakili Sungusia anasema shauri jingine lipo katika Makahama Kuu Kanda ya Dar es Salaam ambako wananchi wa Sembeti na Mshiri wanaiomba mahakama imzuie DC huyo na mawakala wake kuingilia maendeleo ya wananchi kinyume cha sheria.

JAMHURI limeona barua ya Mkuu wa Wilaya ya Moshi inayozuia uchangiaji wa fedha kwa ajili ya ujenzi wa barabara katika Jimbo la Vunjo. Miongoni mwa sababu za uamuzi huo inatajwa kuwa ni akaunti inayotumika kutomshirikisha Mkurugenzi wa Halmashauri ya Wilaya ya Moshi.

“Katika barua yako ya kuomba mchango, umeandika anayetaka ufafanuzi anaweza kuwasiliana na ofisi ya mradi iliyopo Himo, hii inathibitisha watendaji wa vijiji na kata hawajashirikishwa, wananchi wanatakiwa kupata maelezo ya shughuli hiyo katika ofisi za tarafa, kata na vijiji; si katika ofisi zenu,” inasema barua hiyo.

Barua hiyo iliyoandikwa na Katibu Tawala wa Wilaya ya Moshi, L.J. Maufi na kunakiliwa kwa Mkurugenzi Mtendaji wa Halmashauri ya Wilaya ya Moshi, inafuta barua iliyotolewa na DC Warioba ya Novemba 28, mwaka jana iliyotoa ruhusa ya michango ya ujenzi wa barabara hizo.

“Kutokana na kasoro zilizojitokeza, taratibu na maagizo ya wilaya kutofuatwa, Mheshimiwa Mkuu wa Wilaya ameagiza nikujulishe kuwa amefuta kibali cha kuchangisha, hivyo [kazi] zoezi la uchangishaji fedha na vifaa lisimame mara moja hadi hapo kutakapotolewa maelekezo mengine,” imeandikwa.

DC amezungumza kwa ufupi juu ya hatua ya ofisi yake kufuta kibali hicho akisema taratibu zimekiukwa ikiwa ni pamoja na wanaotekeleza miradi hiyo kutokuwa na vibali kutoka mamlaka husika na taasisi hiyo kutotambuliwa na ofisi yake.

November 21, 2018 0 comment 21 views

Kitaifa

Makamu wa Rais: Ole wenu wavamia hifadhi

by Jamhuri November 21, 2018

written by Jamhuri

Makamu wa Rais, Samia Suluhu Hassan, ametoa onyo kwa wananchi wenye tabia ya kufanya shughuli za kibinadamu ndani ya maeneo ya hifadhi, akiwataka waache mara moja na wale watakaoendelea wasije kuilaumu serikali kwa hatua itakazochukua dhidi yao.

Ameyasema hayo wakati akizindua rasmi Jeshi Usu ambalo limepewa jukumu la kulinda maliasili za nchi, ikiwemo wanyamapori na misitu, Fort Ikoma, Serengeti mkoani Mara, mwishoni mwa wiki.

Uzinduzi huo umehusisha taasisi tatu za Wizara ya Maliasili na Utalii za Hifadhi za Taifa Tanzania (TANAPA), Mamlaka ya Usimamizi wa Wanyamapori Tanzania (TAWA) na Mamlaka ya Hifadhi ya Ngorongoro (NCAA).

Kuanzishwa kwa Jeshi Usu hilo ni utekelezaji wa Sheria ya Wanyamapori Na. 5 ya mwaka 2009 iliyoelekeza kubadili mfumo wa uendeshaji kutoka wa kiraia kuwa wa kijeshi.

Makamu wa Rais ametoa mwito kwa wananchi kutovamia hifadhi na kutofanya ujangili, akisema kipenga kimepulizwa.

Amewataka wanachi wanaoishi eneo linalozunguka hifadhi washirikiane na Jeshi Usu kulinda usalama wao na wa watalii. Pia amelitaka jeshi hilo lishiriki kutambua na kudhibiti vitendo vya kigaidi, kwani wapo magaidi wanaoweza kuingia nchini kwa kutumia kivuli cha kutalii.

Amesema ujio wa jeshi hilo utasaidia kupambana na majangili ambao wamekuwa wakitumia silaha za kivita.

Amezitaja changamoto zinazoukabili uhifadhi kuwa ni pamoja na ujangili, uvamizi wa mifugo kwenye hifadhi, uvamizi wa mipaka, mmomonyoko wa maadili miongoni mwa watumishi, wanunuzi haramu wa mazao ya misitu na uchomaji moto.

Taarifa za kiintelijensia zinaonyesha kuwa silaha nyingi na risasi zinaingizwa kutoka nchi jirani. Majangili hao wamekuwa na mtandao ndani na nje ya nchi.

Makamu wa Rais anaamini kuanzishwa kwa Jeshi Usu si tu kutapunguza, bali kutamaliza ujangili nchini.

Amesema kwa kutambua umuhimu wa usalama katika hifadhi, hata sura za bodi za taasisi za uhifadhi kwa sasa ni za kijeshi. Mwenyekiti wa Bodi ya TANAPA ni Jenerali mstaafu George Waitara; Mwenyekiti wa Bodi ya TAWA ni Meja Jenerali mstaafu Hamis Semfuko; na kwenye Bodi ya NCAA kuna mjumbe ambaye ni Brigedia Jenerali (mstaafu) Aloyce Damian Mwanjile.

“Hii ni kuonyesha kuwa serikali imejizatiti kuhakikisha kuwa ujangili wa wanyamapori nchini unakwisha na si kupungua tu, bali pia maeneo yaliyohifadhiwa hayatumiki kama maficho ya magaidi na waharibifu wa mazingira,” amesema.

Mwenyekiti wa Kamati ya Kudumu ya Bunge ya Ardhi, Maliasili na Utalii, Nape Nnauye, amezitaka operesheni za Jeshi Usu ziendeshwe kwa kuzingatia haki za binadamu ili wananchi waone thamani ya uhifadhi.

Awali, Waziri wa Malisili na Utalii, Hamis Kigwangalla, amempongeza Rais John Magufuli kwa kuridhia uanzishwaji wa jeshi hilo, huku akiwataka Watanzania kuwa wazalendo na wenye uchungu na maliasili zilizomo nchini.

Ameongeza kuwa, Jeshi Usu litachangia kuongeza nidhamu pamoja na uwajibikaji kwa askari hao.

November 21, 2018 0 comment 12 views

Newer Posts

Older Posts